മലപ്പുറം: വോട്ടെണ്ണലിന്റെ തുടക്കംമുതല്‍ ആര്യാടന്‍ ഷൗക്കത്ത് ബഹുദൂരം മുന്നിലെത്തിയെങ്കിലും മുന്നണിയുടെ ഉരുക്കുകോട്ടയായ വഴിക്കടവില്‍ പ്രതീക്ഷിച്ച വോട്ട് ലഭിക്കാനാകാതെ യുഡിഎഫ്. വഴിക്കടവ് പഞ്ചായത്തില്‍ ഏകദേശം മൂവായിരം വോട്ടുകളുടെ ലീഡാണ് യുഡിഎഫ് പ്രതീക്ഷിച്ചിരുന്നത്. എന്നാല്‍ 1,449 വോട്ടുകളുടെ ലീഡേ ഇവിടെ ലഭിച്ചുള്ളൂ. പഞ്ചായത്തില്‍ ആദ്യ റൗണ്ട് കഴിയുമ്പോള്‍ 419 വോട്ടുകളുടെ ലീഡാണ് യുഡിഎഫിന് ലഭിച്ചത്. രണ്ടാം റൗണ്ട് കഴിയുമ്പോള്‍ ലീഡ് 1239 ആയി. മൂന്നാം റൗണ്ടില്‍ 230 വോട്ടുകളുടെ ലീഡും നേടിയതോടെയാണ് വഴിക്കടവിലെ ആകെ വോട്ട് 1449 ആയത്. ഇനി മൂത്തേടം പഞ്ചായത്താണ് എണ്ണാനുള്ളത്. മുസ്ലിം ലീഗിന്റെ ശക്തികേന്ദ്രമായ മൂത്തേടത്ത് ലീഡ് ഉയര്‍ത്താമെന്നാണ് യുഡിഎഫ് കണക്കുകൂട്ടുന്നത്. അതേസമയം, ആദ്യം എണ്ണിയ യുഡിഎഫ് ഭരിക്കുന്ന മൂന്ന് പഞ്ചായത്തിലും മുന്നണി കരുത്ത് കാട്ടിയതിനൊപ്പം എല്‍ഡിഎഫ് ഭരിക്കുന്ന പോത്ത് കല്ല് പഞ്ചായത്തിലും യുഡിഎഫ് വന്‍ നേട്ടം കൊയ്തു.

അമരമ്പലം, കരുളായി, മൂത്തേടം തുടങ്ങിയ പഞ്ചായത്തുകള്‍ ഫലത്തില്‍ നിര്‍ണായക പങ്കുവഹിക്കും. 2021ല്‍ എല്‍ഡിഎഫ് സ്ഥാനാര്‍ഥി പി.വി. അന്‍വര്‍ 1492 വോട്ടിന്റെ ഭൂരിപക്ഷം നേടിയ അമരമ്പലം പഞ്ചായത്തില്‍ ഇത്തവണ ഇതിലും വലിയ ലീഡ് എല്‍ഡിഎഫ് പ്രതീക്ഷിക്കുന്നു. കരുളായി പഞ്ചായത്തില്‍ 2021ല്‍ 1446 വോട്ടിന്റെ ലീഡ് ലഭിച്ചിരുന്നു. സ്വരാജിന്റെ സ്ഥാനാര്‍ഥിത്വം ഇവിടെ 100 വോട്ടിന്റെ അധിക ലീഡ് നേടുമെന്നാണ് ഇടതുമുന്നണിയുടെ കണക്കുകൂട്ടല്‍. പോത്തുകല്ല്, നിലമ്പൂര്‍ നഗരസഭ എന്നിവിടങ്ങളിലും എല്‍ഡിഎഫിന് ലീഡ് ലഭിക്കുമെന്നാണ് വിലയിരുത്തല്‍.

അതേസമയം,പോസ്റ്റല്‍ ബാലറ്റ് എണ്ണിത്തുടങ്ങിയതുമുതല്‍ ആധിപത്യം തുടര്‍ന്ന യുഡിഎഫ് സ്ഥാനാര്‍ഥി ആര്യാടന്‍ ഷൗക്കത്ത് ഒരുഘട്ടത്തിലും ലീഡ് കൈവിടാതെ മുന്നേറുകയായിരുന്നു. സ്വതന്ത്ര സ്ഥാനാര്‍ഥി പി.വി  അന്‍വറും ആദ്യ റൗണ്ടുകള്‍ എണ്ണിത്തുടങ്ങുമ്പോള്‍ ഇരുമുന്നണികളുടെയും കണക്കുകൂട്ടലുകള്‍ തെറ്റിച്ച് മികച്ച പ്രകടനമാണ് കാഴ്ചവെച്ചത്.

നിലവില്‍ 5036 വോട്ടിന് യുഡിഎഫിന്റെ ആര്യാടന്‍ ഷൗക്കത്ത് ലീഡ് ചെയ്യുകയാണ്. ആറ് റൗണ്ട് വോട്ടെണ്ണല്‍ പൂര്‍ത്തിയായി. ഏഴാം റൗണ്ടിലേക്ക് കടന്നു. വഴിക്കടവ് പഞ്ചായത്തിലെ വോട്ടുകള്‍ എണ്ണി പൂര്‍ത്തിയായപ്പോള്‍ യുഡിഎഫ് വ്യക്തമായ ലീഡ് നേടി. മൂത്തേടം പഞ്ചായത്തിലെ വോട്ടുകള്‍ എണ്ണുമ്പോള്‍ അവിടെയും ലീഡ് യുഡിഎഫിന് ഒപ്പമാണ്

ലീഡ്: 5036

യുഡിഎഫ്: ആര്യാടന്‍ ഷൗക്കത്ത് : 24229
എല്‍ഡിഎഫ്: എം സ്വരാജ്: 19472
സ്വതന്ത്രന്‍: പി.വി അന്‍വര്‍: 7777
എന്‍ഡിഎ: മോഹന്‍ ജോര്‍ജ്ജ്: 2786

Despite being far ahead, the UDF failed to get the expected votes at the crossroads.