കഴിഞ്ഞ ഒരാഴ്ചക്കാലയളവില്‍ സഊദിയില്‍ 11657 പേരെ അറസ്റ്റ് ചെയ്തതായി അധികൃതര്‍ അറിയിച്ചു. 2025 മെയ് 29 മുതല്‍ ജൂണ്‍ നാല് വരെയുള്ള കാലയളവില്‍ രാജ്യത്ത് നടത്തിയ പ്രത്യേക റെയ്ഡുകളില്‍ റെസിഡന്‍സി നിയമങ്ങള്‍ ലംഘിച്ചവരെയും, അനധികൃത തൊഴിലാളികളെയും, കുടിയേറ്റ നിയമങ്ങള്‍ ലംഘിച്ചവരെയും, അതിര്‍ത്തി സുരക്ഷാ ലംഘനം നടത്തിയവരെയുമാണ് പിടികൂടിയത്.

2025 ജൂണ്‍ 7ന് സഊദി ആഭ്യന്തര മന്ത്രാലയം നല്‍കിയ വിവരമനുസരിച്ച്, റെസിഡന്‍സി നിയമലംഘനത്തിന് 6,981 പേരെയും തൊഴില്‍ നിയമങ്ങള്‍ ലംഘിച്ചതിന് 1,486 പേരെയും അതിര്‍ത്തി സുരക്ഷാ ലംഘനങ്ങള്‍ക്ക് 3,190 പേരെയും അറസ്റ്റ് ചെയ്തിട്ടുണ്ട്.

വിദേശികളുടെ താമസ, തൊഴില്‍ ലംഘനങ്ങള്‍ കണ്ടെത്തുന്നതിനായി സഊദി ആഭ്യന്തര മന്ത്രാലയം നിരന്തരം പ്രത്യേക പരിശോധനകള്‍ നടത്തുന്നുണ്ട്. ഇത്തരം കേസുകള്‍ റിപ്പോര്‍ട്ട് ചെയ്യാന്‍ പൊതുജനങ്ങള്‍ക്ക് നിര്‍ദേശം നല്‍കിയിട്ടുണ്ട്. മക്ക, റിയാദ് എന്നിവിടങ്ങളില്‍ നിന്നുള്ളവര്‍ 911 എന്ന നമ്പറിലും മറ്റ് പ്രദേശങ്ങളില്‍ നിന്നുള്ളവര്‍ 999 എന്ന നമ്പറിലും നിയമലംഘനങ്ങള്‍ റിപ്പോര്‍ട്ട് ചെയ്യണമെന്ന് അധികൃതര്‍ അറിയിച്ചു.

അതേസമയം, രാജ്യത്ത് നുഴഞ്ഞുകയറാന്‍ ശ്രമിക്കുന്നവര്‍ക്ക് സഹായം നല്‍കുന്നത് ഗുരുതരമായ കുറ്റമാണെന്ന് സഊദി ആഭ്യന്തര മന്ത്രാലയം നേരത്തെ തന്നെ അറിയിച്ചിരുന്നു. അനധികൃതമായി കുടിയേറ്റക്കാര്‍ക്ക് യാത്രാ സൗകര്യങ്ങള്‍ ഒരുക്കുക, താവളം നല്‍കുക, മറ്റു സേവനങ്ങള്‍ വാഗ്ദാനം ചെയ്യുക തുടങ്ങിയ പ്രവൃത്തികള്‍ നിയമവിരുദ്ധമായി കണക്കാക്കപ്പെടും. ഇത്തരം കുറ്റകൃത്യങ്ങള്‍ക്ക് പിടിക്കപ്പെടുന്നവര്‍ക്ക് 15 വര്‍ഷം വരെ തടവുശിക്ഷയോടൊപ്പം ഒരു മില്യണ്‍ റിയാല്‍ (ഏകദേശം 2.2 കോടി രൂപ) പിഴയും ലഭിക്കാനിടയുണ്ടെന്ന് സഊദി അധികൃതര്‍ നേരത്തെ അറിയിച്ചിട്ടുണ്ട്.

Saudi authorities have arrested 11,657 individuals in a week-long nationwide operation targeting residency, labor, and border security violations. The crackdown, conducted from May 29 to June 4, 2025, focused on undocumented workers, residency law violators, and those involved in illegal border crossings. The campaign underscores Saudi Arabia's strict enforcement of immigration and labor regulations.