എറണാകുളം: കൊച്ചി തീരത്ത് അപകടത്തില്‍പ്പെട്ട കപ്പല്‍ മുങ്ങുന്നു:. കപ്പലില്‍ അവശേഷിച്ചിരുന്ന മൂന്നുപേരെ കൂടി നേവി രക്ഷപ്പെടുത്തി. കപ്പലില്‍ നിന്ന് കൂടുതല്‍ കണ്ടയ്‌നറുകള്‍ കടലിലേക്ക് വീണു. 

കപ്പലില്‍ നിന്ന് കണ്ടയ്‌നറുകള്‍ സുരക്ഷിതമായി നീക്കാനുള്ള ശ്രമങ്ങള്‍ തുടരുന്നതിനിടെയാണ് സ്ഥിതി വഷളായത്. കണ്ടയ്‌നര്‍ മാറ്റുന്നതിനായി ഇതേ കമ്പനിയുടെ മറ്റൊരു കപ്പല്‍ കൂടി എത്തിച്ചിരുന്നു. എന്നാല്‍ അതിനിടെ കപ്പല്‍ കൂടുല്‍ ചരിയുകയും മുങ്ങുകയും ചെയ്തു. 

അപകടമുണ്ടായ സമയത്ത് കപ്പലില്‍ ആകെ 24 ജോലിക്കാരാണ് ഉണ്ടായിരുന്നത്. ഇവരില്‍ 21 പേരെ നേരത്തെ രക്ഷിച്ചിരുന്നു. ക്യാപ്റ്റനടക്കമുള്ള മൂന്ന് പേര്‍ ഇന്നലെ കപ്പലില്‍ തുടരുകയായിരുന്നു. ഇവരെയും ഇപ്പോള്‍ പുറത്തെത്തിച്ചിട്ടുണ്ട്. 

അതേസമയം അറബിക്കടലില്‍ വീണ കണ്ടയ്‌നറുകള്‍ എറണാകുളം, ആലപ്പുഴ തീരങ്ങളില്‍ എത്തിയേക്കുമെന്ന് റിപ്പോര്‍ട്ട്. മണിക്കൂറില്‍ ഒരു കിലോമീറ്റര്‍ വേഗതയില്‍ നീങ്ങുന്ന കണ്ടയ്‌നറുകള്‍ ഇന്ന് ഉച്ചയ്ക്ക് ശേഷം തീരത്ത് അടിയാന്‍ സാധ്യതയുണ്ട്. അപകടകരമായ വസ്തുക്കള്‍ ഉള്‍പ്പെടുന്ന കണ്ടയ്‌നറുകള്‍ ആയതിനാല്‍ പൊതുജനങ്ങള്‍ ജാഗ്രത പാലിക്കണമെന്ന് കോസ്റ്റ്ഗാര്‍ഡ് മുന്നറിയിപ്പ് നല്‍കിയിട്ടുണ്ട്. തീരത്തടിഞ്ഞാല്‍ കണ്ടയ്‌നറുകള്‍ സ്പര്‍ശിക്കാനോ, അതിന് അടുത്ത് പോവാനോ പാടില്ലെന്നാണ് നിര്‍ദേശം. 

കണ്ടയ്‌നറുകള്‍ ശ്രദ്ധയില്‍പ്പെട്ടാല്‍ പൊലിസിനെ അറിയിക്കാന്‍ നിര്‍ദേശം നല്‍കിയിട്ടുണ്ട്. കണ്ടയ്‌നറുകളില്‍ നിന്ന് ലീക്കായ ഓയില്‍ തൃശൂര്‍ മുതല്‍ തിരുവനന്തപുരം വരെയുള്ള തീരങ്ങളില്‍ എത്താന്‍ സാധ്യതയുണ്ടെന്നാണ് നിഗമനം.