ടെഹ്റാൻ: ഇറാന്റെ സ്റ്റേറ്റ് ബ്രോഡ്കാസ്റ്ററായ ഇസ്ലാമിക് റിപ്പബ്ലിക് ഓഫ് ഇറാൻ ബ്രോഡ്കാസ്റ്റിംഗ് (ഐആർഐബി) കെട്ടിടത്തിന് നേരെ ഇസ്റാഈൽ നടത്തിയ ആക്രമണത്തെ ഇറാൻ ശക്തമായി അപലപിച്ചു. ഇന്ന് രാവിലെ ഇറാൻ വിദേശകാര്യ മന്ത്രാലയ വക്താവ് എസ്മായീൽ ബഗായ്, ആക്രമണത്തെ "യുദ്ധകുറ്റകൃത്യത്തിന്റെ ക്രൂര പ്രവൃത്തിയെന്നും ഇസ്റാഈലിനെ "സത്യത്തിന്റെ ഏറ്റവും വലിയ ശത്രു" എന്നും "മാധ്യമപ്രവർത്തകരുടെ കൊലയാളി" എന്നും ബഗായ് ആരോപിച്ചു. "വംശഹത്യക്കാരനായ ആക്രമണകാരിയെ" തടയണമെന്നും അദ്ദേഹം ആവശ്യപ്പെട്ടു. സോഷ്യൽ മീഡിയ പോസ്റ്റിലൂടെയാണ് ആരോപണം ഉന്നയിച്ചിരിക്കുന്നത്. 

ആക്രമണത്തിന് പിന്നാലെ, ഇറാൻ സ്റ്റേറ്റ് ടെലിവിഷൻ തത്സമയ സംപ്രേഷണം പുനരാരംഭിച്ചു. "സയണിസ്റ്റ് ഭരണകൂടം ഇറാൻ വാർത്താ ശൃംഖലയ്ക്കെതിരെ സൈനിക നടപടി നടത്തുകയും എന്നാൽ, ഇസ്ലാമിക വിപ്ലവത്തിന്റെയും മഹത്തായ ഇറാന്റെയും ശബ്ദം ഒരു ആക്രമണത്തിലൂടെ നിശബ്ദമാക്കാനാകില്ല," ഐആർഐബിയുടെ പ്രക്ഷേപണ വിഭാഗത്തിലെ ഹസ്സൻ അബെദിനി പ്രസ്താവനയിൽ പറഞ്ഞു.

തിങ്കളാഴ്ച, ഇറാന്റെ സൈനിക അടിസ്ഥാന സൗകര്യങ്ങൾ ലക്ഷ്യമിട്ടുള്ള വ്യോമാക്രമണങ്ങൾക്ക് മുന്നോടിയായി ഇസ്റാഈൽ കർശന മുന്നറിയിപ്പ് നൽകിയിരുന്നു. ടെഹ്റാനിലെ വടക്കൻ ജില്ലകൾ ഒഴിപ്പിക്കാൻ നിർദേശിച്ചു. തന്ത്രപരമായും ഈ പ്രധാന മേഖലയിൽ ഐആർഐബി ആസ്ഥാനം, നാല് ആശുപത്രികൾ, ഒരു പ്രധാന പൊലീസ് കെട്ടിടം, ഖത്തർ, ഒമാൻ, കുവൈറ്റ് എംബസികൾ, യുഎൻ ഓഫീസുകൾ, ഏജൻസ് ഫ്രാൻസ്-പ്രസ്സ് ബ്യൂറോ എന്നിവ സ്ഥിതി ചെയ്യുന്നു. ഇറാന്റെ പ്രചാരണത്തിന്റെയും പ്രകോപനത്തിന്റെയും മെഗാഫോൺ ഇല്ലാതാകും," ഇസ്റാഈൽ പ്രതിരോധ മന്ത്രി ഇസ്റാഈൽ കാറ്റ്സ് പ്രസ്താവിച്ചു. ഒഴിപ്പിക്കൽ നടപടികൾ ആരംഭിച്ചതായും അദ്ദേഹം വ്യക്തമാക്കി.

ഇറാന്റെ പരമോന്നത നേതാവിന്റെ കൊലപാതകം ലക്ഷ്യം: നെതന്യാഹു

ഇറാന്റെ പരമോന്നത നേതാവ് ആയത്തുള്ള അലി ഖമേനിയെ കൊലപ്പെടുത്തുന്നത് മേഖലയിലെ സംഘർഷം അവസാനിപ്പിക്കുമെന്ന് ഇസ്റാഈൽ പ്രധാനമന്ത്രി ബെഞ്ചമിൻ നെതന്യാഹു. എബിസി ന്യൂസിന് നൽകിയ അഭിമുഖത്തിൽ, ഖമേനിയെ ലക്ഷ്യം വയ്ക്കാനുള്ള സാധ്യത തള്ളിക്കളയാതെ അദ്ദേഹം പറഞ്ഞു, "ഇത് സംഘർഷം വർദ്ധിപ്പിക്കില്ല, മറിച്ച് അവസാനിപ്പിക്കും."

ഇതിനിടെ, ഇറാന്റെ വ്യോമ പ്രതിരോധം ടാബ്രിസിൽ ഒരു എഫ്-35 സ്റ്റെൽത്ത് ഫൈറ്റർ ജെറ്റ് വെടിവച്ചിട്ടതായി ഇറാന്റെ സർക്കാർ ഉടമസ്ഥതയിലുള്ള നൂർ ന്യൂസ് റിപ്പോർട്ട് ചെയ്തു. സംഭവത്തെക്കുറിച്ചുള്ള കൂടുതൽ വിവരങ്ങൾ ഉടൻ ലഭ്യമാക്കുമെന്ന് മാധ്യമം അറിയിച്ചു.