തിരുവനന്തപുരം:  മലയാളിയുടെ സിവിൽ സർവിസ് എന്ന പേരിൽ സംസ്ഥാനത്തിന്റെ അഭിമാനമായി സർക്കാർ വിലയിരുത്തിയിരുന്ന കേരള അഡ്മിനിസ്‌ട്രേറ്റിവ് സർവിസിന്റെ (കെ.എ.എസ്) തിളക്കം മങ്ങുന്നു. ആദ്യ ഘട്ടത്തിൽ അപേക്ഷിച്ചവരുടെ എണ്ണത്തിന്റെ നാലിലൊന്ന് പേരാണ് ഇത്തവണ അപേക്ഷിച്ചത്. ഇതിൽ പരീക്ഷ എഴുതിയതാകട്ടെ അതിലും പകുതിപേർ മാത്രം. ആദ്യ കെ.എ.എസിൽ 4,01,379 പേർ പരീക്ഷ എഴുതിയപ്പോൾ ശനിയാഴ്ച നടന്ന രണ്ടാം കെ.എ.എസിന്റെ പ്രാഥമിക പരീക്ഷയിൽ പങ്കെടുത്തത് ഒരു ലക്ഷത്തിൽ താഴെ ഉദ്യോഗാർഥികൾ മാത്രമാണ്. 

സ്ട്രീം 1, 2 വിഭാഗങ്ങളിൽ പ്രായപരിധി വർധിപ്പിക്കാത്തതും ഒഴിവുകളുടെ എണ്ണം കുറവായതും പൊതുമേഖലാ സ്ഥാപനങ്ങളിൽ ജോലി ചെയ്യുവർക്ക് സ്ട്രീം 2, 3 വിഭാഗങ്ങളിൽ അപേക്ഷിക്കാൻ അവസരം നൽകാത്തതും അപേക്ഷകർ കുറയാൻ കാരണമായി. 2019ലെ ആദ്യ വിജ്ഞാപനത്തിൽ അപേക്ഷിച്ചവരുടെ എണ്ണവുമായി താരതമ്യം ചെയ്യുമ്പോൾ മൂന്നര ലക്ഷത്തോളം ഉദ്യോഗാർഥികളാണ് രണ്ടാം വിജ്ഞാപനത്തിൽ കുറഞ്ഞത്. നേരിട്ട് നിയമനമുള്ള സ്ട്രീം ഒന്നിൽ 5,47,543 അപേക്ഷകളാണ് 2019ൽ ലഭിച്ചതെങ്കിൽ ഇത്തവണ അപേക്ഷകർ 2,15,942 ആയി ചുരുങ്ങി. കഴിഞ്ഞ തവണത്തെ അപേക്ഷിച്ച് 3,31,601 അപേക്ഷകരുടെ കുറവ്. 

ഗസറ്റഡ് അല്ലാത്ത മറ്റ് സർക്കാർ ജീവനക്കാർക്കുള്ള സ്ട്രീം രണ്ടിൽ 10,724 പേർ മാത്രമാണ് ഇത്തവണ അപേക്ഷിച്ചത്. കഴിഞ്ഞ തവണ 26,950 അപേക്ഷകൾ ലഭിച്ചിരുന്നു. 16,226 അപേക്ഷകൾ കുറഞ്ഞു. ഗസറ്റഡ് ഉദ്യോഗസ്ഥർക്കുള്ള മൂന്നാം സ്ട്രീമിൽ കഴിഞ്ഞ വിജ്ഞാപനത്തിന് 2951 അപേക്ഷകളുണ്ടായിരുന്നു. ഇക്കുറി 995 അപേക്ഷകളായി ചുരുങ്ങി. 1956 എണ്ണത്തിന്റെ കുറവ്. മൂന്ന് സ്ട്രീമിലുമായി ആദ്യ വിജ്ഞാപനത്തിന് 5,77,444 പേർ അപേക്ഷിച്ചിരുന്ന സ്ഥാനത്ത് ഇത്തവണ അത് 2,27,661 ആയി കുറഞ്ഞു. ആകെ 3,49,783 അപേക്ഷകരാണ് കുറഞ്ഞത് .

ഇതിൽ ഇത്തവണ എല്ലാ സ്ട്രീമിലുമായി പരീക്ഷയ്ക്ക് സന്നദ്ധത അറിയിച്ചത് 1,86,932 പേരാണ്. എന്നാൽ, ശനിയാഴ്ച നടന്ന പരീക്ഷയിൽ പങ്കെടുത്തതാകട്ടെ 52.8 ശതമാനം പേർ മാത്രം. അതായത് ഒരു ലക്ഷത്തിൽ താഴെ അപേക്ഷകർ മാത്രമാണ് പരീക്ഷ എഴുതിയത്. രാവിലെയും ഉച്ചയ്ക്കുമായി നടന്ന പരീക്ഷയിൽ ഉച്ചയ്ക്ക് ശേഷം പങ്കെടുത്തവരുടെ എണ്ണം വീണ്ടും കുറഞ്ഞു. 52.2 ശതമാനം പേരാണ് ഉച്ചയ്ക്ക് പരീക്ഷക്കെത്തിയത്. 

കഴിഞ്ഞ തവണ 105 ഒഴിവുകൾ റിപ്പോർട്ട് ചെയ്ത സ്ഥാനത്ത് ഇക്കുറി പുതിയ ഒഴിവുകൾ കണ്ടെത്താനാകാത്തതിനാൽ കേന്ദ്ര സിവിൽ സർവിസിലേതുപോലെ 'ഡെപ്യൂട്ടേഷൻ റിസർവ്' എന്ന പ്രത്യേക പൂൾ സൃഷ്ടിച്ചാണ് ഒഴിവുകൾ റിപ്പോർട്ട് ചെയ്തത്. ഒഴിവുകൾ കുറഞ്ഞതാണ് ഉദ്യോഗാർഥികളുടെ താൽപ്പര്യം കുറയാനുള്ള പ്രധാന കാരണമെന്ന് വിലയിരുത്തപ്പെടുന്നു. ശനിയാഴ്ച നടന്നത് പ്രാഥമികപരീക്ഷയാണ്. ഇത് വിജയിക്കുന്നവർക്കുള്ള മുഖ്യപരീക്ഷ ഒക്ടോബർ 17, 18 തീയതികളിലാണ്.  റാങ്ക്പട്ടിക 2026 ഫെബ്രുവരി 16നാണ് പ്രസിദ്ധീകരിക്കുക.

Kerala Administrative Service KAS Only one-fourth of the number of applicants from the first phase have applied this time