ന്യൂഡൽഹി: യുവ ഗുസ്തിതാരത്തോട് മോശമായി പെരുമാറിയ സംഭവത്തിൽ ഗുസ്തി ഫെഡറേഷൻ മുൻ പ്രസിഡന്റും ബി.ജെ.പി നേതാവുമായ ബ്രിജ് ഭൂഷൻ ശരൺ സിങിനെതിരായ പോക്‌സോ കേസ് അവസാനിപ്പിച്ചു. കേസിൽ ഡൽഹി പൊലിസ് സമർപ്പിച്ച ക്ലോസർ റിപ്പോർട്ട് അംഗീകരിച്ചാണ് അഡിഷണൽ സെഷൻസ് ജഡ്ജി ഗോമതി മനോച കേസ് അവസാനിപ്പിച്ചത്. ഇതോടെ രാജ്യത്തെ പിടിച്ചു കുലുക്കിയ, നീതിതേടിയുള്ള ഗുസ്തി താരങ്ങളുടെ പ്രതിഷേധത്തിന്റെ അടിസ്ഥാനത്തിലെടുത്ത കേസുകളിലൊന്ന് ഇല്ലാതായി.

ലൈംഗികാതിക്രമവുമായി ബന്ധപ്പെട്ട് ഗുസ്തി താരങ്ങൾ ഉന്നയിച്ച പരാതിയുടെ അടിസ്ഥാനത്തിൽ കൊണാട്ട്പ്ലേസ് പൊലിസ് സ്റ്റേഷനിൽ ബ്രിജ്ഭൂഷൻ സിങിനെതിരേ ഇന്ത്യൻ പീനൽ കോഡിലെ വിവിധ വകുപ്പുകൾ ഉൾപ്പെടുത്തിയും പോക്സോ നിയമപ്രകാരവും രണ്ടു വ്യത്യസ്ത എഫ്.ഐ.ആറുകളാണ് രജിസ്റ്റർ ചെയ്തിരുന്നത്. ഏഴു വനിതാ താരങ്ങളാണ് ബ്രിജ്ഭൂഷനെതിരേ മൊഴി നൽകിയത്. അതിലൊരാളായിരുന്നു പ്രായപൂർത്തിയാകാത്ത പെൺകുട്ടി. 2016 നും 2019 നും ഇടയിൽ ഗുസ്തി ഫെഡറേഷന്റെ ഓഫിസ് കൂടിയായി പ്രവർത്തിക്കുന്ന ബ്രിജ്ഭൂഷൻ സിങിന്റെ ഔദ്യോഗിക വസതിയിലും വിദേശത്തും പീഡനം നടന്നതായായിരുന്നു പ്രതിഷേധക്കാരുടെ ആരോപണം.

കായികതാരങ്ങൾ പരാതി നൽകി മാസങ്ങൾ കഴിഞ്ഞിട്ടും പൊലിസ് കേസെടുത്തില്ല. ഇതേത്തുടർന്ന് രാജ്യത്തിനുവേണ്ടി അന്താരാഷ്ട്ര വേദികളിൽ മെഡൽ നേടിയ താരങ്ങളായ വിനേഷ് ഫൊഗട്ട്, സാക്ഷി മല്ലിക്ക് തുടങ്ങിയവരുടെ നേതൃത്വത്തിൽ ഡൽഹി ജന്തർ മന്ദറിൽ സമരം തുടങ്ങി. ആഴ്ചകളോളം പ്രതിഷേധം തുടർന്നതിനാൽ ഇക്കാര്യം അന്വേഷിക്കാൻ കായിക മന്ത്രാലയം മേൽനോട്ട സമിതിയെ നിയോഗിച്ചു. 2023 മെയിൽ താരങ്ങൾ സുപ്രിംകോടതിയെ സമീപിക്കുകയും കോടതിയുടെ ഇടപെടലിനെത്തുടർന്ന് പൊലിസ് എഫ്.ഐ.ആർ രജിസ്റ്റർ ചെയ്യുകയും ചെയ്തു.

ജൂണിൽ റൗസ് അവന്യൂ കോടതിയിൽ 1,000 പേജുള്ള കുറ്റപത്രം സമർപ്പിച്ചു. എഫ്.ഐ.ആർ സമർപ്പിച്ച് ആഴ്ചകൾക്കുള്ളിൽ 2023 ജൂണിൽ പ്രായപൂർത്തിയാകാത്ത പെൺകുട്ടി മൊഴി മാറ്റി. ഇതോടെ പൊലിസ് അന്വേഷണം നടത്തുകയും കേസ് അവസാനിപ്പിക്കാൻ റിപ്പോർട്ട് നൽകുകയുമായിരുന്നു. ഡൽഹി പൊലിസ് അന്വേഷണത്തിൽ താൻ തൃപ്തയാണെന്നും ക്ലോഷർ റിപ്പോർട്ടിനെ എതിർക്കുന്നില്ലെന്നുമായിരുന്നു പെൺകുട്ടിയുടെ മൊഴി.