പതിവിലും നേരത്തെ ഇത്തവണ കാലവർഷം എത്തിയെങ്കിലും ജൂൺ ആദ്യവാരം പിന്നിടുമ്പോൾ മഴ കണക്കുകളിൽ വലിയ കുറവ് രേഖപ്പെടുത്തി. ജൂൺ തുടക്കം മുതൽ ആർത്തുപെയ്യാറുള്ള മഴ ഇത്തവണ സ്‌കൂൾ തുറക്കുന്ന ദിവസം മുതൽ വിട്ടുനിൽക്കുകയാണ്. കേന്ദ്ര കാലാവസ്ഥാ വകുപ്പിന്റെ കണക്കുപ്രകാരം ജൂൺ ഒന്നു മുതൽ എട്ടുവരെയുള്ള ദിവസങ്ങളിൽ 47.5 മില്ലി മീറ്റർ മഴയാണ് കേരളത്തിൽ ലഭിച്ചത്. ഇക്കാലയളവിൽ ലഭിക്കേണ്ടിയിരുന്ന മഴ 144.9 മില്ലി മിറ്റർ ആണ്. ഈ കണക്ക് പ്രകാരം 67 ശതമാനം മഴക്കുറവ് ആണ് കേരളത്തിൽ രേഖപ്പെടുത്തിയത്. 

2025 മെയ് 24 ന് ആണ് ഇത്തവണ കേരളത്തിൽ ശക്തമായ മഴ എത്തിയത്. ജൂൺ ഒന്നുമുതൽ സെപ്തംബർ 30 വരെയാണ് കേരളത്തിൽ കാലവർഷ മഴ കണക്കാക്കുന്നത്. അതിനാൽ മെയിൽ 24 മുതൽ 31 വരെ ലഭിച്ച മഴയെ വേനൽമഴയിലാണ് ഉൾപ്പെടുത്തുക. അതിനാൽ തന്നെ ഇത്തവണ കേരളത്തിൽ കാലവർഷം എത്തിയതായി കണക്കാക്കാൻ ആകില്ല. അതിനാൽ കേരളത്തിൽ വ്യാപകമായി മഴക്കുറവ് ആണ് രേഖപ്പെടുത്തിയത്.

ALSO READ: കേരള തീരത്തെ ചരക്കുകപ്പല്‍ അപകടം: കെസെടുക്കേണ്ടെന്ന സംസ്ഥാന സര്‍ക്കാര്‍ നിലപാടിനൊപ്പം കേന്ദ്രവും

എല്ലാ ജില്ലകളിലും മഴയുടെ കുറവ് രേഖപ്പെടുത്തിയിട്ടുണ്ട്. ഇടുക്കിയിലാണ് ഏറ്റവും കുറവ് മഴ പെയ്തത്. തൊട്ടുപിന്നിൽ വയനാടും തിരുവനന്തപുരവുമാണ്. എന്നാൽ കഴിഞ്ഞ ഏതാനും വർഷങ്ങളായി മഴ ഇത്തരത്തിലാണ് ലഭിക്കുന്നത് എന്നതിനാൽ ആശങ്കപ്പെടേണ്ട സാഹചര്യമില്ല. ജൂൺ ആദ്യ ആഴ്ചയിൽ കേരളത്തിൽ അവസാനമായി അധികമഴ ലഭിച്ചത് 2020 ലാണ്. അന്ന് 169.6 മില്ലി മീറ്റർ മഴ ലഭിച്ചിരുന്നു. അന്ന് ഏറ്റവുമധികം മഴ ലഭിച്ച കോഴിക്കോട് ജില്ലയിൽ 414.8 മില്ലിമീറ്റർ മഴയാണ് ലഭിച്ചത്. 

2021ജൂൺ 3 ന് കാലവർഷം ആരംഭിച്ചപ്പോൾ ആദ്യ ആഴ്ചയിൽ ലഭിച്ചത് 91.2  മില്ലിമീറ്റർ മഴയാണ്. 2022 മെയ് 29 കാലവർഷം എത്തിയെങ്കിലും ആദ്യ ആഴ്ചയിൽ 62.8 മില്ലിമീറ്റർ മഴ മാത്രമാണ് ലഭിച്ചത്. 2023 ൽ കാലവർഷം വൈകി ജൂൺ 8 ന് എത്തിയപ്പോൾ 33.8 മില്ലിമീറ്റർ മഴ കൊണ്ട് ആദ്യ ആഴ്ച കടന്നുപോയി. 2024 ൽ വീണ്ടും കാലവർഷം ഒരുദിവസം നേരത്തെ എത്തി. മെയ് 30 മഴ തുടങ്ങിയെങ്കിലും അളവിൽ കുറവായിരുന്നു. 63.4 മില്ലിമീറ്റർ മഴയാണ് ആകെ ലഭിച്ചത്.

ALSO READ: ഉംറ വിസ നാളെ മുതല്‍ അനുവദിച്ചു തുടങ്ങും; ബുധനാഴ്ച മുതല്‍ ഉംറ നിര്‍വഹിക്കാം

അതേസമയം, ഒരിടവേളയ്ക്ക് ശേഷം സംസ്ഥാനത്ത് വരും ദിവസങ്ങളിൽ മഴ ശക്തമാകുമെന്നാണ് കാലാവസ്ഥ പ്രവചനം. ജൂൺ 10 മുതൽ 12 വരെ വിവിധ ജില്ലകളിൽ യെല്ലോ അലേർട്ട് പ്രഖ്യാപിച്ചു. ജൂൺ 10 ന് പത്തനംതിട്ട, ആലപ്പുഴ, കോട്ടയം, എറണാകുളം ജില്ലകളിൽ യെല്ലോ അലേർട്ട് പ്രഖ്യാപിച്ചിട്ടുണ്ട്. ജൂൺ 11 ന് ആലപ്പുഴ, എറണാകുളം, തൃശൂർ, മലപ്പുറം,കോഴിക്കോട് ജില്ലകളിലും 12 ന് ആലപ്പുഴ, എറണാകുളം, തൃശൂർ, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിലും യെല്ലോ അലേർട്ട് ആണ്.