കോഴിക്കോട്: കൊടുവള്ളിയില്‍ യുവാവിനെ തട്ടിക്കൊണ്ടുപോയ കേസില്‍  പ്രതികളെന്നു സംശയിക്കുന്നവരുടെ പേരും ചിത്രങ്ങളും പൊലിസ് പുറത്തുവിട്ടു. ഷബീര്‍, ജാഫര്‍, നിയാസ് എന്നിവരുടെ ചിത്രങ്ങളാണ് പുറത്തുവിട്ടത്. KL-10-BA-9794 എന്ന വെള്ള മാരുതി സ്വിഫ്റ്റ് കാറിനെ കുറിച്ച് KL-20-Q-8164 എന്ന സ്‌കൂട്ടറിനെ കുറിച്ചും വിവരം ലഭിച്ചാല്‍ കൊടുവള്ളി പൊലിസിനെ അറിയിക്കണമെന്നാണ് നിര്‍ദേശം. 

അനൂസ് റോഷനെ ഏഴംഗ സംഘമാണ് കൊടുവള്ളയിലെ വീട്ടില്‍ നിന്ന് തട്ടിക്കൊണ്ടു പോയിരിക്കുന്നത്. ബൈക്കില്‍ രണ്ടു പേരും കാറില്‍ അഞ്ചുപേരുമാണ് എത്തിയിരുന്നത്. ആദ്യം ബൈക്കിലുള്ളവരാണ് വീട്ടില്‍ എത്തിയതെന്നാണ് കുടുംബം മൊഴി നല്‍കിയിരിക്കുന്നത്. ഇവരെ കൊടുവള്ളി പൊലിസ് കസ്റ്റഡിയിലെടുത്തിട്ടുണ്ട്. വിശദമായി ചോദ്യം ചെയ്തു വരുകയാണ് പൊലിസ്. തട്ടിക്കൊണ്ടുപോയ സംഘം ദിവസങ്ങള്‍ക്കു മുമ്പ് പ്രദേശത്ത് എത്തിയ ദൃശ്യങ്ങളും ലഭിച്ചിട്ടുണ്ട്.

കഴിഞ്ഞ തിങ്കളാഴ്ച പരപാറയില്‍ അനൂസ് റോഷന്റെ വീടിന് അടുത്ത് എത്തിയ സംഘം പ്രദേശത്തെ ചായക്കടയില്‍ കയറുന്നതും സംസാരിക്കുന്നതും ദൃശ്യങ്ങളില്‍ കാണുന്നുണ്ട്. ഇയാള്‍ക്ക് തട്ടിക്കൊണ്ടു പോകലില്‍ പങ്കുണ്ടോ എന്ന സംശയത്തില്‍ പൊലിസ് ചോദ്യം ചെയ്യാന്‍ വിളിപ്പിച്ചിട്ടുണ്ട്. തട്ടിക്കൊണ്ട് പോയ അനൂസ് റോഷന്റെ സഹോദരന്‍ അജ്മല്‍ റോഷന്‍ വിദേശത്ത് നടത്തിയ സാമ്പത്തിക ഇടപാടുകള്‍ ആണ് തട്ടിക്കൊണ്ടു പോകലിനു പിന്നില്‍.

അജ്മല്‍ ഇതുവരെയും നാട്ടിലെത്തിയിട്ടില്ല. ഇതിനു പിന്നാലെയാണ് വീട്ടുകാര്‍ക്ക് ഭീഷണിയും തട്ടിക്കൊണ്ടു പോവലും. പൊലിസ് കസ്റ്റഡിയില്‍ എടുത്തവരുടെ എണ്ണം മൂന്നായി. രണ്ടുപേര്‍ കൊണ്ടോട്ടി സ്വദേശികളാണ്. ഒരാള്‍ കിഴക്കോത്തുകാരനും. കേസന്വേഷണത്തില്‍ പുരോഗതിയുണ്ടെന്നും പ്രതികള്‍ ഉടന്‍ പിടിയിലാകുമെന്നും പൊലിസ്.