തിരുവനന്തപുരം: കുടുംബത്തോടൊപ്പം തോട്ടത്തിലിരുന്ന് ഭക്ഷണം കഴിക്കുകയായിരുന്ന 13 വയസുകാരന്‍ മരത്തിന്റെ ശിഖരം ഒടിഞ്ഞു വീണു മരിച്ചു. നാഗര്‍കോവില്‍ കീഴപെരുവിള സ്വദേശി ഗാഡ്‌സന്‍ സാമുവലിന്റെ മകന്‍ മിത്രനാണ് മരിച്ചത്. കന്യാകുമാരി കോതയാറിനു സമീപമായിരുന്നു സംഭവം.

മുംബൈയില്‍ താമസിക്കുന്ന ഗാഡ്‌സന്‍ കഴിഞ്ഞ ദിവസമാണ് ഭാര്യയും രണ്ടു മക്കളുമൊരുമിച്ച് കോതയാറിലെത്തിയത്. ഇവരോടൊപ്പം തെക്ക്താമരക്കുളത്തുള്ള ഒരു കുടുംബവും മുബൈയില്‍ നിന്നുള്ള 4 കുടുംബങ്ങളുമാണ് 3 കാറുകളിലും 2 ബൈക്കുകളിലുമായി കോതയാറിലേക്കു വന്നത്.

എട്ടു കുട്ടികളുള്‍പ്പെടെ 20 പേരുണ്ടായിരുന്നു സംഘത്തില്‍. ഒരു തോട്ടത്തിലെ മരത്തണലിലിരുന്നു ഭക്ഷണം കഴിക്കുമ്പോള്‍ ഇവര്‍ക്കു മേല്‍ മരക്കമ്പ് ഒടിഞ്ഞു വീഴുകയായിരുന്നു. മറ്റുള്ളവര്‍ ചാടി രക്ഷപ്പെട്ടെങ്കിലും മിത്രനും മറ്റൊരു കുട്ടിയും ശിഖരങ്ങള്‍ക്കടിയില്‍പ്പെടുകയായിരുന്നു.