കോഴിക്കോട്: കെ.പി.സി.സി, ഡി.സി.സി പുനഃസംഘടനയ്ക്ക് നീക്കം തുടങ്ങി. പുതിയ അധ്യക്ഷനും വർക്കിങ് പ്രസിഡന്റുമാരും ചുമതല ഏറ്റെടുത്ത സാഹചര്യത്തിൽ ഭാരവാഹികളെ വൈകാതെ നിയമിക്കണമെന്നാണ് ഹൈക്കമാൻഡിന്റെ നിലപാട്. ചർച്ചകൾ വേഗത്തിൽ പൂർത്തിയാക്കി രണ്ടുമാസത്തിനകം പട്ടിക പ്രഖ്യാപിക്കാനാണ് ശ്രമം. തദ്ദേശ തെരഞ്ഞെടുപ്പും നിയമസഭാ തെരഞ്ഞെടുപ്പും അടുത്തുവരുന്ന സാഹചര്യത്തിൽ സമ്പൂർണ പുനഃസംഘടന വേണ്ടെന്നായിരുന്നു സംസ്ഥാന നേതാക്കൾ ഹൈക്കമാൻഡിനെ അറിയിച്ചിരുന്നത്. കെ.പി.സി.സി ഭാരവാഹികളിൽ ചിലരെയും പ്രവർത്തനം ദുർബലമായ ഡി.സി.സി അധ്യക്ഷന്മാരെയും മാറ്റിയാൽ മതിയെന്നായിരുന്നു സംസ്ഥാനത്തെ മുതിർന്ന നേതാക്കളുടെ നിലപാട്. കഴിഞ്ഞ ദിവസം ചേർന്ന കെ.പി.സി.സി നേതൃയോഗത്തിലും നേതാക്കൾ ഇക്കാര്യം സൂചിപ്പിച്ചിരുന്നു. എന്നാൽ, കെ.പി.സി.സി ഭാരവാഹികൾ സമ്പൂർണമായി മാറണമെന്നാണ് ദേശീയ നേതൃത്വത്തിന്റെ നിലപാട്. പ്രവർത്തനം മോശമായ ഡി.സി.സി അധ്യക്ഷൻമാരെയും മാറ്റും. കെ.പി.സി.സിയിൽ വൈസ് പ്രസിഡന്റ്, ജനറൽ സെക്രട്ടറി, ട്രഷറർ എന്നീ സ്ഥാനങ്ങളിലാണ് മാറ്റം വരിക. നിലവിൽ നാല് വൈസ് പ്രസിഡന്റുമാരും 23 ജനറൽ സെക്രട്ടറിമാരുമാണ് കെ.പി.സി.സിക്ക് ഉള്ളത്. അഡ്വ. പ്രതാപചന്ദ്രന്റെ നിര്യാണത്തെ തുടർന്ന് ട്രഷറർ സ്ഥാനം ഒഴിഞ്ഞുകിടക്കുകയാണ്. നിർവാഹക സമിതിയും പുനഃസംഘടിപ്പിച്ചേക്കും. കെ. സുധാകരൻ പ്രസിഡന്റായ കമ്മിറ്റിയിൽ സെക്രട്ടറിമാരെ ഒഴിവാക്കിയിരുന്നു. ഇത്തവണ സെക്രട്ടറിമാരെ നിയമിക്കണമോ എന്ന കാര്യത്തിൽ അന്തിമ തീരുമാനം എടുത്തിട്ടില്ല. സംഘടനാ രംഗത്ത് സജീവമല്ലാത്തവരെ പദവികളിൽ നിന്ന് മാറ്റണമെന്നാണ് ഹൈക്കമൻഡ് നിലപാട്. അതിനാൽ നിലവിലെ ഭാരവാഹികളിൽ പകുതിയോളം പേർ ഒഴിയേണ്ടിവരും. വൈസ് പ്രസിഡന്റുമാരിൽ വി.ടി ബൽറാമും വി.പി സജീന്ദ്രനും മാത്രമാണ് സജീവമായി രംഗത്തുള്ളത്. എൻ. ശക്തനെയും വി.ജെ പൗലോസിനെയും മാറ്റിയേക്കും. ഒമ്പത് ഡി.സി.സികളിൽ പുതിയ അധ്യക്ഷൻമാർ വന്നേക്കും. മികച്ച പ്രവർത്തനം കാഴ്ചവയ്ക്കുന്ന കോഴിക്കോട്, എറണാകുളം, മലപ്പുറം, കണ്ണൂർ എന്നീ ഡി.സി.സി പ്രസിഡന്റുമാരെ നിയമസഭാ തെരഞ്ഞെടുപ്പ് വരെ മാറ്റേണ്ടതില്ലെന്നാണ് പൊതുവായ ധാരണ. സമീപകാലത്ത് ചുമതലയേറ്റ തൃശൂരിലും മാറ്റമുണ്ടാകില്ല. ഇവരിൽ പലരും നിയമസഭയിലേക്ക് മത്സരിക്കാൻ സാധ്യതയുള്ളതിനാൽ സ്ഥാനാർഥി ആകുന്ന മുറയ്ക്ക് സ്ഥാനം ഒഴിയേണ്ടിവരും. തെരഞ്ഞെടുപ്പ് സമയത്ത് മുതിർന്ന നേതാക്കൾക്ക് ചുമതല കൊടുത്ത് പിന്നീട് അധ്യക്ഷൻമാരെ നിയമിക്കാമെന്നാണ് കണക്കുകൂട്ടൽ.

മുൻ പ്രസിഡന്റുമാരുടെ കാലത്ത് നിയമിച്ച ജംബോപട്ടികയിലെ ഭാരവാഹികളാണ് പല ഡി.സി.സികളിലും ഉള്ളത്. ഇതിൽ പകുതിപേരും പ്രവർത്തന രംഗത്ത് സജീവമല്ലെന്ന് സുനിൽ കനഗോലു നൽകിയ റിപ്പോർട്ടിലുണ്ട്. അതിനാൽ തന്നെ ഡി.സി.സികളിൽ ഉടച്ചുവാർക്കൽ അനിവാര്യമാണെന്ന നിലപാടാണ് ദേശീയ നേതൃത്വത്തിന്. ഗ്രൂപ്പ് അടിസ്ഥാനത്തിൽ സ്ഥാനങ്ങൾ വീതംവയ്ക്കില്ലെങ്കിലും പ്രധാന നേതാക്കളുടെയെല്ലാം അഭിപ്രായം കണക്കിലെടുത്താവും പുതിയ ഭാരവാഹികളുടെ പട്ടിക തയാറാക്കുക. പുനഃസംഘടനയുടെ പേരിൽ പാർട്ടിയിൽ അസ്വാരസ്യങ്ങൾ ഉണ്ടാവരുതെന്ന് നേതൃത്വത്തിന് നിർബന്ധമുണ്ട്. അതിനാൽ തന്നെ കൂടിയാലോചനകൾ നടത്തി അഭിപ്രായ രൂപീകരണം നടത്തിയ ശേഷം മാത്രമാകും ഭാരവാഹികളെ പ്രഖ്യാപിക്കുക. രാഷ്ട്രീയ കാര്യ സമിതിയിലും പുനഃസംഘടന വേണമെന്ന അഭിപ്രായം ഉയർന്നിട്ടുണ്ട്. പുതിയ അധ്യക്ഷനെയും വർക്കിങ് പ്രസിഡന്റുമാരെയും പ്രഖ്യാപിച്ചതിനെതിരേ വലിയ പരാതി ഇല്ലാത്തത് നേതൃത്വത്തിന് ആത്മവിശ്വാസം നൽകുന്നുണ്ട്.