മേഘാലയ: മേഘാലയയിലെ ഹണിമൂൺ കൊലപാതകം പൊലീസിന്റെ പ്രത്യേക അന്വേഷണസംഘം പുനരാവിഷ്കരിച്ചു. രാജാ രഘുവൻഷിയെ കൊലപ്പെടുത്തിയ സൊഹ്റയിലെ മലമുകളിൽ പ്രതികളെ എത്തിച്ച് കൊലപാതക ദിനത്തിന്റെ സംഭവങ്ങൾ വീണ്ടും പുനരാവിഷ്കരണം നടത്തി. കൊല നടക്കുമ്പോൾ സോനം സ്ഥലത്തുണ്ടായിരുന്നതായി പൊലീസ് സ്ഥിരീകരിച്ചു.

2025 മെയ് 23-ന് സൊഹ്റ മലമുകളിൽ നടന്ന കൊലപാതകം പുനരാവിഷ്കരിക്കാൻ അന്വേഷണസംഘം പ്രതികളുമായി സ്ഥലത്തെത്തി. ഷില്ലോങ്ങിൽ വാടകയ്ക്കെടുത്ത സ്കൂട്ടർ പാർക്ക് ചെയ്ത സ്ഥലത്ത് നിന്ന് തുടങ്ങി, ട്രെക്കിങ് വഴി വ്യൂ പോയിന്റിലേക്ക് സംഘം പ്രതികളെ കൊണ്ടുപോയി. ഇവിടെവച്ചാണ് രാജാ രഘുവൻഷിയെ കൊലപ്പെടുത്തിയത്.

രാജ് കുശ്വഹയുടെ നിർദേശപ്രകാരം വിശാൽ, ആനന്ദ്, ആകാശ് എന്നിവർ രാജായെ ആക്രമിച്ചു. വിശാൽ ആദ്യം രാജയുടെ തലക്കടിച്ചു, തുടർന്ന് ആനന്ദും ആകാശും ആക്രമിച്ചു. മരണം ഉറപ്പായ ശേഷം മൃതദേഹം കൊക്കയിലേക്ക് എറിഞ്ഞു. ഈ സമയം സോനം സംഭവസ്ഥലത്ത് തന്നെയുണ്ടായിരുന്നു. പിന്നീട് രാജയുടെ മൊബൈൽ ഫോൺ സോനം നശിപ്പിച്ചതായും പൊലീസ് കണ്ടെത്തി.

സോനത്തിന് കൊലപാതകത്തിൽ പങ്കുള്ളതായി സമ്മതിച്ചു. “മൂന്ന് പേർ ചേർന്നാണ് രാജാ രഘുവൻഷിയെ കൊലപ്പെടുത്തിയത്. സോനം അവിടെ ഉണ്ടായിരുന്നു,” എസ്.പി. വിവേക് വ്യക്തമാക്കി. കൊലയ്ക്ക് ഉപയോഗിച്ച ആയുധത്തിന് പുറമെ ഒരു വെട്ടുകത്തിയും ഉപയോഗിച്ചതായി പ്രതികൾ മൊഴി നൽകി. ഈ കത്തി കൊക്കയിലേക്ക് എറിഞ്ഞതായും അവർ പറഞ്ഞു. എസ്.ഡി.ആർ.എഫിന്റെ സഹായത്തോടെ കത്തി കണ്ടെടുക്കാനുള്ള ശ്രമം തുടങ്ങി.

കൊലപാതകം മുൻകൂട്ടി ആസൂത്രണം ചെയ്തതാണെന്ന് പൊലീസ് സ്ഥിരീകരിച്ചു. കൊല നടത്തിയ ശേഷം പ്രതികൾ രക്ഷപ്പെട്ട വഴികളും പുനരാവിഷ്കരിച്ചു. സോനവും അവളുടെ കാമുകൻ രാജ് കുശ്വഹയും ചേർന്നാണ് കൊല ആസൂത്രണം ചെയ്തത്. കല്യാണം കഴിഞ്ഞ് ദിവസങ്ങൾക്കകം നടന്ന കൊലപാതകത്തിന് പ്രണയബന്ധത്തിന് പുറമെ മറ്റ് കാരണങ്ങളുണ്ടോയെന്നും പൊലീസ് അന്വേഷിക്കുന്നു.

In the chilling Meghalaya honeymoon murder case, police recreated the crime scene with the accused at Sohra hill. Vishal first struck Raja Raghuvanshi on the head, followed by Anand and Akash joining the assault. Once dead, his body was thrown into a gorge. Investigators confirmed that Raghuvanshi's wife, Sonam, was present at the scene and later destroyed his mobile phone. She has admitted to planning the murder with her lover Raj Kushwaha.