ന്യൂയോർക്ക്: യു.എസിലെ പ്രശസ്തമായ ഹാർവഡ് സർവകലാശാലയിൽ വിദേശ വിദ്യാർഥികൾക്ക് വിലക്കേർപ്പെടുത്തി ട്രംപ് ഭരണകൂടം. നിലവിൽ സർവകലാശാലയിൽ പഠിക്കുന്ന വിദേശ വിദ്യാർഥികൾ മറ്റു സർവകലാശാലകളിലേക്ക് അടിയന്തരമായി മാറണമെന്നാണ് നിർദേശം. അല്ലാത്തപക്ഷം ഈ വിദ്യാർഥികളുടെ വിസ റദ്ദാക്കുമെന്ന് ട്രംപ് മുന്നറിയിപ്പ് നൽകി. അതേസമയം, നടപടി ഫെഡറൽ കോടതി താൽക്കാലികമായി തടഞ്ഞു. നടപടി നിയമാനുസൃതമല്ലെന്ന് സർവകലാശാല പ്രതികരിച്ചു.
ഹാർവഡ് സർവകലാശാലയിലെ വിദ്യാർഥികളിൽ 27ശതമാനം (6,800) വിദേശ വിദ്യാർഥികളാണ്. ഇതിൽ 800 പേർ ഇന്ത്യൻ വിദ്യാർഥികളാണ്. സർവകലാശാലയിൽ ആഭ്യന്തര സുരക്ഷാ വകുപ്പ് നടത്തുന്ന അന്വേഷണത്തിന്റെ ഭാഗമായിട്ടാണ് വിലക്കെന്ന് ഭരണകൂടം അറിയിച്ചു. സർക്കാർ ആവശ്യപ്പെട്ട വിദേശ വിദ്യാർഥികളുടെ പൂർണ വിവരങ്ങൾ 72 മണിക്കൂറിനുള്ളിൽ കൈമാറണമെന്നും ട്രംപ് ഭരണകൂടം വ്യക്തമാക്കിയിട്ടുണ്ട്.

നേരത്തെ, ട്രംപ് മുന്നോട്ടുവച്ച നിർദേശങ്ങൾ പാലിക്കാത്തതിന് സർവകലാശാലയ്ക്കുള്ള ഫെഡറൽ സഹായമായ 230 കോടി ഡോളർ യു.എസ് സർക്കാർ മരവിപ്പിച്ചിരുന്നു.