മുംബൈ: ഓപ്പറേഷന്‍ സിന്ദൂറിനെ വിമര്‍ശിച്ച് സമൂഹമാധ്യമത്തില്‍ പോസ്റ്റിട്ടതിന് വിദ്യാര്‍ഥിനിയെ അറസ്റ്റ് ചെയ്ത സംഭവത്തില്‍ മഹാരാഷ്ട്ര സര്‍ക്കാരിനെതിരേ രൂക്ഷ വിമര്‍ശനവുമായി ഹൈക്കോടതി.  ഗുരുതരമായ ക്രിമിനല്‍ കുറ്റം ചെയ്തയാളെപോലെയാണ് വിദ്യാര്‍ഥിനിയെ പൊലിസ് കൈകാര്യം ചെയ്തതെന്നും ഇത് ഞെട്ടിക്കുന്നതാണെന്നും ജസ്റ്റിസുമാരായ ഗൗരി ഗോഡ്‌സെ, സോമശേഖര്‍ സുന്ദരേശന്‍ എന്നിവരടങ്ങിയ അവധിക്കാല ബെഞ്ച് വ്യക്തമാക്കി.

താനെയിലെ സ്വകാര്യ എഞ്ചിനീയറിങ് കോളജിലെ രണ്ടാം വര്‍ഷ ഐ.ടി വിദ്യാര്‍ഥിയായ ഖദീജ ഷെയ്ഖിന്റെ(19) ജാമ്യാപേക്ഷ അനുവദിച്ചുകൊണ്ടാണ് ഹൈക്കോടതി പൊലിസിനെയും സംസ്ഥാന സർക്കാരിനെയും വിമര്‍ശിച്ചത്. പുനെയിലെ യെര്‍വാഡ സെന്‍ട്രല്‍ ജയിലില്‍ കഴിയുന്ന വിദ്യാര്‍ഥിനിയെ ഉടന്‍ മോചിപ്പിക്കാനും ഹൈക്കോടതി ഉത്തരവിട്ടു.

തനിക്ക് സംഭവിച്ച തെറ്റ് തിരിച്ചറിയുകയും തിരുത്തി ക്ഷമാപണം നടത്തുകയും ചെയ്തിട്ടും പൊലിസും കോളജ് അധികൃതരും കുട്ടിയെ കുറ്റവാളിയാക്കാന്‍ ശ്രമിച്ചതായി ഹൈക്കോടതി പറഞ്ഞു. വിദ്യാര്‍ഥിനി പഠിക്കുന്ന കോളജ്  ഗുരുതരമായ വീഴ്ച വരുത്തിയതായും കോടതി പറഞ്ഞു.

ഹിന്ദുത്വ സംഘടനകളുടെ പരാതിയില്‍ 9നാണ് പൂനെ പൊലിസ് ഖദീജ ഷെയ്ഖിനെ അറസ്റ്റ് ചെയ്തത്. മറ്റൊരാളുടെ പോസ്റ്റ് തന്റെ അക്കൗണ്ടില്‍ ഷെയര്‍ ചെയ്യുകയായിരുന്നു. പ്രതിഷേധം ഉയര്‍ന്നതോടെ ക്ഷമാപണം നടത്തി പോസ്റ്റ് പിന്‍വലിക്കുകയും ചെയ്തു. എന്നാല്‍, പൊലിസും കൊളജ് അധികൃതരും കര്‍ശന നടപടി സ്വീകരിക്കുകയായിരുന്നു. കോളജില്‍ നിന്ന് പുറത്താക്കിയ കുട്ടിയെ പരീക്ഷ എഴുതുന്നതിന് വിലക്കുകയും ചെയ്തു. ഇത് ചോദ്യം ചെയ്ത് സമര്‍പ്പിച്ച ഹര്‍ജിയിലാണ് ഹൈക്കോടതി ജാമ്യം അനുവദിച്ച് പരീക്ഷ എഴുതാനുള്ള സൗകര്യം ഒരുക്കണമെന്നു നിര്‍ദേശം നല്‍കിയത്.