ഇടുക്കി: മണ്ടൻമേട് മയിലാടുംപായിൽ കുഴിയിൽ വീണ കടുവയെ മയക്കുവെടിവെച്ച് പിടികൂടി. സ്വകാര്യ വ്യക്തിയുടെ ഏലംത്തോട്ടത്തിലെ കുഴിയിൽ ആണ് കടുവ വീണത്. കടുവയ്ക്കൊപ്പം കുഴിയിൽ നായയും വീണിരുന്നു. കടുവയെയും നായയെയും ഒരുമിച്ചാണ് പുറത്തെത്തിച്ചത്. പരിശോധനകൾക്ക് ശേഷം കടുവയെ പെരിയാർ വനത്തിൽ തുറന്നു വിടുകയായിരുന്നു. 

രാവിലെ ഏഴരയോടെ ഏലം തോട്ടത്തിൽ എത്തിയ തൊഴിലാളികൾ നായയുടെ കരച്ചിൽ കേട്ട് കുഴി നോക്കുകയായിരുന്നു. ഈ സമയം നായക്കൊപ്പം കടുവയും ഉണ്ടെന്നു കണ്ടെത്തിയോടെ ഈ വിവരം വനം വകുപ്പ് ഉദ്യോഗസ്ഥരെ അറിയിക്കുകയായിരുന്നു.

വനം വകുപ്പ് ഉദ്യോഗസ്ഥർ സ്ഥലത്തെത്തി കുഴിയുടെ മുകൾവശം മൂടുകയും പെരിയാർ കടുവ സങ്കേതത്തിൽ നിന്നുള്ള വെറ്റിനറി ഡോക്ടർ അടങ്ങുന്ന സംഘം പ്രദേശത്ത് എത്തി രണ്ട് ഡോസ് മയക്കുവെടി വെക്കുകയും ആയിരുന്നു. കടുവയ്ക്ക് പുറമേ നായക്കും മയക്കു വെടിവെച്ചു. തുടർന്ന് ഒന്നര മണിക്കൂർ കൊണ്ട് മയങ്ങിയ കടുവയെയും നായയെയും പുറത്തെത്തിക്കുകയായിരുന്നു. 

മയിലാടുംപായിൽ കടുവയുടെ സാന്നിധ്യം മുമ്പ് ഉണ്ടായിട്ടില്ല എന്നാണ് നാട്ടുകാർ പറയുന്നത്. ഏലംകൃഷി കൂടുതലുള്ള മേഖലയാണെങ്കിലും ഒരു ജനവാസ മേഖല കൂടിയാണ് ഇവിടം. പരിശോധനകൾക്ക് ശേഷം ആവശ്യമായ ചികിത്സ നൽകി കടുവയെ പെരിയാർ കടുവ സങ്കേതത്തിലേക്ക് എത്തിച്ചു തുറന്നു വിടുകയായിരുന്നു. കുഴിയിൽ കടുവയ്ക്കൊപ്പം നായയും ഉണ്ടായിരുന്നതിനാൽ പേവിഷബാധ വാക്സിൻ ഉൾപ്പെടെ കൊടുത്തതിനുശേഷം ആണ് കടുവയെ വനത്തിലേക്ക് തുറന്നു വിട്ടത്.

A tiger that fell into a pit in Elam plantation in Idukki was caught with a tranquilizer gun