കുട്ടനാട് താലൂക്കിലെ പ്രൊഫഷണൽ കോളേജുകൾ ഒഴികെയുള്ള എല്ലാ വിദ്യാഭ്യാസ സ്ഥാപനങ്ങൾക്കും അങ്കണവാടികൾക്കും ട്യൂഷൻ സെന്ററുകൾക്കും നാളെ (ജൂൺ 21) അവധി പ്രഖ്യാപിച്ച് ആലപ്പുഴ ജില്ലാ കളക്ടർ. താലൂക്കിലെ മിക്ക സ്കൂളുകളിലും പൊതുവഴികളിലും വെള്ളക്കെട്ട് രൂക്ഷമായതിനാലാണ് ഈ തീരുമാനം. മുൻനിശ്ചയിച്ച പരീക്ഷകൾക്ക് മാറ്റമില്ല.

ജില്ലാ കളക്ടർ കുട്ടനാട്ടിലെ വിവിധ പ്രദേശങ്ങൾ സന്ദർശിച്ച് സ്ഥിതിഗതികൾ വിലയിരുത്തി. വടക്കേ വാവക്കാട്, പരുത്തിവളവ്, ആറുപങ്ക് പാടശേഖരങ്ങൾ, എസ്എൻഡിപി എച്ച്എസ്എസ് തുടങ്ങിയ സ്ഥലങ്ങൾ സന്ദർശിച്ച അദ്ദേഹം, ജനങ്ങളുടെ ആശങ്കകളും ബുദ്ധിമുട്ടുകളും നേരിട്ട് മനസ്സിലാക്കി. സർക്കാർ തലത്തിൽ ആവശ്യമായ എല്ലാ നടപടികളും സ്വീകരിക്കുമെന്ന് കളക്ടർ ഉറപ്പുനൽകി.

മടവീഴ്ചയുണ്ടായ പാടശേഖരങ്ങളിലെ ദുർബല പ്രദേശങ്ങളിൽ കല്ലുകെട്ടാനുള്ള സഹായം അടിയന്തരമായി നൽകും. കഞ്ഞിവീഴ്ത്തൽ കേന്ദ്രങ്ങൾ ഉൾപ്പെടെയുള്ള ദുരിതാശ്വാസ പ്രവർത്തനങ്ങൾ തുടരാനും, കുടിവെള്ളം, ഭക്ഷണം, വൈദ്യസഹായം എന്നിവ ഉറപ്പാക്കാനും നിർദേശം നൽകി. സോഷ്യൽ മീഡിയ വഴിയും മറ്റ് മാർഗങ്ങളിലൂടെയും ജനങ്ങൾ പ്രദേശങ്ങളിലെ പ്രശ്നങ്ങൾ അറിയിച്ചിരുന്നു.

കുട്ടനാടിന്റെ സാധാരണ നില വീണ്ടെടുക്കാൻ എല്ലാ പിന്തുണയും ഉറപ്പാക്കുമെന്ന് കളക്ടർ വ്യക്തമാക്കി. ഡെപ്യൂട്ടി കളക്ടർ പ്രേംജി, പഞ്ചായത്ത് പ്രസിഡന്റ് എം.സി. പ്രസാദ്, ഉദ്യോഗസ്ഥർ, തദ്ദേശസ്ഥാപന പ്രതിനിധികൾ എന്നിവർ കളക്ടർക്കൊപ്പം സന്ദർശനത്തിൽ പങ്കെടുത്തു.