തിരുവനന്തപുരം: ഇന്ത്യ-ന്യൂസിലാൻഡ് ഏകദിന, ടി-20 പരമ്പരക്കുള്ള ഷെഡ്യൂൾ ബിസിസിഐ പുറത്തുവിട്ടിരുന്നു. 2026 ജനുവരിയിലാണ് ഇന്ത്യയും ന്യൂസിലാന്റും തമ്മിലുള്ള പരമ്പര നടക്കുന്നത്. പരമ്പരയിൽ മൂന്ന് ഏകദിനവും, അഞ്ച് ടി-20 മത്സരങ്ങളുമാണ് ഉള്ളത്. പരമ്പരയിലെ ഒരു ടി 20 മത്സരത്തിന് വേദിയാകുന്നത് തിരുവനന്തപുരം ഗ്രീൻഫീൽഡ് കാര്യവട്ടം സ്റ്റേഡിയമാണ്.

2026 ഫെബ്രുവരിയിൽ ഇന്ത്യയും ശ്രീലങ്കയും സംയുക്തമായി ആതിഥേയത്വം വഹിക്കുന്ന ട്വന്റി 20 ലോകകപ്പിന് മുന്നോടിയായാണ് ഈ മത്സരം നടക്കുന്നത്. ഇതിനു പുറമേ, ബിസിസിഐ കേരള ക്രിക്കറ്റ് അസോസിയേഷനെ അറിയിച്ചതനുസരിച്ച്, ഏപ്രിൽ മാസത്തിൽ കാര്യവട്ടം ഒരു ഏകദിന മത്സരത്തിനും വേദിയാകും. 2023 നവംബറിൽ ഇതേ സ്റ്റേഡിയത്തിൽ നടന്ന ടി20 മത്സരത്തിൽ ഇന്ത്യ ഓസ്‌ട്രേലിയയെ 44 റൺസിന് പരാജയപ്പെടുത്തിയിരുന്നു. ലോകകപ്പ് ക്രിക്കറ്റിന് മുമ്പുള്ള പരിശീലന മത്സരങ്ങളും ഇവിടെ നടന്നിട്ടുണ്ട്.

മലയാളി സൂപ്പർ താരം സഞ്ജു സാംസണിന്‌ സ്വന്തം മണ്ണിൽ ഇന്ത്യൻ ജേഴ്സി അണിഞ്ഞു കളിക്കാനുള്ള അവസരമാണ് ലഭിച്ചിരിക്കുന്നത്. ജനുവരി 31നാണ് തിരുവനന്തപുരത്തെ മത്സരം നടക്കുന്നത്. നിലവിൽ ഇന്ത്യൻ ടി-20 ടീമിലെ ഓപ്പണിങ് പൊസിഷനിലാണ് സഞ്ജു കളിക്കുന്നത്. സമീപകാലങ്ങളിൽ കുട്ടി ക്രിക്കറ്റിൽ ഇന്ത്യയ്ക്ക് വേണ്ടി മികച്ച പ്രകടനങ്ങൾ പുറത്തെടുക്കാൻ സഞ്ജുവിന് സാധിച്ചിരുന്നു. 

 

 അതേസമയം ഐപിഎല്ലിൽ ഈ സീസണിൽ രാജസ്ഥാൻ റോയൽസ് നിരാശാജനകമായ പ്രകടനമാണ്‌ പുറത്തെടുത്തത്. എട്ട് പോയിന്റുമായി ഒമ്പതാം സ്ഥാനത്താണ് രാജസ്ഥാൻ ഫിനിഷ് ചെയ്‌തത്. പരുക്കേറ്റതിന് പിന്നാലെ സഞ്ജുവിന് രാജസ്ഥാനൊപ്പമുള്ള ധാരാളം മത്സരങ്ങൾ നഷ്ടമായിരുന്നു. 

ഡൽഹി ക്യാപ്പിറ്റൽസിനെതിരായ മത്സരത്തിൽ പരുക്കേറ്റ് സഞ്ജു പുറത്തായിരുന്നു. മത്സരത്തിൽ റിട്ടയേർഡ് ഹാർട്ടായാണ് സഞ്ജു മടങ്ങിയത്. മത്സരത്തിൽ 19 പന്തിൽ 31 റൺസായിരുന്നു സഞ്ജു നേടിയിരുന്നത്. രണ്ട് ഫോറുകളും ഒരു സിക്‌സും നേടിക്കൊണ്ട് മിന്നും ഫോമിൽ തുടരവെയാണ് സഞ്ജുവിനു ഈ തിരിച്ചടി നേരിടേണ്ടി വന്നത്. ഇതോടെ രാജസ്ഥാൻ റോയൽസിന്റെ ചരിത്രത്തിൽ ആദ്യമായി പരുക്കേറ്റ് റിട്ടയർഡ് ഹർട്ട് ആവുന്ന താരമായും സഞ്ജു മാറി.