പാലക്കാട്: മുണ്ടൂരിൽ ഉണ്ടായ കാട്ടാന ആക്രമണത്തിൽ ഇന്ന് ഒരാൾ കൂടി കൊല്ലപ്പെട്ടതോടെ പാലക്കാട് ജില്ലയിൽ ഒരു മാസത്തിനിടെ ആനയുടെ ആക്രമണത്തിൽ മരിച്ചവരുടെ എണ്ണം മൂന്നായി. മെയ് 19 ന് കൊല്ലപ്പെട്ട എടത്തുനാട്ടുകര സ്വദേശി ഉമ്മർ, മെയ് 31 ന് കൊല്ലപ്പെട്ട അട്ടപ്പാടി സ്വദേശി മല്ലൻ എന്നിവർക്ക് പുറമെയാണ് ഇന്ന് ഞാറക്കോട് സ്വദേശി കുമാരൻ കൂടി കൊല്ലപ്പെട്ടത്. വന്യജീവി ആക്രമണം തടയാനുള്ള സർക്കാർ ശ്രമങ്ങൾ എല്ലാം പാഴാണെന്ന് തെളിയിക്കുന്നതാണ് ഈ ദാരുണ സംഭവങ്ങൾ.

ഇന്ന് പുലർച്ചെ 3.30നായിരുന്നു ഞാറക്കോട് സ്വദേശി കുമാരൻ (61) കാട്ടാനയുടെ ആക്രമണത്തിൽ കൊല്ലപ്പെട്ടത്. മൂത്രമൊഴിക്കാനായി വീട്ടുമുറ്റത്തേക്ക് എത്തിയ കുമാരനെ കാട്ടാന ആക്രമിക്കുകയായിരുന്നു. എന്നാൽ സംഭവത്തിന് ശേഷവും ആന ഇപ്പോഴും ജനവാസ മേഖലയിൽ തന്നെ തുടരുകയാണ്. ആനയെ മയക്കുവെടി വെക്കാനോ ഉൾക്കാട്ടിലേക്ക് തുരത്താനോ ഉള്ള നടപടികൾ ഇതുവരെ നടന്നിട്ടില്ല. ഇതേപ്രദേശത്ത് രണ്ട് മാസം മുമ്പ് കയറാങ്കോട് അലൻ എന്ന യുവാവും കാട്ടാന ആക്രമണത്തിൽ കൊല്ലപ്പെട്ടിരുന്നു.

ALSO READ: വോട്ടാവേശം മഴയെത്തും; ആദ്യമണിക്കൂറില്‍ മികച്ച പോളിങ് - കഴിഞ്ഞ പ്രാവശ്യത്തേക്കാള്‍ പോളിങ് ഉയരാന്‍ സാധ്യതയെന്ന് മുഖ്യ തെരഞ്ഞെടുപ്പ് കമ്മീഷണര്‍

ആക്രമണം തുടർക്കഥയായതോടെ പ്രദേശത്ത് നാട്ടുകാരുടെ പ്രതിഷേധം നടക്കുകയാണ്. കളക്ടർ എത്താതെ മൃതദേഹം മാറ്റാൻ അനുവദിക്കില്ലെന്ന നിലപാടിലാണ് നാട്ടുകാർ. പ്രദേശത്ത് റെയിൽ ഫൈൻസിങ് ഒരുക്കണമെന്നും നാട്ടുകാർ ആവശ്യം ഉന്നയിക്കുന്നുണ്ട്. ഇക്കാര്യത്തിൽ ഉറപ്പ് ലഭിക്കാതെ പിരിഞ്ഞ് പോകില്ലെന്ന് പറഞ്ഞ് പ്രതിഷേധം തുടരുകയാണ്. അതിനുശേഷം മാത്രം മൃതദേഹം ആശുപത്രിയിലേക്ക് മാറ്റുകയുള്ളുവെന്നാണ് നിലപാട്. 

2017ൽ ഉത്തരവായിട്ടും ഉദ്യോഗസ്ഥർ ഇതുവരെ റെയിൽ ഫെൻസിംഗ് സ്ഥാപിച്ചില്ലെന്ന് നാട്ടുകാർ ആരോപിച്ചു. പ്രദേശത്ത് സ്ഥിരമായി കാട്ടാന എത്തുന്നുണ്ടെന്നും വനം വകുപ്പ് ഉദ്യോഗസ്ഥർ കൃത്യമായി പ്രവർത്തിക്കുന്നില്ലെന്നുമാണ് നാട്ടുകാരുടെ ആക്ഷേപം. അതേസമയം, ഞാറക്കോട് പ്രദേശത്തെത്തിയ കാട്ടാനയെ ഇന്നലെ കാട് കയറ്റിയിരുന്നുവെന്നും പുലർച്ചയോടെ ആന തിരികെയെത്തുകയുമായിരുന്നെന്ന് പാലക്കാട് ഡിഎഫ്ഒ ജോസഫ് തോമസ് പ്രതികരിച്ചു. കൊല്ലപ്പെട്ട കുമാരൻ വനംവകുപ്പിന്റെ മുൻ താത്കാലിക വാച്ചറായിരുന്നുവെന്ന് വനം വകുപ്പ് ഉദ്യോഗസ്ഥർ അറിയിച്ചു.