നിലമ്പൂര്‍: നിലമ്പൂര്‍ ഉപതെരഞ്ഞെടുപ്പില്‍ പുരോഗമിച്ച് വോടെപ്പ്. ആദ്യമണിക്കൂറില്‍ 6.02 ശതമാനമാണ് വോട്ട് രേഖപ്പെടുത്തിയത്. മഴയെ അവഗണിച്ചും രാവിലെ തന്നെ ബൂത്തുകളില്‍ വോട്ടര്‍മാരുടെ തിരക്കാണ്. എല്‍ഡിഎഫ് സ്ഥാനാര്‍ഥി എം സ്വരാജും യുഡിഎഫ് സ്ഥാനാര്‍ഥി ആര്യാടന്‍ ഷൗക്കത്തും വോട്ട് രേഖപ്പെടുത്തി. ഷൗക്കത്ത് പിതാവിന്റെ ഖബറിടം സന്ദര്‍ശിച്ച ശേഷമാണ് വോട്ട് രേഖപ്പെടുത്തിയത്. ചരിത്ര ഭൂരിപക്ഷം ലഭിക്കുമെന്നും ഷൗക്കത്ത് പ്രതികരിച്ചു.

പ്രധാന മുന്നണി സ്ഥാനാര്‍ഥികള്‍ ഉള്‍പ്പെടെ 10 സ്ഥാനാര്‍ഥികളാണ് മത്സരരംഗത്തുള്ളത്. മെയ് 25നായിരുന്നു നിലമ്പൂര്‍ ഉപതരെഞ്ഞെടുപ്പ് പ്രഖ്യാപിച്ചത്. പിവി അന്‍വര്‍ രാജിവച്ചതിനെ തുടര്‍ന്നുള്ള ഒഴിവിലേക്കായിരുന്നു ഉപതെരഞെടുപ്പ് നിലമ്പൂരില്‍ പ്രഖ്യാപിച്ചത്. നിലമ്പൂര്‍ ഉപതരെഞ്ഞെടുപ്പ് നിരീക്ഷിക്കാന്‍ തലസ്ഥാനത്തു തെരഞ്ഞെടുപ്പ് ഓഫിസറുടെ നേതൃത്വത്തില്‍ കണ്‍ട്രോള്‍ റൂം പ്രവര്‍ത്തിക്കുന്നുണ്ടെന്ന് മുഖ്യ തെരഞ്ഞെടുപ്പ് ഓഫിസര്‍ രത്തന്‍ ഖേല്‍ക്കര്‍. എന്തെങ്കില്‍ പ്രശ്‌നങ്ങള്‍ ശ്രദ്ധയില്‍ പെട്ടാല്‍ നേരിട്ട് ഇടപെട്ട് നടപടികള്‍ സ്വീകരിക്കുന്നതാണ്.

പ്രശ്‌നബാധിത ബൂത്തുകളില്‍ കേന്ദ്രസേനയുടെ നിരീക്ഷണമുണ്ടെന്നും മുഖ്യതെരഞ്ഞെടുപ്പ് ഓഫിസര്‍ രത്തന്‍ ഖേല്‍ക്കര്‍ പറഞ്ഞു. 
നിലമ്പൂരില്‍ വോട്ടെണ്ണിക്കഴിഞ്ഞാല്‍ താന്‍ നിയമസഭയിലേക്കും ആര്യാടന്‍ ഷൗക്കത്ത് കഥയെഴുതാനും എം സ്വരാജ് സെക്രട്ടറിയേറ്റിലേക്കും പോകുമെന്ന് സ്വതന്ത്ര സ്ഥാനാര്‍ഥി പിവി അന്‍വര്‍ പ്രതികരിച്ചു. ജനങ്ങളുടെ വിഷയങ്ങള്‍ രണ്ടു മുന്നണികളും അവഗണിച്ചെന്നും അന്‍വര്‍.