ന്യൂഡൽഹി: രാജ്യം കണ്ട വലിയ വിമാനദുരന്തങ്ങളിൽ ഒന്നായ അഹമ്മദാബാദ് വിമാനാപകടത്തിൽ മാപ്പ് പറഞ്ഞ് എയർ ഇന്ത്യ, ടാറ്റാ സൺസ് ചെയർമാൻ എൻ. ചന്ദ്രശേഖരൻ. മാധ്യമ സ്ഥാപനത്തിന് നൽകിയ അഭിമുഖത്തിലാണ് അദ്ദേഹം മാപ്പ് പറഞ്ഞത്. വിമാനം തകർന്നതിൻറെ യഥാർഥ കാരണം അന്വേഷണം പൂർത്തിയായാലേ പറയാൻ സാധിക്കൂ എന്നും അദ്ദേഹം വ്യക്തമാക്കി. മരിച്ചവരുടെ കുടുംബത്തോടൊപ്പം ഉണ്ടാകുമെന്നും എല്ലാ സഹായം നൽകുമെന്നും അദ്ദേഹം വ്യക്തമാക്കി.

"ജീവൻ നഷ്ടപ്പെട്ടവരുടെ കുടുംബാംഗങ്ങളെ എങ്ങനെ ആശ്വസിപ്പിക്കണമെന്ന് അറിയില്ല. ടാറ്റയുടെ വിമാനത്തിന് ഇത്തരമൊരു അപകടം സംഭവിച്ചതിൽ കുറ്റബോധമുണ്ട്. നമുക്കിപ്പോൾ ആകെ ചെയ്യാൻ കഴിയുന്നത് ജീവൻ നഷ്ടമായവരുടെ കുടുംബത്തോടൊപ്പം ഉണ്ടായിരിക്കുക എന്നതാണ്. അവർക്ക് എല്ലാ സഹായവും നൽകും." അദ്ദേഹം പറഞ്ഞു.

അതേസമയം, വിമാന ദുരന്തത്തിന്റെ കാരണം അറിയാനായി എയർ ക്രാഫ്റ്റ് ആക്സിഡൻറ് ഇൻവെസ്റ്റിഗേഷൻ ബ്യൂറോ അന്വേഷണം ആരംഭിക്കുകയും ഡി.ജി.സി.എ കമ്മിറ്റിയെ നിയമിക്കുകയും ചെയ്തിട്ടുണ്ട്. ഒരുമാസത്തിനുള്ളിൽ പ്രാഥമിക ഫലം ലഭിക്കുമെന്നാണ് കരുതുന്നതുന്നത് എന്നും അദ്ദേഹം പറഞ്ഞു. അപകടത്തിനെക്കുറിച്ച് നിരവധി ഊഹാപോഹങ്ങൾ ഉണ്ട്. എന്നാൽ വിമാനം പൂർണമായും കാര്യക്ഷമമാണ്. വലതു വശത്തെ എൻജിൻ ഈ മാർച്ചിൽ സ്ഥാപിച്ചതാണ്. സെക്കന്റ് എൻജിൻ 2023 ലാണ് സർവിസ് നടത്തിയത്. അടുത്ത സർവീസ് ഈ വർഷം ഡിസംബറിലായിരുന്നു വരേണ്ടിയിരുന്നത് എന്നിട്ടും എന്താണ് സംഭവിച്ചതെന്ന് കണ്ടെത്തേണ്ടിയിരിക്കുന്നു എന്ന് എൻ. ചന്ദ്രശേഖരൻ പറഞ്ഞു. 

അപകടമുണ്ടായ എ1-171 പരാതിയിരുന്ന പൈലറ്റുമാരും അനുഭവ സമ്പത്തുള്ളവരായിരുന്നു എന്നും അദ്ദേഹം അഭിമുഖത്തിൽ പറഞ്ഞു. ക്യാപ്റ്റന് 11500 മണിക്കൂറിൽ കൂടുതൽ വിമാനം പറത്തി എക്സപീരിയൻസ് ഉണ്ട്. ഫസ്റ്റ് ഓഫീസർക്കാകട്ടെ 3400 മണിക്കൂറും എക്സപീരിയൻസ് ഉണ്ട്. അതു കൊണ്ടു തന്നെ പൈലറ്റുമാരുടെ പിഴവാണെന്ന് അന്തിമമായി വിധിക്കാൻ കഴിയില്ല. യഥാർഥത്തിൽ എന്താണെന്ന് സംഭവിച്ചതെന്ന് ബ്ലാക്ക് ബോക്സ് പറയുമെന്നും അതു വരെ കാത്തിരിക്കണമെന്നും ചന്ദ്രശേഖരൻ പറഞ്ഞു. അപകടത്തിൽ രണ്ട് പൈലറ്റുമാർ ഉൾപ്പെടെ വിമാനത്തിൽ ഉണ്ടായിരുന്ന 241 പേരാണ് കൊല്ലപ്പെട്ടത്. ഒരാൾ മാത്രമാണ് രക്ഷപ്പെട്ടത്.