ടെൽ അവീവ്: ഇറാന്റെ ആണവ പദ്ധതി തടയാൻ ലക്ഷ്യമിട്ട് ഇസ്റഈൽ നടത്തിയ വ്യാപക വ്യോമാക്രമണത്തിന് പിന്നാലെ, ഇറാനും ഇസ്റഈലും പരസ്പരം മിസൈൽ, ഡ്രോൺ ആക്രമണങ്ങൾ അഴിച്ചുവിട്ടു. ഇസ്റഈലിന്റെ ആക്രമണത്തിൽ 78 പേർ കൊല്ലപ്പെട്ടതായും 320-ലധികം പേർക്ക് പരുക്കേറ്റതായും ഇറാൻ അറിയിച്ചു, ഇതിൽ ഭൂരിഭാഗവും സാധാരണക്കാരാണ്. ഇറാന്റെ മിസൈൽ ആക്രമണത്തിൽ ഇസ്റഈലിൽ മൂന്ന് പേർ മരിക്കുകയും ഡസൻ കണക്കിന് പേർക്ക് പരുക്കേൽക്കുകയും ചെയ്തു.

ടെഹ്‌റാനിൽ വൻ നാശം

ഇസ്റഈലിന്റെ ആക്രമണത്തിൽ ടെഹ്‌റാനിലെ ഷാഹിദ് ചമ്രാൻ എന്ന ഭവന സമുച്ചയം തകർന്നു. 20 കുട്ടികൾ ഉൾപ്പെടെ 60 പേർ കൊല്ലപ്പെട്ടതായി ഇറാനിയൻ സ്റ്റേറ്റ് ടെലിവിഷൻ റിപ്പോർട്ട് ചെയ്തു. മെഹ്‌റാബന്ദ് വിമാനത്താവളത്തിന് നേരെയും ആക്രമണമുണ്ടായി. ഇറാന്റെ വ്യോമ പ്രതിരോധ സംവിധാനങ്ങൾക്ക് സാരമായ കേടുപാടുകൾ സംഭവിച്ചതായും റിപ്പോർട്ടുകൾ സൂചിപ്പിക്കുന്നു.

ഇസ്റഈലിന്റെ മുന്നറിയിപ്പ്

ഇറാൻ പരമോന്നത നേതാവ് ആയത്തുള്ള അലി ഖമേനി ഇസ്റഈലിൽ ഇറാൻ ഇനി മിസൈലുകൾ തൊടുത്താൽ, ടെഹ്‌റാൻ കത്തിയെരിയുമെന്ന് ഇസ്റഈൽ പ്രതിരോധ മന്ത്രി ഇസ്റഈൽ കാറ്റ്സ് മുന്നറിയിപ്പ് നൽകി. ആണവ പദ്ധതിയുമായി ബന്ധപ്പെട്ട 9 മുതിർന്ന ഇറാനിയൻ ശാസ്ത്രജ്ഞരെ വധിച്ചതായും ഇസ്റഈൽ സൈന്യം (IDF) അവകാശപ്പെട്ടു. എസ്ഫഹാനിലെയും നടാൻസിലെയും ആണവ കേന്ദ്രങ്ങൾക്ക് കേടുപാടുകൾ സംഭവിച്ചതായും IDF പറഞ്ഞു.

ഇസ്റഈലിന്റെ ആക്രമണത്തിന് മറുപടിയായി ഇറാൻ ഡസൻ കണക്കിന് ബാലിസ്റ്റിക് മിസൈലുകളും ഡ്രോണുകളും വിക്ഷേപിച്ചു. ചില മിസൈലുകൾ തടഞ്ഞതായി ഇസ്റഈൽ അവകാശപ്പെട്ടു. ടെൽ അവീവിന് സമീപം റിഷോൺ ലെസിയോണിൽ മിസൈൽ പതിച്ച വീട്ടിൽ നിന്ന് ഒരു പെൺകുഞ്ഞിനെ രക്ഷപ്പെടുത്തി. റാമത് ഗാനിൽ വീടുകൾക്ക് കേടുപാടുകൾ സംഭവിച്ചതായി റിപ്പോർട്ട് ചെയ്തു.

അന്താരാഷ്ട്ര പ്രതികരണം

ഇസ്റഈലിന്റെ ആക്രമണത്തെ പ്രശംസിച്ചു യുഎസ് പ്രസിഡന്റ് ഡൊണാൾഡ് ട്രംപ്. ഇറാൻ ആണവ പദ്ധതി ഉപേക്ഷിച്ചില്ലെങ്കിൽ കൂടുതൽ പ്രത്യാഘാതങ്ങൾ നേരിടേണ്ടിവരുമെന്ന് അദ്ദേഹം മുന്നറിയിപ്പ് നൽകി. ഇറാന്റെ മിസൈലുകൾ തടയാൻ യുഎസ് സഹായിച്ചതായി അമേരിക്കൻ ഉദ്യോഗസ്ഥർ സ്ഥിരീകരിച്ചു. എന്നാൽ, ഇസ്റഈലിലിനെ പിന്തുണച്ചാൽ യുകെ, യുഎസ്, ഫ്രാൻസ് താവളങ്ങൾ ആക്രമിക്കുമെന്ന് ഇറാൻ മുന്നറിയിപ്പ് നൽകി.

ഇറാന്റെ സഖ്യകക്ഷിയായ യെമൻ ഹൂത്തി ഗ്രൂപ്പ് ഇസ്റഈലിന് നേരെ മിസൈലുകൾ തൊടുത്തു. മൂന്ന് കുട്ടികൾ ഉൾപ്പെടെ പരുക്കേറ്റതായും റിപ്പോർട്ടുകൾ. ​ഗസ്സയിലെ ഹമാസിനെയും ലെബനനിലെ ഹിസ്ബുള്ളയെയും തകർത്തതിനാൽ ഇറാന്റെ പ്രാദേശിക ശക്തി ക്ഷയിച്ചതായി വിലയിരുത്തൽ.

ഇറാൻ തങ്ങളുടെ ആണവ പദ്ധതി സിവിലിയൻ ആവശ്യങ്ങൾക്ക് മാത്രമാണെന്ന് അവകാശപ്പെടുന്നു. എന്നാൽ, അന്താരാഷ്ട്ര പരിശോധനകളിൽ നിന്ന് വിവരങ്ങൾ മറച്ചുവെച്ചതിനാൽ NPT ലംഘനം ഉണ്ടായതായി IAEA റിപ്പോർട്ട് ചെയ്തു. ഇസ്റഈൽ, ആണവായുധം വികസിപ്പിച്ച രാജ്യമാണെങ്കിലും NPT-യിൽ ഒപ്പുവെച്ചിട്ടില്ല. ഇറാന് ആണവായുധം നേടാൻ അനുവദിക്കില്ലെന്ന് ഇസ്റഈൽ ആവർത്തിച്ചു.

ആണവ ഭീഷണിയിൽ നിന്ന് മുക്തമായ ലോകം കെട്ടിപ്പടുക്കണം,” ലിയോ മാർപ്പാപ്പ അഭ്യർത്ഥിച്ചു. “നീതിയും സാഹോദര്യവും അടിസ്ഥാനമാക്കി സമാധാനം സ്ഥാപിക്കാൻ എല്ലാ രാജ്യങ്ങളും ശ്രമിക്കണം,” അദ്ദേഹം കൂട്ടിച്ചേർത്തു.