ഡൽഹി: ഡൽഹിയിൽ മൊബൈൽ ഫോണും വിലപ്പിടിപ്പുള്ള സാധനങ്ങളും തട്ടിയെടുക്കാൻ ശ്രമിച്ച കുട്ടികളെ തടയാൻ ശ്രമിക്കുന്നതിനിടെ യുവാവ് കുത്തേറ്റ് മരിച്ചു. സംഭവത്തിൽ മൂന്ന് കുട്ടികളെ പൊലിസ് അറസ്റ്റ് ചെയ്‌തു. ജൂൺ പത്തിനാണ് സംഭവം നടന്നത്. ഡൽഹിയിലെ ദീപ് ചന്ദ് ബന്ധു ആശുപത്രിയിൽ നിന്നും രാത്രി പത്തു മണിയോടെ അശോക് വിഹാർ പൊലിസ് സ്റ്റേഷനിലേക്ക് ഒരു ഫോൺ വരുകയായിരുന്നു. കുത്തേറ്റ നിലയിൽ അമിത് കുമാർ എന്നയാളെ ആശുപത്രിയിൽ എത്തിച്ചുവെന്നാണ് ഫോൺ കോളിൽ ഉണ്ടായിരുന്ന സന്ദേശം.  

ഇതിന് പിന്നാലെ പൊലിസ് സംഭവ സ്ഥലത്തെത്തി അന്വേഷിച്ചപ്പോൾ ആരാണ് കുത്തിയതെന്ന വിവരം വ്യക്തമായിരുന്നില്ല. അമിത് കുമാറിന്റെ നെഞ്ചിൽ വലതു ഭാഗത്തിൽ ആഴത്തിലുള്ള രണ്ട് മുറികൾ ഉണ്ടായിരുന്നു. ചികിത്സയിൽ കഴിയവേ ഇയാൾ മരണപ്പെടുകയായിരുന്നു. എന്നാൽ കേസിൽ ദൃക്‌സാക്ഷികളോ മറ്റുള്ള തെളിവുകളോ ആദ്യ ഘട്ടത്തിൽ ലഭിച്ചിരുന്നില്ല. ഇതോടെ അജ്ഞാത വ്യക്തികളുടെ കുത്തേറ്റ് മരിച്ചുവെന്നാണ് പൊലിസ് എഫ്ഐആർ രജിസ്റ്റർ ചെയ്തത്.   

പിന്നീട് നടത്തിയ അന്വേഷണത്തിലാണ് കൊലപാതകത്തിന്റെ കൂടുതൽ വിവരങ്ങൾ തെളിഞ്ഞത്. പൊലിസ് സ്ഥലത്തെ സിസിടിവി പരിശോധിക്കുകയും സമീപവാസികളെ ചോദ്യം ചെയ്യുകയും ചെയ്തു. പിന്നീട് ലഭിച്ച നിർണായകമായ വിവരങ്ങൾക്ക് പിന്നാലെയാണ് പൊലിസ് പ്രതികളിലേക്ക് എത്തിയത്. ചോദ്യം ചെയ്യലിൽ മൂന്ന് കുട്ടികളും കുറ്റം സമ്മതിച്ചു. 

A young man was stabbed to death while trying to stop children from stealing his mobile phone in Delhi