വാഷിങ്ടൺ: സുഡാനിലെ ആഭ്യന്തര യുദ്ധത്തിൽ റാപ്പിഡ് സപ്പോർട്ട് ഫോഴ്സിനെതിരെ (ആർഎസ്എഫ്) രാസായുധങ്ങൾ ഉപയോഗിച്ചതായി കണ്ടെത്തിയതിനെ തുടർന്ന് യുഎസ് സുഡാനുമേൽ കടുത്ത ഉപരോധങ്ങൾ ഏർപ്പെടുത്തുന്നു. യുഎസ് സ്റ്റേറ്റ് ഡിപ്പാർട്ട്മെന്റ് വക്താവ് ടാമി ബ്രൂസിന്റെ പ്രസ്താവന പ്രകാരം, ജൂൺ 6 മുതൽ സുഡാനിലേക്കുള്ള കയറ്റുമതി നിയന്ത്രണങ്ങളും സാമ്പത്തിക വായ്പാ പരിധികളും നടപ്പാക്കും.

സുഡാൻ സർക്കാർ രാസായുധങ്ങൾ ഉപയോഗിച്ചതായി യുഎസ് ആരോപിക്കുന്നു. വ്യാഴാഴ്ച കോൺഗ്രസിനെ അറിയിച്ചതിനു ശേഷം, ജൂൺ 6 മുതൽ ഈ നടപടികൾ പ്രാബല്യത്തിൽ വരുമെന്ന് ടാമി ബ്രൂസ് വ്യക്തമാക്കി. ജനുവരിയിൽ, സമാധാന ചർച്ചകൾ ഒഴിവാക്കി യുദ്ധം തുടരാൻ തീരുമാനിച്ചതിന്റെ പേര് പറഞ്ഞ് സുഡാൻ സൈനിക മേധാവി ജനറൽ അബ്ദുൽ ഫത്താഹ് അൽ-ബുർഹാനെതിരെ യുഎസ് ഉപരോധം ഏർപ്പെടുത്തിയിരുന്നു. 2023 ഏപ്രിൽ 15ന് ആരംഭിച്ച സുഡാൻ സൈന്യവും ആർഎസ്എഫും തമ്മിലുള്ള അധികാര പോരാട്ടത്തിൽ 1,50,000-ത്തിലധികം പേർ കൊല്ലപ്പെട്ടു. ഐക്യരാഷ്ട്രസഭ ഇതിനെ ലോകത്തിലെ ഏറ്റവും വലിയ മാനുഷിക പ്രതിസന്ധിയായി വിശേഷിപ്പിച്ചു. ഏകദേശം 12 ദശലക്ഷം ആളുകൾ വീടുകൾ വിട്ട് പലായനം ചെയ്തു.

ന്യൂയോർക്ക് ടൈംസിന്റെ റിപ്പോർട്ട് അനുസരിച്ച്, സുഡാൻ രണ്ട് തവണ ക്ലോറിൻ വാതകം ഉപയോഗിച്ചതായി ആരോപണമുണ്ട്. ഇത് ഗുരുതരമായ ആരോഗ്യപ്രശ്നങ്ങൾക്കും മരണത്തിനും കാരണമാകും. രാസായുധ കൺവെൻഷൻ (സിഡബ്ല്യുസി) ലംഘിക്കുന്ന ഈ പ്രവൃത്തി അവസാനിപ്പിക്കണമെന്നും ആയുധശേഖരം നശിപ്പിക്കണമെന്നും യുഎസ് സുഡാൻ സർക്കാരിനോട് ആവശ്യപ്പെട്ടു.

2021ലെ അട്ടിമറിക്ക് ശേഷം സുഡാൻ സൈന്യവും ആർഎസ്എഫും തമ്മിലുള്ള സംഘർഷം രൂക്ഷമായി. ജനറൽ അബ്ദുൽ ഫത്താഹ് അൽ-ബുർഹാന്റെ നേതൃത്വത്തിലുള്ള സൈന്യവും, ജനറൽ മുഹമ്മദ് ഹംദാൻ ദഗലോ (ഹെമദ്തി) നയിക്കുന്ന ആർഎസ്എഫും സിവിലിയൻ ഭരണത്തിലേക്കുള്ള മാറ്റത്തെ ചൊല്ലി ഏറ്റുമുട്ടി. ആർഎസ്എഫിനെ സൈന്യത്തിൽ ലയിപ്പിക്കാനുള്ള പദ്ധതി തർക്കത്തിന് കാരണമായി.

യുദ്ധം 25 ദശലക്ഷം ആളുകൾക്ക് ഭക്ഷ്യസഹായം ആവശ്യമായ സ്ഥിതി സൃഷ്ടിച്ചു. ഡാർഫർ മേഖലയിൽ ആർഎസ്എഫിന്റെ നേതൃത്വത്തിൽ വംശഹത്യയും അറബ് ഇതര സമൂഹങ്ങൾക്കെതിരെ ലൈംഗിക അതിക്രമങ്ങളും നടക്കുന്നതായി യുഎൻ റിപ്പോർട്ട് ചെയ്തു. ഒരു വയസ്സുള്ള കുട്ടികൾ പോലും ലൈംഗിക പീഡനത്തിന് ഇരയാകുന്നതായി യൂണിസെഫ് വെളിപ്പെടുത്തി. സുഡാനിലെ സ്ഥിതിഗതികളെ "ലോകം മറന്നു" എന്ന് യുഎൻ ആരോപിച്ചു. സൗദി അറേബ്യയിലും ബഹ്‌റൈനിലും നടന്ന സമാധാന ചർച്ചകൾ പരാജയപ്പെട്ടു. യുഎഇ ആർഎസ്എഫിന് ആയുധം നൽകുന്നതായി ആരോപണമുണ്ടെങ്കിലും അവർ നിഷേധിച്ചു. ഇറാൻ നിർമിത ഡ്രോണുകൾ സുഡാൻ സൈന്യത്തെ സഹായിക്കുന്നതായും റിപ്പോർട്ടുകൾ.

സുഡാൻ സൈന്യം ഖാർത്തൂമിന്റെ ഭാഗങ്ങൾ തിരിച്ചുപിടിച്ചെങ്കിലും, ഡാർഫറിലെ എൽ-ഫാഷർ ഉൾപ്പെടെയുള്ള പ്രദേശങ്ങൾ ആർഎസ്എഫിന്റെ ഉപരോധത്തിൽ തുടരുന്നു. 2022ൽ 80% വരുമാനനഷ്ടം നേരിട്ടതായി സുഡാൻ ധനമന്ത്രി വെളിപ്പെടുത്തി.