ന്യൂഡൽഹി: ഡൽഹിയിലെ നെഹ്‌റു വിഹാറിൽ ഒൻപത് വയസുകാരിയെ ക്രൂരമായി ബലാത്സംഗം ചെയ്ത് കൊലപ്പെടുത്തി മൃതദേഹം സ്യൂട്ട്കേസിൽ ഉപേക്ഷിച്ച സംഭവം നാടിനെ നടുക്കി. കഴിഞ്ഞ ദിവസം നടന്ന ഈ ദാരുണ സംഭവത്തിൽ ദയാൽപൂർ പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.

ബന്ധുവിന്റെ വീട്ടിലേക്ക് പോയ പെൺകുട്ടി നിശ്ചിത സമയം കഴിഞ്ഞിട്ടും തിരിച്ചെത്താത്തതിനെ തുടർന്ന് ബന്ധുക്കൾ നടത്തിയ അന്വേഷണത്തിലാണ് ‍മ‍ൃതദേഹം കണ്ടെത്തിയത്. കുട്ടി ഒരു വീട്ടിലേക്ക് കയറിപ്പോകുന്നത് കണ്ടതായി നാട്ടുകാർ വിവരം ബന്ധുക്കൾക്ക് നൽകി. എന്നാൽ, ബന്ധുക്കൾ എത്തിയപ്പോൾ വീട് പൂട്ടിയ നിലയിലായിരുന്നു. വീടിന്റെ കതക് പൊളിച്ച് അകത്ത് കയറിയപ്പോൾ, ഒരു സ്യൂട്ട്കേസിൽ നിന്ന് രക്തം ഒഴുകുന്നത് ശ്രദ്ധയിൽപ്പെട്ടു. സ്യൂട്ട്കേസ് തുറന്ന് പരിശോധിച്ചപ്പോൾ പെൺകുട്ടിയെ അബോധാവസ്ഥയിൽ കണ്ടെത്തുകയായിരുന്നു. ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

ഡോക്ടർമാരുടെ പരിശോധനയിൽ പെൺകുട്ടിയുടെ മുഖത്ത് ഉൾപ്പെടെ ഗുരുതരമായ പരുക്കുകൾ കണ്ടെത്തി. ഫോറൻസിക് വിഭാഗം സംഭവസ്ഥലത്ത് നിന്ന് തെളിവുകൾ ശേഖരിച്ചു. കൊലപാതകം, ബലാത്സംഗം തുടങ്ങിയ വകുപ്പുകൾ ചുമത്തി പൊലീസ് കേസെടുത്തു. സിസിടിവി ദൃശ്യങ്ങൾ പരിശോധിച്ച് പ്രതികളെ കണ്ടെത്താൻ ഒന്നിലധികം സംഘങ്ങളെ വിന്യസിച്ചതായി പൊലീസ് അറിയിച്ചു.

ALSO READ: ചികിത്സയ്ക്കെത്തിയ വിദ്യാർഥിനിയെ കെട്ടിയിട്ട് പീഡിപ്പിക്കാൻ ശ്രമം; ഫിസിയോ തെറാപ്പിസ്റ്റ് അറസ്റ്റിൽ; സെന്റർ പ്രവർത്തിക്കുന്നത് ലൈസൻസില്ലാതെയെന്ന് ആരോപണം

സംഭവത്തിൽ ഡൽഹി മുൻ മുഖ്യമന്ത്രി അരവിന്ദ് കെജ്‌രിവാൾ ബിജെപി സർക്കാരിനെതിരെ രൂക്ഷ വിമർശനവുമായി രംഗത്തെത്തി. "ഒൻപത് വയസുകാരിയെ ബലാത്സംഗം ചെയ്ത് കൊലപ്പെടുത്തിയ സംഭവം എല്ലാവരെയും ഞെട്ടിച്ചിരിക്കുന്നു. ബിജെപി ഭരണത്തിൽ ഡൽഹിയിലെ ക്രമസമാധാന നില തകർന്നിരിക്കുകയാണ്. നമ്മുടെ പെൺമക്കൾ സുരക്ഷിതരല്ല. ഇതിന് കേന്ദ്ര ആഭ്യന്തര മന്ത്രി അമിത് ഷാ ഉത്തരം പറയണം," അദ്ദേഹം ആവശ്യപ്പെട്ടു. ക്രൈം, ഫോറൻസിക് സയൻസ് ലബോറട്ടറി സംഘങ്ങൾ സംഭവസ്ഥലം വിശദമായി പരിശോധിച്ചു. പ്രതികളെ ഉടൻ പിടികൂടുമെന്ന് പൊലീസ് ഉറപ്പ് നൽകി.