കോഴിക്കോട്: സ്‌കൂള്‍ സമയമാറ്റം മദ്രസ പഠനത്തെ മാത്രം ബാധിക്കുന്ന കാര്യമല്ലെന്ന് സത്താര്‍ പന്തല്ലൂര്‍. ഫേസ്ബുക്കില്‍ പങ്കുവച്ച 
കുറിപ്പിന്റെ പൂര്‍ണ രൂപം:

കേരളത്തിൽ സ്കൂൾ സമയം രാവിലെയും വൈകുന്നേരവും 15 മിനുട്ട് വീതം ദീർഘിപ്പിച്ച്  ഉത്തരവ് ഇറങ്ങിക്കഴിഞ്ഞു. നിയമാനുസൃതം ലഭ്യമാവേണ്ട പഠനസമയം പൂർത്തിയാക്കാൻ ഏതാനും ശനിയാഴ്ചകൾ കൂടി ഉൾപ്പെടുത്തിയിരുന്നു. അതിലെ കോടതി ഇടപെടലുകളാണ് പുതിയ സമയ മാറ്റത്തിലേക്ക് എത്തിയത്.

സമയമാറ്റം ആരെയാണ് ബാധിക്കുക ?

◾വേണ്ടത്ര ഗതാഗത സൗകര്യമില്ലാത്ത, യാത്രാ സൗകര്യമില്ലാത്ത വീട്ടിൽ നിന്ന് നടന്ന് ബസ് സ്റ്റോപ്പിലെത്തി സ്കൂളിലേക്ക് യാത്ര തിരിക്കുന്ന വിദ്യാർത്ഥികൾ.

◾സ്കൂളിലെ അധ്യാപനം കാര്യക്ഷമമല്ലാത്തതിനാൽ രാവിലെയും വൈകുന്നേരവും ട്യൂഷനേയും ഓൺലൈൻ ക്ലാസ്സുകളേയും ആശ്രയിക്കുന്നവർ.

◾ട്രൈനിനും ബസിനും ദീർഘദൂരം യാത്ര ചെയ്ത് സ്കൂളിലെത്തുന്ന അധ്യാപകർ.

◾വീട്ടിലെ അത്യാവശ്യ ജോലികൾ തീർത്ത് കുട്ടികളെ സ്കൂളിലയക്കേണ്ട രക്ഷിതാക്കൾ കൂടിയായ അധ്യാപകർ.

◾കൊളോണിയൽ ഭരണകാലത്ത് പോലും പൊതു വിദ്യാഭ്യാസത്തിൻ്റെ പേരിൽ തടസ്സം നേരിടേണ്ടി വന്നിട്ടില്ലാത്ത മദ്രസ്സാ പഠനം.

ഗുണമേൻമ വർധിപ്പിക്കാനാണ് സമയം ദീർഘിപ്പിക്കുന്നതെന്നാണ് വിശദീകരണം. ഈ കേസ് ഹൈക്കോടതിയിൽ പരാമർശിക്കവേ ജസ്റ്റിസ് മുഷ്താഖ് പറഞ്ഞത്, കുട്ടികളുടെ ലോകം സ്കൂൾ മാത്രമല്ലെന്നാണ്. കുട്ടികളുടെ വ്യക്തിത്വ രൂപീകരണത്തിന് ആവശ്യമായ ലോകം തുറന്ന് വെക്കേണ്ടതുണ്ട്. പാഠപുസ്തകത്തിലും അധ്യാപകനിലും മാത്രം കുട്ടിയെ തളച്ചിട്ടാൽ അധ്യാപകനോളം മാത്രമേ കുട്ടിക്കും വളരാൻ കഴിയൂ. അത് പോലും കാര്യക്ഷമമല്ലാത്തതിനാണ് കുട്ടികൾ സ്വകാര്യ ട്യൂഷനെ ആശ്രയിക്കേണ്ടി വരുന്നത്. സമയമാറ്റം പുനപരിശോധിച്ച് വിദ്യാഭ്യസ രംഗത്ത് ആവശ്യമായ പരിഷ്കരണമാണ് സർക്കാർ ചെയ്യേണ്ടത്. പാഠ്യപദ്ധതിയും അധ്യാപകരും ലോകത്തോടൊപ്പം സഞ്ചരിക്കണമെങ്കിൽ അധ്യാപക പരിശീലനത്തിൻ്റെ സമയമാണ് വർധിപ്പിക്കേണ്ടത്. രക്ഷിതാക്കൾക്കും ആവശ്യമായ അവബോധം നൽകണം. നിയമക്കുരുക്കുകളിൽ നിന്ന് രക്ഷപ്പെടാൻ അധ്യാപകരേയും വിദ്യാർത്ഥികളേയും സമ്മർദ്ധത്തിൽ നിർത്തലല്ല ഇതിനുള്ള പരിഹാരം.