കോഴിക്കോട്: 'അക്ഷരങ്ങള്‍ കൂട്ടിവായിക്കാന്‍ തുടങ്ങിയപ്പോള്‍ മുതല്‍ പുസ്തകങ്ങളാണ് കുഞ്ഞ് യശോദയുടെ കൂട്ടുകാര്‍. ചിമ്മിനി വിളക്കിന്റെ വെളിച്ചത്തിലിരുന്ന് വായിക്കുമ്പോള്‍, 'പുസ്തകം തിന്നുതീര്‍ക്കേണ്ട കഴിക്കാന്‍ ഭക്ഷണമുണ്ടെന്ന അമ്മയുടെ സ്‌നേഹത്തില്‍ പൊതിഞ്ഞ ശാസന'  ഉയരും. വയസ് 65 ആയിട്ടും ഇപ്പോഴും പുസ്തകങ്ങള്‍ക്കൊപ്പം കൂട്ടുകൂടുന്ന ആ കൊച്ചു കുട്ടിതന്നെയാണ് യശോദ. ഇതിനിടയില്‍ മൂന്നു കവിതകളാണ് പ്രസിദ്ധീകരിച്ചത്. ആദ്യ പുസ്തകം പ്രസിദ്ധീകരിച്ചതാകട്ടെ തന്റെ അറുപതാം വയസിലും. വായനയെ മറക്കുന്ന യുവ തലമുറയ്ക്ക് പ്രചോദനവും ആവേശവുമാവുകയാണ് ബാലുശേരി നിർമല്ലൂര്‍ സ്വദേശി യശോദ.

പ്രായത്തിന്റെ അവശതകള്‍ ഉണ്ടെങ്കിലും അതൊന്നും വായനയേയും എഴുത്തിനേയും ബാധിച്ചിട്ടില്ല. പുസ്തകങ്ങളുടെ വലിയൊരു നിരതന്നെ ഇന്ന് വീട്ടിലുണ്ട്. എഴുത്തുക്കാരിയായി അറിയപ്പെടണമെന്ന സ്വപ്നം വാര്‍ധക്യകാലത്ത് സാധ്യമായതിന്റെ സന്തോഷത്തിലാണ് യശോദയിപ്പോള്‍. സായന്തനത്തിന്റെ കണ്ണുനീര്‍ ആണ് ആദ്യ കവിതാസമാഹാരം. പുസ്തകം ഇറങ്ങിയപ്പോള്‍ ലഭിച്ച പിന്തുണ വീണ്ടും എഴുതാനുള്ള ഊര്‍ജ്ജം നല്‍കി. 

വൈകാതെ രണ്ടാമത്തെ കവിതാ സമാഹരമായ നിവേദ്യവും പുറത്തിറക്കി. അസ്മതിക്കാത്ത സൂര്യന്‍ എന്ന പേരിലാണ് മൂന്നാമത്തെ കവിതാ സമാഹാരം. കവിത എഴുത്തിനു പുറമെ പ്രദക്ഷിണ വഴിയില്‍ എന്ന ആല്‍ബത്തിനുവേണ്ടി പാട്ടും യശോദ രചിച്ചിട്ടുണ്ട്. കൂടാതെ തന്റെ തറവാട്ടിലുണ്ടായിരുന്ന കാവും അമ്പലവും മണ്‍മറഞ്ഞു പോയതിനെക്കുറിച്ച് കഥാപ്രസംഗവും എഴുതി. ഇനിയൊരു നോവല്‍ എഴുതി പ്രസിദ്ധീകരിക്കണമെന്നാണ് യശോദയുടെ ആഗ്രഹം.അതിനായുള്ള ഒരുക്കത്തിലാണ് അവര്‍. 1985 മുതൽ ബാലവാടി കൺവീനറും 1991 ൽ അങ്കണവാടി ഹെൽപ്പറുമായിരുന്നു. ഇതിനിടയിൽ  രണ്ടുവർഷത്തെ ലീവിൽ കേരളത്തിലും പുറത്തുമായി അനാഥ കുട്ടികൾക്കുവേണ്ടി ജോലി ചെയ്തു.  ജോലിയിൽ നിന്ന് വിരമിച്ച ശേഷം ഇപ്പോൾ സാഹിത്യത്തിൽ മുഴുകിയിരിക്കുകയാണ്. നിരവധി ആദരവുകളും ലഭിച്ചിട്ടുണ്ട്.