2025 ഫിഫ ക്ലബ് ലോകകപ്പിൽ ലയണൽ മെസിയുടെ ഇന്റർ മയാമിയും മത്സരിക്കുന്നുണ്ട്. ഈ സമ്മറിൽ വളരെ വിപുലീകരിച്ച ഒരു ഫോർമാറ്റിലാണ് ക്ലബ് വേൾഡ് കപ്പ് നടക്കുന്നത്. ഗ്രൂപ്പ് ഘട്ടത്തിൽ റയൽ മാഡ്രിഡ്, ബോക്ക ജൂനിയേഴ്‌സ്, അൽ-ഹിലാൽ, വൈഡാഡ് എസി തുടങ്ങി നിരവധി ടീമുകളും മത്സരിക്കുന്നുണ്ട്. ഇപ്പോൾ ഈ ടൂർണമെന്റിൽ ഇന്റർ മയാമിയെ ഉൾപ്പെടുത്തിയതിനെ കാരണത്തെക്കുറിച്ച് സംസാരിക്കുകയാണ് മുൻ അർജന്റൈൻ താരം സെർജിയോ അഗ്യൂറോ. ഫിഫക്ക് നൽകിയ അഭിമുഖത്തിലാണ് മുൻ അർജന്റൈൻ താരം ഇക്കാര്യം പറഞ്ഞത്. 

''ഫിഫ ക്ലബ് ലോകകപ്പ് ഇന്റർ മയാമിക്ക് ഇത് വളരെ പ്രധാനപ്പെട്ട ഒന്നാണെന്ന് ഞാൻ കരുതുന്നു. പ്രത്യേകിച്ച് മെസി അവിടെ ഉള്ളതിനാൽ ഇന്റർ മയാമിയെ ഉൾപ്പെടുത്തേണ്ടത് വളരെ പ്രധാനമാണെന്ന് ഞാൻ കരുതുന്നു. ടൂർണമെന്റിൽ കളിക്കുന്ന മറ്റുള്ള ടീമുകൾക്ക് ഇത് വേദനാജനകമാണെങ്കിലും എല്ലാ ആളുകളും കാണാൻ ആഗ്രഹിക്കുന്ന കളിക്കാരിൽ ഒരാളാണ് അദ്ദേഹം'' 

2023ലാണ് മെസി പാരീസ് സെയ്ന്റ് ജെർമെയ്ൻ വിട്ട് മേജർ ലീഗിലേക്ക് പോയത്. മെസിയുടെ വരവോടെ ഇന്റർ മയാമി വേണ്ടി മിന്നും പ്രകടനമാണ് നടത്തിയിരുന്നത്. ക്ലബ്ബിന്റെ ചരിത്രത്തിൽ ഇതുവരെ ഇല്ലാതിരുന്ന ലീഗ്‌സ് കപ്പ് കിരീടവും മെസിയുടെ നേതൃത്വത്തിൽ ആണ് മയാമി സ്വന്തമാക്കിയത്. ഇതിന് പുറമെ സപ്പോർട്ടേഴ്‌സ് ഷീൽഡും മയാമി സ്വന്തമാക്കി. 

മേജർ ലീഗ് സോക്കറിൽ ഈ സീസണിലും ഇന്റർ മയാമിക്കൊപ്പം മികച്ച പ്രകടനനങ്ങളാണ് മെസി നടത്തിക്കൊണ്ടിരിക്കുന്നത്.എംഎൽഎസ്സിൽ മോൺഡ്രിയലിനെതിരെയുള്ള മത്സരത്തിൽ ഇരട്ട ഗോൾ നേടി മെസി തിളങ്ങിയിരുന്നു. ഈ മികച്ച പ്രകടനങ്ങൾക്ക് പിന്നാലെ മെസി ഒരു പുതിയ നേട്ടവും കൈവരിച്ചിരുന്നു. ഇന്റർ മയാമിക്ക് വേണ്ടി 50 ഗോൾ കോൺട്രിബ്യൂഷൻ നടത്തുന്ന ആദ്യ താരമായി മാറിയാണ് മെസി പുതിയ റെക്കോർഡ് സ്വന്തമാക്കിയത്.

നിലവിൽ മേജർ ലീഗ് സോക്കറിന്റെ പോയിന്റ് പട്ടികയിൽ മൂന്നാം സ്ഥാനത്താണ് മെസിയും സംഘവും. 16 മത്സരങ്ങളിൽ നിന്നും എട്ട് വിജയവും അഞ്ച് സമനിലയും മൂന്ന് തോൽവിയും അടക്കം 29 പോയിന്റാണ് ഇന്റർ മയാമിക്കുള്ളത്. ജൂൺ 15നാണ് ഫിഫ ക്ലബ് ലോകകപ്പിലെ ഇന്റർ മയാമിയുടെ ആദ്യ മത്സരം. അൽ അഹ്ലിയെയാണ് മയാമി നേരിടുക. 

Former Argentina star Sergio Aguero talks about the reason behind Inter Miamis inclusion in the 2025 FIFA Club World Cup