തിരുവനന്തപുരം: തെരഞ്ഞെടുപ്പ് ചൂടുപിടിക്കുന്ന നിലമ്പൂരിലേക്ക് ആശ വര്‍ക്കര്‍മാരും. സമരത്തെ അപമാനിച്ചവര്‍ക്ക് വോട്ടില്ല എന്ന മുദ്രാവാക്യം ഉയര്‍ത്തി പ്രചാരണം നടത്തുന്നതിനാണ് വേതനവര്‍ധനവടക്കമുള്ള ആവശ്യം ഉന്നയിച്ച് സമരം ചെയ്യുന്ന ആശ വര്‍ക്കര്‍മാര്‍ നിലമ്പൂരിലെത്തുന്നത്. ഈമാസം 12 നാണ് ഇവര്‍ നിലമ്പൂരിലെത്തുന്നത്. ആശാ വര്‍ക്കേഴ്‌സ് സംസ്ഥാന വൈസ് പ്രസിഡന്റ് എസ്.മിനിയുടെ നേതൃത്വത്തില്‍ വീടുകയറിയായിരിക്കും പ്രചാരണം.

ഓണറേറിയം വര്‍ധന, പെന്‍ഷന്‍ ആനുകൂല്യങ്ങള്‍ ഉള്‍പ്പടെയുള്ള ആവശ്യങ്ങള്‍ ഉന്നയിച്ചാണ് ആശമാര്‍ സമരം നടത്തുന്നത്. ഓണറേറിയം വര്‍ദ്ധിപ്പിക്കുന്നതിനെ സംബന്ധിച്ച് പഠിക്കാന്‍ സര്‍ക്കാര്‍ സമിതിയെ നിയോഗിച്ചിരുന്നു. മൂന്നുമാസം കൊണ്ട് റിപ്പോര്‍ട്ട് സമര്‍പ്പിക്കാനാണ് നിര്‍ദ്ദേശം നല്‍കിയത്. എന്നാല്‍  ഒരുമാസം കൊണ്ട് പഠനം പൂര്‍ത്തിയാക്കാന്‍ ആശമാര്‍ ആവശ്യം ഉന്നയിച്ചു. ഇതിന് സര്‍ക്കാര്‍ വഴങ്ങിയിരുന്നില്ല. ചര്‍ച്ച കഴിഞ്ഞ് ഒരു മാസത്തിനുശേഷമാണ് സമിതിയെ നിയോഗിച്ചത് പോലും. 

അതേസമയം, ആശാ സമരത്തിന്റെ നാലാം ഘട്ടമായ 'രാപകല്‍ സമരയാത്ര' പത്തനംതിട്ട ജില്ലയിലെത്തിയിട്ടുണ്ട്. കാസര്‍കോട്ട് ആരംഭിച്ച 45 ദിവസം നീണ്ടുനില്‍ക്കുന്ന സമരയാത്ര ജൂണ്‍ 17 ന് തിരുവനന്തപുരത്താണ് സമാപിക്കുന്നത്.