ദുബൈ: സഊദി അറേബ്യയിലെത്തുന്ന അന്താരാഷ്ട്ര തീർഥാടകർക്ക് ഇപ്പോൾ മൊബൈൽ സേവന ദാതാക്കളുടെ ആപ്പുകൾ വഴി ഇ-സിം കാർഡുകൾ ആക്ടിവേറ്റ് ചെയ്യാൻ സാധിക്കും. സന്ദർശകർക്ക് ഇനി സിം കാർഡിനായി സ്റ്റോർ സന്ദർശിക്കുകയോ താമസ സൗകര്യം ലഭിക്കാൻ കാത്തിരിക്കുക്കയോ വേണ്ട.

ആഭ്യന്തര മന്ത്രാലയത്തിന്റെയും ലൈസൻസുള്ള ടെലികോം ഓപ്പറേറ്റർമാരുടെയും സഹകരണത്തോടെ കമ്മ്യൂണിക്കേഷൻസ്, സ്‌പേസ് ആൻഡ് ടെക്‌നോളജി കമ്മീഷൻ (സിഎസ്ടി) ആണ് ഈ പുതിയ സേവനം അവതരിപ്പിച്ചത്. 

സർക്കാരിന്റെ അബ്ഷർ പ്ലാറ്റ്‌ഫോം ഉപയോഗിച്ച് ബയോമെട്രിക് പരിശോധനാ പ്രക്രിയ പൂർത്തിയാക്കി തീർത്ഥാടകർക്ക് ഇ-സിമ്മുകൾക്ക് അഭ്യർത്ഥിക്കാനും സിം കാർഡ് ആക്ടിവ് ചെയ്യാനും സാധിക്കും. 

അടുത്ത മാസം ആദ്യം നടക്കാനിരിക്കുന്ന വാർഷിക ഹജ്ജ് തീർത്ഥാടന ചടങ്ങുകൾക്കായി ഇതുവരെ ഏകദേശം 666,000 വിദേശ തീർത്ഥാടകർ സഊദി അറേബ്യയിൽ എത്തിയിട്ടുണ്ട്. ചൊവ്വാഴ്ച വിദേശത്ത് നിന്ന് എത്തിയ തീർത്ഥാടകരുടെ എണ്ണം 665,722 ആണെന്ന് സഊദി ഹജ്ജ് മന്ത്രാലയം അറിയിച്ചു.

വിശ്വാസികളെ സ്വാഗതം ചെയ്യുന്ന പ്രവർത്തനങ്ങൾ സുഗമമായി നടക്കുന്നുണ്ടെന്നും, രാജ്യത്തെ എല്ലാ ഏജൻസികളുടെയും സഹകരണവും ഏകോപനവും ഉറപ്പാക്കിയിട്ടുണ്ടെന്നും, വരും ദിവസങ്ങളിൽ തീർത്ഥാടകരുടെ എണ്ണം ഏറ്റവും ഉയർന്ന നിലയിലെത്തുമെന്നും മന്ത്രാലയം വ്യക്തമാക്കി. കഴിഞ്ഞ വർഷം ഏകദേശം 1.8 ദശലക്ഷം പേരാണ് ഹജ്ജ് നിർവഹിച്ചത്.

Saudi Arabia has launched a new eSIM activation service for international Hajj pilgrims, allowing them to activate digital SIM cards remotely through telecom provider apps. This initiative by the Communications, Space and Technology Commission (CST) enables instant connectivity upon arrival without physical SIM cards. Over 666,000 pilgrims have already arrived for Hajj 2024, with numbers expected to rise.