തിരുവനന്തപുരം:രാജ്ഭവനിലെ കാവിക്കൊടിയേന്തിയ ഭാരതാംബയുടെ ചിത്രം നീക്കില്ലെന്ന ഗവർണറിന്റേ ഉറച്ച നിലപാടിനെതിരെ രാഷ്ട്രീയ പ്രതികരണങ്ങൾ ശക്തമാകുന്നു. ഇക്കാര്യം ചൂണ്ടികാണിച്ച് രാഷ്ട്രപതിക്ക് കത്തയച്ച് ഗവർണറെ തിരിച്ചുവിളിക്കണമെന്ന് സിപിഐ ആവശ്യപ്പെട്ടു. പ്രതിഷേധത്തിന്റെ ഭാഗമായി നാളെ രാജ്യവ്യാപകമായി സിപിഐയുടെ എല്ലാ ബ്രാഞ്ചുകളിലും ദേശീയ പതാക ഉയർത്തിയും വൃക്ഷത്തൈകൾ നട്ടും പ്രതിഷേധം നടത്തും.

ഭാരതത്തിന്റെ പ്രതീകമായി ദേശീയ പതാകയാണ് വേണ്ടതെന്ന് വ്യക്തമാക്കിയ സിപിഐ, രാജ്ഭവനിലെ ചിത്രത്തെ ആർഎസ്എസ്സിന്റെ സൈദ്ധാന്തിക സമീപനങ്ങളുടെ പ്രകടനമെന്ന് വിമർശിച്ചു. പാർലമെന്റ് അംഗവും സിപിഐ നേതാവുമായ സന്തോഷ് കുമാറാണ് ഗവർണർക്കെതിരെ കത്ത് നൽകിയത്.

ഇതിനെ തുടർന്ന് ഇടത് മുന്നണിയിലെ വിവിധ നേതാക്കൾ ഗവർണർക്കെതിരെ തുറന്നടിച്ചപ്പോഴും മുഖ്യമന്ത്രി പിണറായി വിജയൻ വിവാദത്തിൽ മൗനം പാലിക്കുകയാണ്. ഗുരുമൂർത്തിയെ രാജ്ഭവനിൽ ക്ഷണിച്ച വിഷയത്തിൽ പോലും മുഖ്യമന്ത്രിയുടെ പ്രതികരണം വൈകിയതായും, രേഖാമൂലം എതിർപ്പ് അറിയിച്ചില്ലെന്നും വിമർശനം ഉയരുന്നു.

മുഖ്യമന്ത്രി ഗവർണറോട് മൃദുസമീപനമാണ് പുലർത്തുന്നതെന്ന് പ്രതിപക്ഷം ആരോപിക്കുന്നു. ഗവർണർക്കെതിരെ മുഖ്യമന്ത്രിയുടെയും സർക്കാരിന്റെയും നിലപാട് അവശ്യമായിരിക്കുമ്പോഴും അതിന് മുഖ്യമന്ത്രി തയ്യാറാകുന്നില്ലെന്ന് ആരോപണമുണ്ട്. അതേസമയം, “സർക്കാർ അനാവശ്യമായി വിവാദം സൃഷ്ടിക്കുകയാണെന്ന്” രാജ്ഭവൻ പ്രതികരിച്ചു.

The CPI has demanded the removal of a Bharatamba picture with a saffron flag from Raj Bhavan and urged the President to recall the Kerala Governor. Protests will be held across CPI branches with national flags and tree planting. While Left leaders criticize the Governor, Chief Minister Pinarayi Vijayan remains silent. Raj Bhavan says the controversy is unnecessary and the picture will not be removed.