മുംബൈ: ലൊകത്ത് അതിശക്തമരായ  അമേരിക്കയോടും ഇസ്‌റാഈലിനോടും തലകുനിക്കാതെ നെഞ്ചുറപ്പോടെ പോരാടിയ ഇറാനെ പുകഴ്ത്തിയും കേന്ദ്ര സര്‍ക്കാറിനുനേരെ ഒളിയമ്പെയ്തും ശിവസേന ഉദ്ധവ് വിഭാഗം നേതാവ് സഞ്ജയ് റാവുത്ത്. ആത്മാഭിമാനവും ധൈര്യവും എന്താണെന്ന് ഇന്ത്യ ഇറാനെ കണ്ടുപഠിക്കണമെന്ന് അദ്ദേഹം മാധ്യമങ്ങള്‍ക്കു മുന്നില്‍ തുറന്നടിച്ചു. ഇറാന്റെ ആണവകേന്ദ്രങ്ങള്‍ക്ക് നേരെ യു.എസ് ആക്രമണം നടത്തുകയും ഒട്ടും വിട്ടുകൊടുക്കാതെ അതേ നാണയത്തില്‍ യു.എസിനെ ഒന്ന് വിറപ്പിച്ച് ഖത്തറിലെ 
യു.എസ് വ്യോമതാവളത്തിനുനേരെ ഇറാന്‍ മിസൈലാക്രമണം നടത്തിയത് ചൂണ്ടിക്കാട്ടിയാണ് അദ്ദേഹത്തിന്റെ പ്രതികരണം. 

പ്രതിസന്ധിഘട്ടങ്ങളിലെല്ലാം ഇറാന്‍ എന്നും ഇന്ത്യക്കൊപ്പം നിലകൊണ്ട രാജ്യമാണെന്നും അദ്ദേഹം ഓര്‍മപ്പെടുത്തി. കശ്മീര്‍ വിഷയത്തിലാണെങ്കിലും പാകിസ്താനുമായുള്ള സംഘര്‍ഷത്തിലാണെങ്കിലും ഇറാന്‍ എന്നും ഇന്ത്യക്കൊപ്പമായിരുന്നു- അദ്ദേഹം പറഞ്ഞു. 

'ഒരു രാജ്യത്തിന്റെ ധൈര്യവും ആത്മാഭിമാനവും എന്താണെന്ന് ഇറാന്‍ കാണിച്ചു തന്നിരിക്കുകയാണ്. ഏത് പ്രതിസന്ധിഘട്ടത്തിലും ഇന്ത്യക്കൊപ്പം നിന്ന രാജ്യമാണ് ഇറാന്‍. അത് കശ്മീര്‍ വിഷയമായാലും പാകിസ്താനായാലും. നമ്മള്‍ തീര്‍ച്ചയായും ഇറാനെ കണ്ട് പഠിക്കണം. ആ രാജ്യം ആര്‍ക്കു മുന്നിലും തലകുനിച്ചിട്ടില്ല'- അദ്ദേഹം പറഞ്ഞു. 

ഇറാനിലെ അമേരിക്കന്‍ ബോംബാക്രമണത്തെയും ഇസ്‌റാഈലിന്റെ പ്രകോപനത്തെയും അപലപിക്കാന്‍ തയാറാകാത്ത മോദി സര്‍ക്കാറിനുനേരെ രൂക്ഷ വിമര്‍ശനവുമായി കഴിഞ്ഞദിവസം കോണ്‍ഗ്രസ് രംഗത്ത് വന്നിരുന്നു. ഇറാനുമായി അടിയന്തരമായി നയതന്ത്ര ചര്‍ച്ചയില്‍ ഏര്‍പ്പെടാന്‍ കേന്ദ്രം തയാറാകണമെന്നും കോണ്‍ഗ്രസ് ജനറല്‍ സെക്രട്ടറി ജയ്‌റാം രമേശ് ആവശ്യപ്പെട്ടു. ഇറാനില്‍ സമാധാന ശ്രമങ്ങള്‍ നടത്തുന്നുവെന്ന യു.എസ് പ്രസിഡന്റ് ഡൊണാള്‍ഡ് ട്രംപിന്റെ വാക്കും പ്രവൃത്തിയും തമ്മില്‍ യാതൊരു ബന്ധവുമില്ലെന്നും അദ്ദേഹം വിമര്‍ശിച്ചു. ഇറാനിലെ ആണവകേന്ദ്രങ്ങളായ ഫോര്‍ദോ, നതാന്‍സ്, ഇസ്ഫഹാന്‍ എന്നിവിടങ്ങളില്‍ യു.എസ് ബോംബാക്രമണം നടത്തിയിട്ടും ഇന്ത്യ അപലപിക്കാന്‍ തയാറായിരുന്നില്ല. 

12 ദിവസത്തെ യുദ്ധത്തിന് വിരാമമായി ഇസ്‌റാഈലും ഇറാനും തമ്മില്‍ താല്‍ക്കാലിക വെടിനിര്‍ത്തല്‍ നിലവില്‍ വന്നതിന് പിന്നാലെ വീണ്ടും ആശങ്ക പുകയുകയാണ്. തെഹ്രാനില്‍ കനത്ത ആക്രമണമെന്ന ഭീഷണിയോടെ ഇസ്‌റാഈല്‍ വീണ്ടും രംഗത്തെത്തിയതിന് പിന്നാലെയാണിത്. വെടിനിര്‍ത്തല്‍ ഇറാന്‍ ലംഘിച്ചെന്നാരോപിച്ചാണ് ഇസ്‌റാഈലിന്റെ നീക്കം. 

അമേരിക്കന്‍ പ്രസിഡന്റ് ഡൊണാള്‍ഡ് ട്രംപാണ് ഇരുരാജ്യങ്ങളും തമ്മിലുള്ള വെടിനിര്‍ത്തല്‍ പ്രാബല്യത്തില്‍ വന്നതായി സമൂഹമാധ്യമത്തിലൂടെ അറിയിച്ചത്. ദയവായി അത് ആരും ലംഘിക്കരുതെന്നും ട്രംപ് ആവശ്യപ്പെട്ടു. പിന്നാലെ ഇസ്‌റാഈലും ഇറാനും വെടിനിര്‍ത്തല്‍ വാര്‍ത്ത സ്ഥിരീകരിച്ചിരുന്നു. ഖത്തറിന്റെ സഹായത്തോടെയാണ് അമേരിക്ക വെടിനിര്‍ത്തല്‍ നടപ്പാക്കിയത്.

Shiv Sena (UBT) leader Sanjay Raut praised Iran for standing up to the U.S. and Israel with courage, urging India to learn self-respect from Iran. He recalled Iran’s consistent support for India on issues like Kashmir and Pakistan.