തെഹ്റാൻ: ഇറാന്റെ ആണവ കേന്ദ്രങ്ങൾ മാത്രമല്ല, ആശുപത്രികളും പാർപ്പിട സമുച്ചയങ്ങളും ലക്ഷ്യമിട്ട് ഇസ്റാഈൽ നടത്തുന്ന ആക്രമണങ്ങൾ ഇറാനിയൻ ജനതയെ ഒന്നിപ്പിക്കുകയാണെന്ന് വിദഗ്ധൻ. ഇറാനിൽ തെഹ്റാൻ ആസ്ഥാനമായുള്ള സെന്റർ ഫോർ മിഡിൽ ഈസ്റ്റ് സ്ട്രാറ്റജിക് സ്റ്റഡീസിലെ സീനിയർ റിസർച്ച് ഫെലോ അബാസ് അസ്ലാനി അൽ ജസീറയുമായി നടത്തിയ അഭിമുഖത്തിലാണ് ഇക്കാര്യം വ്യക്തമാക്കിയത്.

ഇസ്റാഈൽ ആക്രമണങ്ങളിലൂടെ ഇറാനിൽ കുഴപ്പങ്ങൾ സൃഷ്ടിക്കാനും ജനങ്ങളെ സർക്കാരിനെതിരെ തിരിക്കാനും ശ്രമിക്കുന്നു. എന്നാൽ, ഇത് ജനങ്ങളെ ഇസ്റാഈലിനെതിരെ ഒന്നിപ്പിക്കുകയും ശക്തമായ പ്രതികരണം ആവശ്യപ്പെടാൻ അവരെ പ്രേരിപ്പിക്കുകയും ചെയ്തു," അസ്ലാനി വ്യക്തമാക്കി.

പതിറ്റാണ്ടുകളായി ഉപരോധങ്ങളും കൊലപാതകങ്ങളും ഉൾപ്പെടെയുള്ള സമ്മർദ്ദങ്ങൾ ഇറാൻ നേരിട്ടിട്ടും, ആണവ പദ്ധതി ഉപേക്ഷിക്കാൻ അവർ തയ്യാറായിട്ടില്ലെന്ന് അസ്ലാനി ചൂണ്ടിക്കാട്ടി. "ആണവ പദ്ധതി ഉപേക്ഷിച്ചാൽ, ഭാവിയിൽ ഇതിലും വലിയ ആക്രമണങ്ങൾക്ക് ഇറാൻ വിധേയമാകുമെന്നാണ് തെഹ്റാൻ കരുതുന്നത്," അദ്ദേഹം പറഞ്ഞു.

അമേരിക്കയിൽ നിന്നുള്ള പരസ്പരവിരുദ്ധ സന്ദേശങ്ങൾ ഇറാന് പരിചിതമാണെന്നും അസ്ലാനി കൂട്ടിച്ചേർത്തു. "ഈ ആക്രമണങ്ങൾക്ക് ശേഷം അമേരിക്കയും പ്രസിഡന്റ് ട്രംപും ഇറാനിൽ നിന്ന് കൂടുതൽ വിട്ടുവീഴ്ചകൾ ആവശ്യപ്പെടുകയാണെങ്കിൽ, യുറേനിയം സമ്പുഷ്ടീകരണം പൂർണമായി നിർത്തണമെന്ന് ആവശ്യപ്പെട്ടാലും, ഇറാൻ അത് അംഗീകരിക്കില്ല," അദ്ദേഹം വ്യക്തമാക്കി.

ജോർജ്ജ് ബുഷിന്റെ ഭരണകാലത്ത് ഇറാൻ സമ്മർദ്ദം നേരിട്ടിട്ടും, ഇപ്പോൾ ആയിരക്കണക്കിന് നൂതന യന്ത്രങ്ങൾ ഉപയോഗിച്ച് ഗണ്യമായ അളവിൽ സമ്പുഷ്ട യുറേനിയം ഉൽപ്പാദിപ്പിക്കുന്നു," അസ്ലാനി പറഞ്ഞു. ട്രംപിന്റെ ലക്ഷ്യങ്ങൾ ആണവ പദ്ധതി ഇല്ലാതാക്കുകയാണെങ്കിൽ, അത് നേടാനാകില്ലെന്നും അദ്ദേഹം കൂട്ടിച്ചേർത്തു.