വാഷിങ്ടണ്‍: വിദേശ വിദ്യാര്‍ഥികള്‍ക്ക് മേല്‍ കൂടുതല്‍ നിയന്ത്രണങ്ങള്‍ ഏര്‍പ്പെടുത്താന്‍ തീരുമാനിച്ച് യുഎസ്. അമേരിക്കന്‍ യൂണിവേഴ്‌സിറ്റികളിലേക്ക് പഠനാവശ്യത്തിന് അപേക്ഷ നല്‍കിയ വിദേശ വിദ്യാര്‍ഥികളുടെ വിസ ഇന്റര്‍വ്യൂകള്‍ നിര്‍ത്തിവെക്കാനാണ് പുതിയ തീരുമാനം. സ്റ്റുഡന്റ് വിസയില്‍ രാജ്യത്തെത്തുന്നവരുടെ സമൂഹമാധ്യമ ഇടപെടലുകള്‍ നിരീക്ഷിക്കുന്നതിനാണ് പുതിയ നടപടിയെന്ന് മാധ്യമങ്ങള്‍ റിപ്പോര്‍ട്ട് ചെയ്തു. 

എഫ്, എം, ജെ വിസകള്‍ക്കുള്ള അപേക്ഷകര്‍ക്കുള്ള വിസ ഇന്റര്‍വ്യൂകളാണ് നിര്‍ത്തിവെച്ചത്. നിലവില്‍ ഇന്റര്‍വ്യൂ ലെറ്റര്‍ വന്നിട്ടുള്ളവരെ നടപടി ബാധിക്കില്ല. യുഎസ് വിദേശകാര്യ സെക്രട്ടറി മാര്‍ക്കോ റൂബിയോ കോണ്‍സുലേറ്റുകള്‍ക്കയച്ച ഉത്തരവിലാണ് നിര്‍ദേശമുള്ളത്. അധികാരമേറ്റതിന് പിന്നാലെ അമേരിക്കന്‍ യൂണിവേഴ്‌സിറ്റികള്‍ക്ക് മേല്‍ ട്രംപ് ഭരണകൂടം നടത്തുന്ന അടിച്ചമര്‍ത്തലുകളുടെ ഭാഗമാണ് പുതിയ നീക്കം.

നേരത്തെ അമേരിക്കയിലെ പ്രശസ്തമായ ഹാര്‍വാര്‍ഡ് യൂണിവേഴ്‌സിറ്റിക്ക് മേല്‍ ട്രംപ് കൊണ്ടുവന്ന നിയന്ത്രണങ്ങള്‍ വലിയ വിവാദങ്ങള്‍ക്ക് കാരണമായിരുന്നു. യൂണിവേഴ്‌സിറ്റിയിലെ വിദേശ വിദ്യാര്‍ഥികള്‍ക്ക് വിലക്കേര്‍പ്പെടുത്തുകയും, നിലവില്‍ പഠിക്കുന്നവര്‍ മറ്റ് യൂണിവേഴ്‌സിറ്റികളിലേക്ക് മാറണമെന്ന് നിര്‍ദേശിക്കുകയും ചെയ്തിരുന്നു. അല്ലാത്തപക്ഷം സ്റ്റുഡന്റ് വിസകള്‍ റദ്ദാക്കുമെന്നായിരുന്നു ഭീഷണി. എന്നാല്‍ ട്രംപിനെതിരെ യൂണിവേഴ്‌സിറ്റി അധികൃതര്‍ ഫെഡറല്‍ കോടതിയെ സമീപിക്കുകയും, കോടതി സര്‍ക്കാരിന്റെ നടപടി താല്‍ക്കാലികമായി തടയുകയും ചെയ്തിരുന്നു. ഇതിന് പ്രതികാരമെന്നോണം യൂണിവേഴ്‌സിറ്റിക്കുള്ള പത്ത് കോടി ഡോളറിന്റെ കരാറുകള്‍ റദ്ദാക്കി ട്രംപ് ഭരണകൂടം ഫെഡറല്‍ ഏജന്‍സികള്‍ക്ക് നിര്‍ദേശം നല്‍കിയിരുന്നു.

trump suspended visa interviews for foreign students tightens restrictions against students