തിരുവനന്തപുരം: കെ.എസ്.ആർ.ടി.സി ജീവനക്കാർ മദ്യപിച്ചിട്ടാണോ ഡ്യൂട്ടിക്കുവന്നതെന്ന് പരിശോധിക്കാൻ ഉദ്യോഗസ്ഥൻ എത്തിയത് അടിച്ചു പൂസായി കാൽ നിലത്തുറയ്ക്കാത്ത രീതിയിൽ. മറ്റ് ജീവനക്കാർ ഇത് ചോദ്യം ചെയ്തപ്പോൾ പിൻവാതിലിലൂടെ ഇറങ്ങിയോടിയ ഇയാളെ പിന്നീട് സസ്‌പെൻഡ് ചെയ്തു. തിരുവനന്തപുരം ആറ്റിങ്ങൽ കെ.എസ്.ആർ.ടി.സിയിൽ ഈ മാസം ആദ്യമായിരുന്നു കൗതുകമുണർത്തിയ സംഭവം. ആറ്റിങ്ങൽ യൂനിറ്റിന്റെ ചുതലയുള്ള യൂനിറ്റ് ഇൻസ്‌പെക്ടർ എം.എസ് മനോജാണ് സസ്‌പെൻഷനിലായത്.

ഡ്യൂട്ടി തുടങ്ങും മുമ്പ് ജീവനക്കാർ മദ്യപിച്ചിട്ടുണ്ടോ എന്നറിയാനാണ് ആറ്റിങ്ങൽ യൂനിറ്റ് ഇൻസ്‌പെക്ടർ അതിരാവിലെ 'മിനുങ്ങി' എത്തിയത്. ജീവനക്കാർ മദ്യപിച്ച് ഡ്യൂട്ടിക്കെത്തുന്നു എന്ന പരാതിയെ തുടർന്നായിരുന്നു  'പരിശോധന'.  ഇൻസ്‌പെക്ടറും  അടിച്ചു ഫിറ്റാണെന്ന്  മനസിലായതോടെ ജീവനക്കാർ ചോദ്യം ചെയ്തു. എന്നാൽ ഇതൊന്നും ഗൗനിക്കാതെ  ബ്രത്ത് അനലൈസർ ഉപയോഗിച്ചുള്ള പരിശോധന ഇൻസ്‌പെക്ടർ തുടർന്നു. പിന്നാലെ സ്‌റ്റേഷൻ മാസ്റ്റർ ഉദ്യോഗസ്ഥനോട് സ്വയം ബ്രത്ത് അനലൈസർ ഉപയോഗിക്കാൻ നിർബന്ധിച്ചു. ഇതോടെ ഇൻസ്‌പെക്ടർ കുടുങ്ങി. പിടിക്കപ്പെട്ടതോടെ പിൻവാതിലിലൂടെ ഇയാൾ ഇറങ്ങിയോടി. ആറ്റിങ്ങൽ ഡിപ്പോയിൽ നിന്നുള്ള റിപ്പോർട്ടിനു പിന്നാലെ കെ.എസ്.ആർ.ടി.സി വിജിലൻസ് നടത്തിയ അന്വേഷണത്തിൽ ഇൻസ്‌പെക്ടർ മദ്യപിച്ചാണ് പരിശോധനയ്‌ക്കെത്തിയതെന്ന് കണ്ടെത്തിയതോടെ സി.എം.ഡി സസ്‌പെൻഡ് ചെയ്യുകയും ഡ്യൂട്ടി പാസും ഐ.ഡി കാർഡും തിരിച്ചുവാങ്ങുകയുമായിരുന്നു.