ഗസ്സ: 20 മാസത്തോളമായി ഗസ്സയിൽ ഇസ്റാഈൽ നടത്തിവരുന്ന കൂട്ടക്കുരുതിക്കു അറുതി വരുത്തി യുഎസ് മധ്യസ്ഥതയിൽ ഗസ്സയിൽ വെടിനിർത്തൽ. 10 ബന്ദികളെ രണ്ട് ബാച്ചുകളായി മോചിപ്പിക്കുകയും പകരം 70 ദിവസത്തെ വെടിനിർത്തൽ നടപ്പാക്കുകയും ചെയ്യുന്നതാണ് കരാർ. കരാർ നടപ്പിലാക്കിയതിന്റെ ആദ്യ ആഴ്ചയിൽ അഞ്ച് ഇസ്രായേലി ബന്ദികളെ മോചിപ്പിക്കുക. വെടിനിർത്തൽ കാലാവധി അവസാനിക്കുന്നതിന് മുമ്പ് ബാക്കി അഞ്ച് പേരെയൂം മോചിപ്പിക്കുക എന്നിവയാണ് നിർദ്ദേശത്തിൽ ഉൾപ്പെടുന്നത്. ഇതോടൊപ്പം നിയമവിരുദ്ധമായി ഇസ്രാഈൽ പിടിച്ചുകൊണ്ടുപോയ ഫലസ്തീനികളെയും മോചിപ്പിക്കും.

കഴിഞ്ഞ ഏതാനും ദിവസങ്ങളായി മുമ്പില്ലാത്ത വിധം ഗസ്സയിൽ സയണിസ്റ്റ് സൈന്യം കുട്ടികളെ ഉൾപ്പെടെ വംശഹത്യ ചെയ്തുകൊണ്ടിരിക്കെ ആണ് വെടിനിർത്തൽ സംബന്ധിച്ച് ധാരണ ആയത്. യുഎസ് പ്രസിഡന്റ് ഡൊണാൾഡ് ട്രംപിന്റെ മിഡിൽ ഈസ്റ്റിനായുള്ള പ്രത്യേക പ്രതിനിധി വിറ്റ്കോഫ് ആണ് വെടിനിർത്തൽ കരാറിലേക്ക് നയിച്ച നിർണായക ഇടപെടൽ നടത്തിയത്. ഖത്തറും ഈജിപ്തും നടത്തിവന്ന ചർച്ചകളിൽ വിറ്റ്കോഫ് ഇടപെട്ടതോടെ നീക്കം വേഗത്തിൽ ആയെന്നു മാധ്യമങ്ങൾ റിപ്പോർട്ട് ചെയ്തു.  

മധ്യസ്ഥർ അവതരിപ്പിച്ച വെടിനിർത്തൽ നിർദ്ദേശം അംഗീകരിച്ചതായി ഹമാസ് വൃത്തങ്ങൾ അറിയിച്ചു. മധ്യസ്ഥരിൽ നിന്ന് ലഭിച്ച യുഎസ് പ്രതിനിധി സ്റ്റീവ് വിറ്റ്കോഫിന്റെ പുതിയ നിർദ്ദേശത്തിന് സമ്മതിച്ചു- ഹമാസ് വൃത്തങ്ങൾ എഎഫ്‌പിയോട് പറഞ്ഞു. യുദ്ധവിരാമ സമയത്ത് അമേരിക്കൻ ഗ്യാരണ്ടികളോടെ സ്ഥിരമായ വെടിനിർത്തലിനുള്ള ചർച്ചകൾ ആരംഭിക്കുമെന്നു ഹമാസ് കൂട്ടിച്ചേർത്തു. 

അതേസമയം, യുഎസ് നിർദേശത്തോട് ഇസ്രാഈൽ പോസിറ്റീവ് ആയി പ്രതികരിച്ചില്ലെന്നു ഔദ്യോഗിക വൃത്തങ്ങൾ പറഞ്ഞു.

Hamas agrees to US proposal for Gaza ceasefire deal