കൊച്ചി: കേസൊതുക്കാന്‍ എന്‍ഫോഴ്‌സ്‌മെന്റ് ഡയരക്ടറേറ്റ് ഉദ്യോഗസ്ഥര്‍ കോഴവാങ്ങിയെന്ന കേസില്‍ ഒന്നാംപ്രതിയായ ഇ.ഡി അഡി. ഡയരക്ടര്‍ മുൻകൂർ ജാമ്യംതേടി ഹൈക്കോടതിയിലെത്തിയതിനിടെ ഇടനിലക്കാർ വിജിലൻസ് മുമ്പാകെ ചോദ്യംചെയ്യലിന് ഹാജരായി.

അറസ്റ്റിലായ ചാര്‍ട്ടേര്‍ഡ് അക്കൗണ്ടന്റ് രഞ്ജിത് വാര്യര്‍, ഏജന്റുമാര്‍ എന്നറിയപ്പെടുന്ന വില്‍സണ്‍, മുകേഷ് എന്നിവരാണ് കൊച്ചി വിജിലന്‍സ് ഓഫിസില്‍ ചോദ്യംചെയ്യലിന് ഹാജരായത്. കോടതി നിര്‍ദേശപ്രകാരമാണ് പ്രതികള്‍ ഹാജരായത്.
ചോദ്യംചെയ്യലിനായി അടുത്ത അഞ്ചുദിവസം വിജിലന്‍സ് ഓഫിസില്‍ ഹാജരാകണമെന്ന ഉപാധിയോടെയാണ് മൂവാറ്റുപുഴ വിജിലന്‍സ് കോടതി കഴിഞ്ഞദിവസം ഇവര്‍ക്ക് ജാമ്യം അനുവദിച്ചത്.

കേസില്‍ ഫൊറന്‍സിക് പരിശോധനയ്ക്ക് അയച്ച വസ്തുക്കളുടെ ഫലം ലഭിച്ചിട്ടില്ല. വൈകാതെ ഇത് ലഭിക്കുമെന്നാണ് വിവരം. ഇ.ഡി അഡിഷനല്‍ ഡയരക്ടര്‍ ശേഖര്‍ കുമാറാണ് കേസിലെ ഒന്നാം പ്രതി. ശേഖറിനെ ഇതുവരെ അറസ്റ്റ് ചെയ്തിട്ടില്ല. മുന്‍കൂര്‍ ജാമ്യാപേക്ഷയുമായി ഇയാള്‍ ഹൈക്കോടതിയെ സമീപിച്ചിരിക്കുകയാണ്.

കേസിന്റെ വിശദാംശങ്ങള്‍ സംബന്ധിച്ച് ഇ.ഡിയോട് വിജിലന്‍സ് ഫയല്‍ ആവശ്യപ്പെട്ടിരുന്നു. എന്നാല്‍, ഇ.ഡി ഉദ്യോഗസ്ഥര്‍ ഫയല്‍ കൈമാറിയിട്ടില്ല. ഇന്നോ നാളെയോ ഫയല്‍ കിട്ടിയേക്കുമെന്നാണ് വിവരം. എല്ലാ സത്യങ്ങളും വൈകാതെ പുറത്തുവരുമെന്ന് വിജിലന്‍സ് എറണാകുളം റെയ്ഞ്ച് എസ്.പി എസ്. ശശിധരന്‍ പ്രതികരിച്ചു. പരാതിയുമായി ബന്ധപ്പെട്ട ഫയല്‍ നല്‍കാന്‍ ഇ.ഡിക്ക് നോട്ടിസ് നല്‍കിയിട്ടുണ്ട്. പ്രാഥമിക പരിശോധനയിൽ കേസിൽ വാസ്തവമുണ്ടെന്ന് കണ്ടെത്തിയിട്ടുണ്ടെന്നും എസ്.പി പറഞ്ഞു.