കുവൈത്ത് സിറ്റി: ഹിജ്‌റ വര്‍ഷാരംഭത്തോടനുബന്ധിച്ച് ജൂണ്‍ 27 (വെള്ളിയാഴ്ച) കുവൈത്തില്‍ പൊതുമേഖലയ്ക്ക് ഒരു ദിവസത്തെ അവധി പ്രഖ്യാപിച്ചതായി കുവൈത്ത് ന്യൂസ് ഏജന്‍സി (KUNA) അറിയിച്ചു. രാജ്യത്തെ എല്ലാ സര്‍ക്കാര്‍ സ്ഥാപനങ്ങള്‍ക്കും പൊതു വിദ്യാഭാസ കേന്ദ്രങ്ങള്‍ക്കും അവധി ബാധകമായിരിക്കും.

യുഎഇയിലും അവധി

നേരത്തെ, യുഎഇയും ഹിജ്‌റ പുതുവര്‍ഷത്തിന് പൊതു അവധി പ്രഖ്യാപിച്ചിരുന്നു. സ്വകാര്യ മേഖലയില്‍ ശമ്പളത്തോടുകൂടിയ അവധിയാണ് യുഎഇ സര്‍ക്കാര്‍ അനുവദിച്ചത്.

എഡി 622ല്‍ പ്രവാചകന്‍ മുഹമ്മദ് നബി മക്കയില്‍ നിന്ന് മദീനയിലേക്ക് നടത്തിയ ഹിജ്‌റയുടെ ഓര്‍മയ്ക്കായാണ് ഇസ്‌ലാമിക പുതുവര്‍ഷം ആചരിക്കുന്നത്. ഇത് ഇസ്‌ലാമിക ചാന്ദ്ര കലണ്ടറിന്റെ തുടക്കത്തെ അടയാളപ്പെടുത്തുന്നു. ഈദുല്‍ ഫിത്ര്‍, ഈദുല്‍ അദ്ഹ പോലുള്ള പ്രധാന ആഘോഷമല്ലെങ്കിലും ഗള്‍ഫ് രാജ്യങ്ങളില്‍ ഈ ദിനം പ്രാധാന്യത്തോടെ ആചരിക്കപ്പെടുന്നു.

യുഎഇ, കുവൈത്ത് ഉള്‍പ്പെടെയുള്ള അറബ് രാജ്യങ്ങള്‍ ഹിജ്‌റ വര്‍ഷാരംഭത്തെ പൊതു അവധിയായി അംഗീകരിച്ചിട്ടുണ്ട്. പ്രാര്‍ഥന, കുടുംബ ഒത്തുചേരലുകള്‍ എന്നിവയോടെയാണ് ഈ ദിനം പരമ്പരാഗതമായി ഗള്‍ഫ് രാജ്യങ്ങളില്‍ ആചരിക്കപ്പെടുന്നത്.

Kuwait has declared June 27 as a public holiday for the Hijri New Year. All public sector offices will remain closed in observance of the Islamic occasion.