ബെംഗളൂരു: നടനും രാഷ്ട്രീയക്കാരനുമായ കമൽ ഹാസന്റെ "കന്നഡ തമിഴിൽ നിന്നാണ് ഉണ്ടായത്"എന്ന വിവാദ പരാമർശത്തിനെതിരെ കർണാടകയിൽ കന്നഡ അനുകൂല സംഘടനകൾ പ്രതിഷേധവുമായി രംഗത്ത്. സംഭവത്തിൽ കമൽ ഹാസനോട് കർണാടക ബിജെപി അധ്യക്ഷൻ ബി.വൈ. വിജയേന്ദ്ര നിരുപാധികം മാപ്പ് ആവശ്യപ്പെട്ടു."കന്നഡയ്ക്ക് ആയിരക്കണക്കിന് വർഷത്തെ ചരിത്രമുണ്ട്. കമലിന് അത് അറിയില്ല." വിജയേന്ദ്ര ആരോപിച്ചു. കർണാടക രക്ഷണ വേദികെ എന്ന കന്നട സംഘടന ബെംഗളൂരു പൊലീസിൽ പരാതി നൽകി, 'തഗ് ലൈഫ്' സിനിമയുടെ റിലീസിന് വിലക്ക് ആലോചിക്കുന്നതായി ഫിലിം അസോസിയേഷൻ അറിയിച്ചു.

കമൽ ഹാസൻ വിശദീകരണവുമായി രംഗത്തെത്തി. "എന്റെ വാക്കുകൾ സ്നേഹത്തോടെയാണ് പറഞ്ഞത്. ഭാഷാ വിഷയങ്ങൾ രാഷ്ട്രീയക്കാർ ചർച്ച ചെയ്യേണ്ട; അത് ഭാഷാശാസ്ത്രജ്ഞർക്കും ചരിത്രകാരന്മാർക്കും വിടണം," അദ്ദേഹം പറഞ്ഞു. "നോർത്ത് ഇന്ത്യൻ വീക്ഷണത്തിൽ അവർ ശരി, കന്യാകുമാരിയിൽ നിന്ന് നോക്കിയാൽ ഞാൻ ശരി. ഭാഷാശാസ്ത്രജ്ഞർ ഇരുവരും ശരിയാണെന്ന് പറയും," അദ്ദേഹം കൂട്ടിച്ചേർത്തു.

ചൊവ്വാഴ്ച ബെംഗളൂരുവിൽ 'തഗ് ലൈഫ്' എന്ന സിനിമയുടെ പ്രചാരണത്തിനിടെ, നടൻ ശിവരാജ്കുമാറിനോട് "നിന്റെ ഭാഷ തമിഴിൽ നിന്നാണ് ഉത്ഭവിച്ചത്" എന്ന് കമൽ പറഞ്ഞതാണ് വിവാദത്തിന് തിരികൊളുത്തിയത്. 

കർണാടകയിൽ പ്രകടനങ്ങളും കമലിന്റെ പോസ്റ്ററുകൾ കത്തിക്കലും നടന്നു. "കർണാടകയിൽ ബിസിനസ്സ് ചെയ്യാനും സിനിമ പ്രദർശിപ്പിക്കാനും ആഗ്രഹിക്കുന്നുവെങ്കിൽ കന്നഡയെ അപമാനിക്കുന്നത് നിർത്തണമെന്നും സംഘടന ആവശ്യപ്പെട്ടു.