ബെംഗളൂരു: നഗരത്തിൽ തുടരുന്ന ഭാഷാ സംഘർഷങ്ങൾക്കിടയിൽ, ഒരു പ്രമുഖ ടെക് സ്ഥാപകൻ തന്റെ കമ്പനിയുടെ ഓഫീസ് അടച്ചുപൂട്ടി ആറ് മാസത്തിനുള്ളിൽ പ്രവർത്തനങ്ങൾ പൂനെയിലേക്ക് മാറ്റാൻ തീരുമാനിച്ചു. കന്നഡ സംസാരിക്കാത്ത ജീവനക്കാർ നേരിടുന്ന സമ്മർദ്ദത്തെക്കുറിച്ചുള്ള ആശങ്കകൾ വർധിക്കുന്നതിനിടെയാണ് ഈ നീക്കം. “ഭാഷാ അസംബന്ധം” എന്ന് വിശേഷിപ്പിച്ച സാഹചര്യമാണ് തീരുമാനത്തിന് പിന്നിലെന്ന് സ്ഥാപകനായ കൗശിക് മുഖർജി വ്യക്തമാക്കി. തന്റെ ജീവനക്കാർ ബെംഗളൂരുവിലെ നിലവിലുള്ള ഭാഷാ പ്രശ്നങ്ങളുടെ ഇരകളാകാൻ താൻ ആഗ്രഹിക്കുന്നില്ലെന്നും അദ്ദേഹം കൂട്ടിച്ചേർത്തു. ജീവനക്കാരാണ് ഈ ആശയം ആദ്യം ഉന്നയിച്ചതെന്നും അവരുടെ ആശങ്കകളെ പിന്തുണയ്ക്കാൻ തീരുമാനിച്ചതായും മുഖർജി വെളിപ്പെടുത്തി.

അതേസമയം, ബെംഗളൂരുവിൽ സ്റ്റേറ്റ് ബാങ്ക് ഓഫ് ഇന്ത്യ (എസ്‌ബി‌ഐ) ബ്രാഞ്ച് മാനേജർ ഒരു ഉപഭോക്താവിനോട് കന്നഡയിൽ സംസാരിക്കാൻ വിസമ്മതിച്ചത് കഴിഞ്ഞ ദിവസം വിവാദത്തിന് തിരികൊളുത്തിയിരുന്നു. ആനേക്കൽ താലൂക്കിലെ ചന്ദപുരയിലെ എസ്‌ബി‌ഐ സൂര്യനഗർ ശാഖയിൽ നടന്ന സംഭവം, പ്രാദേശിക ഭാഷയോടും സംസ്കാരത്തോടുമുള്ള അനാദരവായി നാട്ടുകാർക്കിടയിൽ രോഷം ജനിപ്പിച്ചു. മാനേജർ കന്നഡയിൽ സംസാരിക്കാൻ വിസമ്മതിക്കുകയും ഹിന്ദി മാത്രമേ അറിയൂ എന്ന് ശഠിക്കുകയും ചെയ്തതിന്റെ വീഡിയോ സോഷ്യൽ മീഡിയയിൽ വൈറലായി. കന്നഡയിൽ സംസാരിക്കണമെന്ന് എവിടെയാണ് എഴുതിയിരിക്കുന്നത്? നിയമങ്ങൾ കാണിക്കൂ. ഞാൻ ഒരിക്കലും കന്നഡയിൽ സംസാരിക്കില്ല. എസ്‌ബി‌ഐ ചെയർമാനുമായി സംസാരിക്കൂ, എന്നാണ് മാനേജർ ഉപഭോക്താവിനോട് പറഞ്ഞതായി റിപ്പോർട്ട്.

ഈ സംഭവത്തെ മുഖ്യമന്ത്രി സിദ്ധരാമയ്യ ശക്തമായി വിമർശിച്ചു. “എസ്‌ബി‌ഐ ബ്രാഞ്ച് മാനേജർ കന്നഡയിലും ഇംഗ്ലീഷിലും സംസാരിക്കാൻ വിസമ്മതിച്ചത് അപലപനീയമാണ്. ഉദ്യോഗസ്ഥനെ സ്ഥലം മാറ്റിയ എസ്‌ബി‌ഐയുടെ വേഗത്തിലുള്ള നടപടിയെ അഭിനന്ദിക്കുന്നു. ഈ വിഷയം ഇപ്പോൾ അവസാനിപ്പിച്ചതായി കണക്കാക്കാം,” സിദ്ധരാമയ്യ സോഷ്യൽ മീഡിയ പ്ലാറ്റ്‌ഫോമായ എക്സിൽ കുറിച്ചു. “എല്ലാ ബാങ്ക് ജീവനക്കാരും ഉപഭോക്താക്കളോട് മാന്യമായി പെരുമാറുകയും പ്രാദേശിക ഭാഷയിൽ ആശയവിനിമയം നടത്താൻ ശ്രമിക്കുകയും വേണം. ഇന്ത്യയിലുടനീളമുള്ള ബാങ്ക് ജീവനക്കാർക്ക് സാംസ്കാരികവും ഭാഷാപരവുമായ സംവേദനക്ഷമത പരിശീലനം നിർബന്ധമാക്കണമെന്ന് കേന്ദ്ര ധനകാര്യ മന്ത്രാലയത്തോടും ധനകാര്യ സേവന വകുപ്പിനോടും അഭ്യർത്ഥിക്കുന്നു,” അദ്ദേഹം കൂട്ടിച്ചേർത്തു.

സംഭവത്തിന്റെ പശ്ചാത്തലത്തിൽ, മാനേജർക്കെതിരെ കർശന നടപടി ആവശ്യപ്പെട്ട് വിവിധ കന്നഡ സംഘടനകൾ പ്രതിഷേധം സംഘടിപ്പിച്ചിരുന്നു. ചന്ദപുര ബ്രാഞ്ചിലാണ് സംഭവം നടന്നതെന്ന് പൊലീസ് സ്ഥിരീകരിച്ചെങ്കിലും ഔദ്യോഗിക പരാതി രജിസ്റ്റർ ചെയ്തിട്ടില്ല. ബാംഗ്ലൂർ സൗത്ത് എംപി തേജസ്വി സൂര്യയും മാനേജരുടെ പെരുമാറ്റത്തെ വിമർശിച്ചു. “കർണാടകയിൽ, പ്രത്യേകിച്ച് ബാങ്കിംഗ് പോലുള്ള ഉപഭോക്തൃ-ഇന്റർഫേസ് മേഖലയിൽ ജോലി ചെയ്യുന്നവർ ഉപഭോക്താക്കളുമായി അവർക്കറിയാവുന്ന ഭാഷയിൽ ആശയവിനിമയം നടത്തേണ്ടത് അനിവാര്യമാണ്,” സൂര്യ എക്സിൽ കുറിച്ചു.