ദോഹ: തങ്ങള്‍ക്ക് നേരെയുണ്ടായ ഇറാന്റെ ആക്രമണം ആശ്ചര്യപ്പെടുത്തിയെന്ന് ഖത്തര്‍. മധ്യ പൂര്‍വേഷ്യയിലെ പ്രതിസന്ധികള്‍ക്ക് ഒരു പരിഹാരം കാണാനുള്ള രാജ്യത്തിന്റെ പരിശ്രമങ്ങള്‍ക്കിടയിലാണ് ഇറാന്റെ ആക്രമണം ഉണ്ടായതെന്നും ഇത് അപ്രതീക്ഷിതവും ഗുരുതരവുമാണെന്നും ഖത്തര്‍ വിദേശകാര്യ മന്ത്രാലയം വ്യക്തമാക്കി.

ALSO READ: യുദ്ധത്തിന് താല്‍ക്കാലിക വിരാമം?; ഇറാന്‍- ഇസ്‌റാഈല്‍ വെടിനിര്‍ത്തല്‍ നിലവില്‍ വന്നെന്ന് അല്‍ജസീറ റിപ്പോര്‍ട്ട്

ഖത്തറിന്റെ പരമാധികാരത്തിനും രാജ്യാന്തര നിയമങ്ങള്‍ക്കും മേലുള്ള ഗുരുതര ലംഘനമാണിതെന്ന് വിദേശകാര്യ മന്ത്രാലയ വക്താവ് ഡോ. മജീദ് ബിന്‍ മുഹമ്മദ് അല്‍ അന്‍സാരി വാര്‍ത്താസമ്മേളനത്തില്‍ വ്യക്തമാക്കി.

ഇന്റലിജന്‍സ് മുന്നറിയിപ്പിനെ തുടര്‍ന്ന് ഖത്തറിന്റെ വ്യോമനിരീക്ഷണ സംവിധാനങ്ങള്‍ സജീവമായിരുന്നു. വടക്ക്, വടക്ക് പടിഞ്ഞാറന്‍ ഇറാനില്‍ നിന്ന് തൊടുത്ത ഏഴ് മിസൈലുകള്‍ പ്രാദേശിക സമയം 7:30നാണ് ശ്രദ്ധയില്‍പ്പെട്ടത്. സമുദ്രത്തിന് മുകളില്‍ വച്ചുതന്നെ ഇവ നശിപ്പിച്ചു. തൊട്ടുപിന്നാലെ എത്തിയ 12 മിസൈലുകളില്‍ 11 എണ്ണവും പ്രതിരോധിച്ചെങ്കിലും ഒരു മിസൈല്‍ വ്യോമതാവളത്തില്‍ പതിച്ചതായി സായുധ സേന ജോയിന്റ് ഓപ്പറേഷന്‍സ് ഡപ്യൂട്ടി ചീഫ് ഷെയ്ഖ് അല്‍ ഹജിരി വെളിപ്പെടുത്തി.

ആക്രമണം നേരിയ തീപിടിത്തത്തിന് കാരണമായെങ്കിലും, അത് ഉടന്‍ നിയന്ത്രണവിധേയമാക്കിയതിനാല്‍ ആളപായമോ പരുക്കോ റിപ്പോര്‍ട്ട് ചെയ്തിട്ടില്ലെന്ന് ആഭ്യന്തര മന്ത്രാലയ വക്താവ് ജാബര്‍ അല്‍ നുഐമി അറിയിച്ചു. സേനയുടെ ജാഗ്രതയും മുന്‍കരുതലുകളും ആക്രമണത്തെ വിജയകരമായി പ്രതിരോധിക്കാന്‍ സഹായിച്ചതായി പ്രതിരോധ മന്ത്രാലയം വ്യക്തമാക്കി.

ALSO READ: ഗത്യന്തരമില്ലാതെ നെതന്യാഹു; വെടിനിര്‍ത്തല്‍ അംഗീകരിച്ചു, നടപ്പിലായതായി സ്ഥിരീകരണം 

'ഖത്തറിന്റെ വ്യോമപാതയും രാജ്യവും സുരക്ഷിതമാണ്. ഏത് ഭീഷണിയേയും നേരിടാന്‍ ഞങ്ങള്‍ സജ്ജരാണ്,' പ്രതിരോധ മന്ത്രാലയം പ്രസ്താവനയില്‍ പറഞ്ഞു.

Iran launched 19 missiles during ongoing ceasefire negotiations, prompting Qatar to label the strike as unexpected and concerning. Tensions rise in the region.