മറ്റൊരു ഇംഗ്ലിഷ് പ്രീമിയർ ലീഗ് സീസൺ കൂടി അവസാനിച്ചിരിക്കുന്നു. ക്രിസ്റ്റൽ പാലസിനെതിരേ ആൻഫീൽഡിൽ നടന്ന അവസാന മത്സരത്തിന് ശേഷം ചാംപ്യന്മാരായ ലിവർപൂൾ താരങ്ങൾ കിരീടമേറ്റുവാങ്ങി. ആഘോഷാരാവങ്ങൾക്കിടെ ഇ.പി.എൽ ട്രോഫിക്ക് മുകളിലുള്ള സ്വർണക്കിരീടം ലിവർപൂൾ താരങ്ങൾ മുഹമ്മദ് സലാഹിന്റെ തലയിൽ ചാർത്തി. ഒരു ചെറുപുഞ്ചിരിയോടെ സലാഹ് ആ ആഘോഷത്തെ വരവേറ്റു. മുഹമ്മദ് സലാഹ് ഹാമിദ് മഹ്‌റസ് ഗാലി, ഈ സീസണിൽ ഇംഗ്ലണ്ട് അടക്കി ഭരിച്ച അയാൾക്കല്ലാതെ മറ്റാർക്കാണ് അവർ ആ കിരീടം ചാർത്തുക. 

ലോകഫുട്‌ബോളിന്റെ നടുമുറ്റമായ ഇംഗ്ലിഷ് പ്രീമിയർ ലീഗിൽ ഒരു പിടി റെക്കോഡുകളുമായാണ് ഈജിപ്തുകാരൻ  ഈ സീസൺ അവസാനിപ്പിച്ചത്. 38 മത്സരങ്ങളിൽ നിന്ന് 84 പോയിന്റോടെ പ്രീമിയർ ലീഗ് കിരീടംനേടിയ ലിവർപൂളിന്റെ ചാലകശക്തി ഈ 32കാരൻ തന്നെയായിരുന്നു. ഇ.പി.എൽ സീസണിലെ മികച്ച കളിക്കാരനായി തെരഞ്ഞെടുക്കപ്പെട്ട സലാഹ് തന്നെയാണ് ഗോൾവേട്ടക്കാരുടെ പട്ടികയിലും കൂടുതൽ അസിസ്റ്റ് നൽകിയവരുടെ പട്ടികയിലും ഒന്നാം സ്ഥാനത്തുള്ളത്. ചരിത്രത്തിലാദ്യമായാണ് ഇംഗ്ലിഷ് പ്രീമിയർ ലീഗിൽ ഒരു താരം ഒരുമിച്ച് ഈ മൂന്ന് നേട്ടങ്ങളും സ്വന്തമാക്കുന്നത്. 

38 മത്സരങ്ങളിൽനിന്ന് 29 ഗോളുകൾ നേടിയാണ് പ്രീമിയർ ലീഗ് ഗോൾഡൻ ബൂട്ട് സലാഹ് സ്വന്തമാക്കിയത്. രണ്ടാമതുള്ള ന്യൂകാസിലിന്റെ അലക്‌സാണ്ടർ ഐസകിന് 23 ഗോളുകളാണ് നേടാനായത്. 18 അസിസ്റ്റുകളോടെയാണ് സലാഹ്  പ്ലേ മേക്കർ അവാർഡിന് അർഹനായത്. ആകെ 47 ഗോളുകളിൽ പങ്കാളിയായ സലാഹ് ഇ.പി.എൽ കിരീടം ലിവർപൂളിന്റെ ഷെൽഫിലെത്തിച്ച് തന്നെ സീസൺ അവസാനിപ്പിച്ചിരിക്കുകയാണ്. 

ഒരു പ്രീമിയർ ലീഗ് സീസണിൽ ഏറ്റവും കൂടുതൽ ഗോൾ പങ്കാളിത്തമെന്ന നേട്ടത്തിലും ഇതോടെ സലാഹ് എത്തി. 1994-95 സീസണിൽ അലൻ ഷിയററും 93-94 സീസണിൽ ആന്ഡ്രൂ കോളെയും മാത്രമാണ് ഇതിനു മുമ്പ് ഒരു സീസണിൽ 47 ഗോളിൽ പങ്കാളികളായത്. 2017ൽ ടീമിലെത്തിയ സലാഹ് 401 മത്സരങ്ങളിൽ നിന്ന് 245 ഗോളുകളാണ് ഇതുവരെ ലിവർപൂളിനായി നേടിയിട്ടുള്ളത്. ലിവർപൂളിന്റെ എക്കാലത്തെയും ഗോൾവേട്ടക്കാരിൽ മൂന്നാമതെത്താനും ഈ സീസണിനിടെ സലാഹിനായി. 228 ഗോൾ നേടിയിരുന്ന സ്‌കോട്ടിഷ് ഇതിഹാസം ബില്ല ലിഡെലിനെയും 241 ഗോളുകളുള്ള ഇംഗ്ലീഷുകാരൻ ഗോർഡൻ ഹോഡ്ഗ്‌സണെയുമാണ് ഈ സീസണിൽ സലാഹ് പിന്തള്ളിയത്.ഇംഗ്ലീഷ് പ്രീമിയർ ലീഗിൽ ഇതുവരെ 301 മത്സരങ്ങളിൽ നിന്ന് 186 ഗോളുകളാണ് ഈ ഈജിപ്തുകാരൻ അടിച്ചു കൂട്ടിയിട്ടുള്ളത്.

ലീഗിൽ എക്കാലത്തെയും മികച്ച ഗോൾവേട്ടക്കാരിൽ നിലവിൽ അഞ്ചാമതാണ് താരം.ഈ സീസണിന് പുറമെ മൂന്ന്് പ്രാവിശ്യമാണ് സലാഹ് പ്രീമിയർ ലീഗിലെ ഗോൾഡൻ ബൂട്ട് സ്വന്തമാക്കിയത്. 2017-18, 2018-19, 2021-22 സീസണുകളിലായിരുന്നു സലാഹിന്റെ നേട്ടം. 2017-18ൽ ടൂർണമെന്റിലും സലാഹിനെ തന്നെയായിരുന്നു ഏറ്റവും മികച്ച താരമായി തിരഞ്ഞെടുത്തത്.

ഇക്കഴിഞ്ഞ സീസണിനിടെ ലിവർപൂൾ സലാഹിന്റെ കരാർ പുതുക്കില്ലെന്ന് വാർത്തകളുണ്ടായിരുന്നു. എന്നാൽ ഇതിനിടയിലും ടീമിന്റെ വിജയമാണ് പ്രധാനമെന്നും അതിലാണ് ശ്രദ്ധയെന്നുമായിരുന്നു സലാഹിന്റെ നിലപാട്. പിന്നീട് 2027വരെ ക്ലബ് കരാർ പുതുക്കുകയും ചെയ്തു. ആർനെ സ്ലോട്ടെന്ന ഡച്ച് പരിശീലകൻ തന്റെ ഈജിപ്ഷ്യൻ വജ്രായുധത്തെ മുന്നിൽ നിർത്തിയുള്ള മാന്ത്രികത തുടരുമെന്ന പ്രതീക്ഷയിലാണ് ആരാധകർ പുതിയ സീസണിനെ വരവേൽക്കാനൊരുങ്ങുന്നത്.   

Egyptian Player Muhammed Salah Create historical achievements in Football