മാനന്തവാടി: വയനാട് മാനന്തവാടി അപ്പപ്പാറയിൽ ഒ​ന്നി​ച്ചു​ക​ഴി​ഞ്ഞിരുന്ന യുവതിയെ കൊലപ്പെടുത്തിയ കേസിലെ പ്രതി പി​ലാ​ക്കാ​വ് ത​റ​യി​ൽ ദിലീഷിനെതിരെ പോക്സോ കേസ് ചുമത്തി. യുവതിയുടെ അടുത്ത ബന്ധുവായ 14കാരിയെ ലൈംഗികമായി പീഡിപ്പിച്ചതിനാണ് പോക്സോ കേസ് ചുമത്തിയത്. കൊലപാതകം, തട്ടിക്കൊണ്ടുപോകൽ വകുപ്പുകൾക്ക് പുറമേയാണ് ഈ വകുപ്പും ചുമത്തിയത്.

പ്രതി കുറ്റസമ്മതം നടത്തിയതായി പൊലീസ് അറിയിച്ചു. പ്രതിയെ ഇന്ന് കൽപ്പറ്റ പോക്സോ കോടതിയിൽ ഹാജരാക്കും. കഴിഞ്ഞ ദിവസമാണ് പ്രതി ഒപ്പം താമസിച്ചിരുന്ന സ്ത്രീയെ വെട്ടി കൊലപ്പെടുത്തിയത്. മൂത്ത പെൺകുട്ടിയെയും പ്രതി വെട്ടിപരിക്കേൽപ്പിച്ചിരുന്നു. ഇതിന് ശേഷം കാണാതായ ഇളയകുട്ടിയെയും പ്രതിയെയും പിന്നീട് പൊലിസ് പിടികൂടുകയായിരുന്നു. രാത്രി മുഴവൻ നീണ്ട തിരച്ചിലിനൊടുവിൽ പിറ്റേന്ന് രാവിലെ അടുത്തുള്ള തോട്ടത്തിൽ നിന്നും കണ്ടെത്തുകയായിരുന്നു.

അപ്പാപ്പാറയിലെ എസ്റ്റേറ്റിലെ വീടിന് സമീപമുള്ള വനമേഖലയിൽ നിന്നാണ് പ്രതി ദിലീഷിനെ പൊലിസ് പിടികൂടിയത്. യുവതിയുടെ കാണാതായ കുഞ്ഞിനെയും പ്രതിക്കൊപ്പം പൊലിസ് കണ്ടെത്തി. കൊല നടത്തിയശേഷം പ്രതി ഒമ്പതുവയസുകാരിയെ തട്ടിക്കൊണ്ടുപോവുകയായിരുന്നു. കുഞ്ഞിനെ കണ്ടെത്തുന്നതിനായി ഡ്രോണ്‍ പരിശോധന അടക്കം നടത്തിയിരുന്നു. 

ഞായറാഴ്‌ച രാത്രിയായിരുന്നു മാനന്തവാടിയ്ക്കടുത്ത് അപ്പപ്പാറയിലെ വാകേരി മേഖലയിൽ അതിക്രൂരമായ കൊലപാതകം നടന്നത്. എടയൂർക്കുന്ന് സ്വദേശിനിയായ അപർണ (36) യെയാണ് ജീവിത പങ്കാളിയായ ദിലീഷ് കുത്തി കൊലപ്പെടുത്തിയത്.