ലണ്ടൻ: ലിവർപൂളിന്റെ ഇംഗ്ലീഷ് പ്രീമിയർ ലീഗ് വിജയ ആഘോഷ പരിപാടിയിൽ കാറിടിച്ചുകയറി നിരവധി ആളുകൾക്ക് പരുക്ക്. സംഭവത്തിൽ കുട്ടികൾ അടക്കം അൻപതോളം ആളുകൾക്കാണ് പരുക്ക് സംഭവിച്ചത്. 27 പേരെ ആശുപത്രിയിൽ പ്രവേശിപ്പിക്കുകയും ചെയ്തു.

കാറിന്റെ അടിയിൽ കുടുങ്ങിയ ഒരു കുട്ടി ഉൾപ്പടെ നാല് ആളുകളെ രക്ഷപ്പെടുത്തിയതായി ഫയർ ആൻഡ് റെസ്ക്യൂ സർവീസ് ചീഫ് ഫയർ ഓഫിസർ അറിയിച്ചു. ഒരു കുട്ടിയുടെയും രണ്ട് ആളുകളുടെയും നില ഗുരുതരമായി തുടരുകയാണ്. തിങ്കളാഴ്ച്ച വൈകുന്നേരമാണ് സംഭവം നടന്നത്. സംഭവത്തിൽ കാര് ഡ്രൈവറായ 53കാരൻ അറസ്റ്റിലായി. 

ലിവർപൂളിന്റെ കിരീടനേട്ടത്തിന്റെ ആഘോഷത്തിന്റെ ഭാഗമായി ഓപ്പൺ ടോപ് ബസ് വിക്ടറി പരേഡ് നടക്കുമ്പോഴാണ് അപകടം നടന്നത്. ആരാധകർക്ക് നേരെ കാർ പാഞ്ഞുകയറുന്നതിന്റെ വീഡിയോ സോഷ്യൽ മീഡിയയിൽ പ്രചരിക്കപ്പെടുന്നുണ്ട്. ചില ആളുകളെ ഇടിച്ചതിന് ശേഷം കാർ നിർത്തുകയും വീണ്ടും ആളുകൾക്ക് നേരെ പാഞ്ഞുകയറുകയായിരുന്നുവെന്നാണ് സംഭവസ്ഥലത്തുള്ളവർ വ്യക്തമാക്കുന്നത്.

കാർ നിർത്തിയ സമയങ്ങളിൽ ജനങ്ങൾ ഡ്രൈവർക്ക് നേരെ തിരിഞ്ഞു. എന്നാൽ പൊലിസ് ഇടപെട്ടുകൊണ്ട് ഇവരെ മാറ്റുകയായിരുന്നു. ഇത് ഒറ്റപ്പെട്ട സംഭവമാണെന്നും മറ്റാരെയും സംഭവത്തിൽ സംശയമില്ലെന്നും തീവ്രവാദ ബന്ധവുമായി ഇതിനെ കണക്കാക്കേണ്ടെന്നും താത്കാലിക ഡെപ്യൂട്ടി ചീഫ് കോൺസ്റ്റബിൾ ജെന്നി നിംസ് മാധ്യമപ്രവർത്തകരോട് പറഞ്ഞു. 

50 injured in car crash during Liverpools Premier League victory celebration