കോഴിക്കോട്: കോഴിക്കോട് ജില്ലയിൽ ശക്തമായ മഴയെ തുടർന്നുണ്ടായ കെടുതിയിൽ രണ്ടര വയസുകാരി തോട്ടിൽ വീണ് മരിച്ചു. തലക്കുളത്തൂർ കുളങ്ങര താഴത്ത് നിഖിൽ-വൈഷ്ണവി ദമ്പതികളുടെ മകൾ നക്ഷത്രയാണ് മരിച്ചത്. വീടിനോട് ചേർന്ന് ഒഴുകുന്ന തോട്ടിലേക്ക് കുഞ്ഞ് വീഴുകയായിരുന്നു. കുഞ്ഞിനെ കാണാതായതിനെ തുടർന്ന് നടത്തിയ തിരച്ചിലിൽ മൃതദേഹം കണ്ടെത്തി.

ജില്ലയിൽ ഓറഞ്ച് അലർട്ടിന് ശേഷം നിലവിൽ യെല്ലോ അലർട്ട് തുടരുകയാണ്. കുറ്റ്യാടി, വിലങ്ങാട്, താമരശ്ശേരി, കോടഞ്ചേരി തുടങ്ങിയ മലയോര മേഖലകളിൽ ശക്തമായ മഴയ്ക്കൊപ്പം കാറ്റും വീശുന്നു. മാവൂർ സൗത്ത് അരയങ്കോട്ട് വീടിന് മുകളിൽ കവുങ്ങും പനയും കടപുഴകി വീണ് രണ്ട് പേർക്ക് പരിക്കൾ ഏറ്റു.

ചെറുമണ്ണൂർ, മേപ്പയൂർ, മാവൂർ പാറമ്മൽ, വളയം എന്നിവിടങ്ങളിൽ കിണറുകൾ ഇടിഞ്ഞു. മാവൂർ, പെരുവയൽ പ്രദേശങ്ങളിൽ താഴ്ന്ന പ്രദേശങ്ങളിൽ വെള്ളപ്പൊക്ക ഭീഷണി നിലനിൽക്കുന്നു. താമരശ്ശേരി ചുരത്തിൽ അപകട ഭീഷണിയുണ്ടാക്കിയ മരങ്ങൾ രാവിലെ 11:30-ഓടെ മുറിച്ചു മാറ്റി.