നിലമ്പൂര്‍: യു.ഡി.എഫ് തങ്ങളോട് ചെയ്ത അവഗണനകള്‍ എണ്ണിപ്പറഞ്ഞ് പിവി അന്‍വര്‍. യു.ഡി.എഫ് വാക്ക് പാലിച്ചില്ലെന്നും കാല് പിടിക്കുമ്പോള്‍ മുഖത്ത് ചവിട്ടുകയാണ് മുന്നണിയെന്നും അന്‍വര്‍ കുറ്റപ്പെടുത്തി. വസ്ത്രാക്ഷേപം നടത്തി തെരുവിലേക്ക് ഇറക്കിയ എന്റെ നേരെ ചെളി വാരി എറിഞ്ഞു- അന്‍വര്‍ വാര്‍ത്താ സമ്മേളനത്തില്‍ പറഞ്ഞു. കമ്പ്യൂട്ടറില്‍ മാത്രമുള്ള പാര്‍ട്ടിവരെ ഘടകകക്ഷികളായ യു.ഡി.എഫില്‍ തന്റെ പാര്‍ട്ടിയെ മാറ്റി  നിര്‍ത്തുന്നത് ആരുടെ താത്പര്യമാണെന്നും എന്താണ് ചെയ്ത കുറ്റമെന്ന് യു.ഡി.എഫ് വ്യക്തമാക്കണമെന്നും അന്‍വര്‍ ആവശ്യപ്പെട്ടു. 

പാലക്കാട്, ചേലക്കര തെരഞ്ഞെടുപ്പുകളില്‍ യു.ഡി.എഫിന് പിന്തുണ കൊടുത്തിട്ടും തന്നെ അവഗണിച്ചു- തൃണമൂല്‍ കോണ്‍ഗ്രസ് നേതാവ് പി.വി അന്‍വര്‍ ചൂണ്ടിക്കാട്ടി. പാലക്കാട് തങ്ങളുടെ സ്ഥാനാര്‍ഥിയെ പിന്‍വലിച്ചു. പിന്‍വലിച്ച സ്ഥാനാര്‍ഥിയോട് യു.ഡി.എഫ് നേതൃത്വം നന്ദി പോലും പറഞ്ഞില്ല. ടി.എം.സി നിര്‍ത്തിയിരുന്ന സ്ഥാനാര്‍ഥി അപമാനിതനായെന്നും അന്‍വര്‍ വാര്‍ത്താസമ്മേളനത്തില്‍ പറഞ്ഞു.

'വയനാട് യു.ഡി.എഫിന് നിരുപാധിക പിന്തുണ കൊടുത്തു. പനമരം പഞ്ചായത്ത് എല്‍.ഡി.എഫില്‍ നിന്ന് മറിച്ച് യു.ഡി.എഫിന്റെ കയ്യില്‍ കൊടുത്തു. ചുങ്കത്തറ പഞ്ചായത്തും യു.ഡി.എഫിലേക്ക് എത്തിച്ചു. മുന്നണി പ്രവേശനത്തിന് യു.ഡി.എഫിന് കത്ത് കൊടുത്തിട്ട് നാല് മാസമായി.ഈ മാസം രണ്ടിന് പ്രവേശന ചുമതല യു.ഡി.എഫ് സതീശന് നല്‍കി. പിന്നീട് ഒരു മറുപടിയും ഇല്ല. ഈ മാസം 15 ന് വി ഡി സതീശന്‍ രണ്ട് ദിവസത്തിനകം മറുപടി പറയാം എന്ന് പറഞ്ഞു.ഒന്നും നടന്നില്ല'..അന്‍വര്‍ പറഞ്ഞു.

'ഞാന്‍ രാജിവെച്ചത് പിണറായി ഭരണത്തിന് അന്ത്യം കുറിക്കാനാണ്.അതിന് അനുസരിച്ച സ്ഥാനാര്‍ഥി ആകണ്ടേ?സ്ഥാനാര്‍ഥിയുടെ കുഴപ്പം കൊണ്ട് ഒരു വോട്ടും പോകരുത്. ഇപ്പോള്‍ യു.ഡി.എഫ് നിര്‍ത്തിയ സ്ഥാനാര്‍ഥിയെ കുറിച്ച് ഇനി ചര്‍ച്ചക്കില്ല. ഞാന്‍ അധികപ്രസംഗം നടത്തിയെന്നാണ് പറയുന്നത്. എവിടെയാണ് അധികപ്രസംഗം നടത്തിയത്? അന്‍വര്‍ ചോദിച്ചു.

'എന്നെ ദയാ വധത്തിന് വിട്ടിരിക്കുകയാണ്. അധികാര മോഹം ഉണ്ടെങ്കില്‍ താന്‍ എം.എല്‍.എ സ്ഥാനം രാജി വെക്കില്ലായിരുന്നു'അന്‍വര്‍ പറഞ്ഞു.

ഇനി തന്റെ പ്രതീക്ഷയെന്നും കെ.സി വേണുഗോപാലിലാണെന്നും അദ്ദേഹം കൂട്ടിച്ചേര്‍ത്തു. മുസ്‌ലിം ലീഗ് നേതൃത്വം നിസ്സഹായരാണെന്ന് പറഞ്ഞ അദ്ദേഹം രമേശ് ചെന്നിത്തല നിരന്തരം കാര്യങ്ങള്‍ സംസാരിക്കുന്നുണ്ടെന്നും വ്യക്തമാക്കി. ടി.എം.സി സ്ഥാനാര്‍ഥിയെ നിര്‍ത്തിയാല്‍ ബംഗാള്‍ മുഖ്യമന്ത്രി മമതാ ബാനര്‍ജി പ്രചാരണത്തിന് വരുമെന്ന് പറഞ്ഞിട്ടുണ്ടെന്നും അന്‍വര്‍ പറഞ്ഞു. പ്രചാരണത്തിന് 10 മന്ത്രിമാരെ അയക്കാമെന്ന് പറഞ്ഞിട്ടുണ്ട്.നാണം കെട്ട തീരുമാനത്തിന് പോകേണ്ടെന്നാണ് നേതൃത്വം പറഞ്ഞത്. നോമിനേഷന്‍ കൊടുക്കാനും ടി.എം.സി നേതൃത്വം പറഞ്ഞിട്ടുണ്ട്' പി.വി അന്‍വര്‍ കൂട്ടിച്ചേര്‍ത്തു. 

അന്‍വറിന്റെ എതിര്‍പ്പ് തള്ളിയാണ് ആര്യാടന്‍ ഷൗക്കത്തിനെ നിലമ്പൂരില്‍ മത്സരിപ്പിക്കാന്‍ യു.ഡി.എഫ് തീരുമാനിച്ചത്. ഷൗക്കത്തിനെ സ്ഥാനാര്‍ഥിയാക്കുന്നതിനെതിരേ ഇന്നലെ രാവിലെ വരെ അന്‍വര്‍ പരസ്യമായി രംഗത്തെത്തിയിരുന്നു. തൃണമൂല്‍ കോണ്‍ഗ്രസിനെ മുന്നണിയിലെടുക്കണം എന്ന ആവശ്യമാണ് അന്‍വര്‍ പ്രധാനമായും യു.ഡി.എഫ് നേതൃത്വത്തിന് മുന്നില്‍വച്ചത്. ഇത് അംഗീകരിക്കാന്‍ തയാറാവാത്തതിനെ തുടര്‍ന്നാണ് രാവിലെ അന്‍വര്‍ പരസ്യപ്രതികരണം നടത്തിയത്. താന്‍ രാജിവച്ച് ഉപതെരഞ്ഞെടുപ്പിന് അവസരമൊരുക്കി. കോണ്‍ഗ്രസ് ആരെ സ്ഥാനാര്‍ഥിയാക്കിയാലും അവരെ പിന്തുണക്കുമെന്ന് പ്രഖ്യാപിച്ചു. എന്നിട്ടും തന്റെ ഒരു ആവശ്യം പോലും കോണ്‍ഗ്രസ് അംഗീകരിച്ചില്ല എന്നാണ് അന്‍വറിന്റെ പരാതി. 

പരമാവധി വോട്ട് പിടിക്കാന്‍ കഴിയുന്ന സ്ഥാനാര്‍ഥിയെ നിര്‍ത്തണം, വി.എസ് ജോയിയെ പരിഗണിക്കാന്‍ കഴിയുമെങ്കില്‍ പരിഗണിക്കണം എന്നാണ് താന്‍ ആവശ്യപ്പെട്ടത്. സ്ഥാനാര്‍ഥിത്വം  കുട്ടിക്കളിയല്ല. വി. എസ് ജോയ് തന്റെ പെങ്ങളുടെ മകനൊന്നുമല്ല. അദ്ദേഹം കുടിയേറ്റ കര്‍ഷകനാണ്. മലയോര മേഖല അനുഭവിക്കുന്ന പ്രശ്നങ്ങള്‍ അദ്ദേഹത്തിന് അറിയാം. അത് പരിഗണിക്കണം എന്നാണ് ആവശ്യപ്പെട്ടതെന്നും പി.വി അന്‍വര്‍ പറഞ്ഞു. തങ്ങള്‍ ഉയര്‍ത്തിയ വിഷയം ആന്റി പിണറായിസമായിരുന്നു. അത് പറഞ്ഞാണ് താന്‍ എല്‍.ഡി.എഫില്‍ നിന്ന് പുറത്തിറങ്ങിയത്. അത് താന്‍ എന്നും ഉയര്‍ത്തുമെന്നും പി.വി അന്‍വര്‍ പറഞ്ഞു.