ന്യൂഡൽഹി: രാജ്യത്തെ എയർ കണ്ടീഷനുകളുടെ ഏറ്റവും കുറഞ്ഞ താപനില 16 ഡിഗ്രിയിൽനിന്ന് 20 ഡിഗ്രി സെൽഷ്യസായി കുറയ്ക്കാൻ കേന്ദ്രം. വൈദ്യുതി ഉപഭോഗം കുറയ്ക്കുകയെന്ന ലക്ഷ്യത്തോടെ പുതുതായി നിർമിക്കുന്ന എ.സികളിൽ കുറഞ്ഞ താപനില 20 ഡിഗ്രി സെൽഷ്യസാക്കാനാണ് കേന്ദ്രം ആലോചിക്കുന്നത്. ഉയർന്ന താപനില 28 ഡിഗ്രി ആക്കും. ഊർജ സംരക്ഷണത്തിനും രാജ്യത്തിന്റെ പവർ ഗ്രിഡിലെ സമ്മർദ്ദം ലഘൂകരിക്കുന്നതിനുമുള്ള നടപടിയാണിതെന്ന് കേന്ദ്ര ഊർജമന്ത്രി മനോഹർ ലാൽ ഖട്ടാർ പറഞ്ഞു.

നിർദേശം പ്രാരംഭ ഘട്ടത്തിലാണെന്നും എന്നാൽ ഗൗരവമായി പരിഗണിക്കുന്നുണ്ടെന്നും മന്ത്രി വ്യക്തമാക്കി. പദ്ധതി വീടുകളിലും ഹോട്ടലുകളിലും കാറുകളിൽ ഉപയോഗിക്കുന്ന എ.സികൾക്കും ബാധകമാകും. നിലവിൽ, ഇന്ത്യയിലെ എ.സികളുടെ ഉയർന്ന താപനില 30 ഡിഗ്രി സെൽഷ്യസാണ്. സാധാരണയായി ആളുകൾ 20 ഡിഗ്രി സെൽഷ്യസിൽ താഴെയുള്ള താപനിലയിൽ ഉറങ്ങാറില്ലെന്ന് മന്ത്രി ചൂണ്ടിക്കാട്ടി. ഇന്ത്യയുടെ പീക്ക് പവർ ഡിമാൻഡിന്റെ ഏകദേശം അഞ്ചിലൊന്ന് വരുന്ന കൂളിങ്  ഡിമാൻഡ് 50 ജിഗാവാട്ട് ആണെന്ന് പവർ സെക്രട്ടറി പങ്കജ് അഗർവാൾ പറഞ്ഞു.

ജപ്പാൻ, യു.എസ് പോലുള്ള രാജ്യങ്ങൾ എ.സികളുടെ പ്രവർത്തനത്തിന് ഇതിനകം തന്നെ നിയന്ത്രണങ്ങൾ ഏർപ്പെടുത്തിയിട്ടുണ്ടെന്നും അദ്ദേഹം പറഞ്ഞു.