മുംബൈ: മുംബൈയിലെ ആരേ എന്ന കോളനിയിൽ കാൻസർ ബാധിതയായ മുത്തശ്ശിയെ മാലിന്യ കൂമ്പാരത്തിൽ ഉപേക്ഷിക്കപ്പെട്ട നിലയിൽ കണ്ടെത്തി. 60 വയസ്സുള്ള യശോദ ഗെയ്ക്‌വാദ് എന്ന സ്ത്രീയെയാണ് മാലിന്യക്കൂമ്പാരത്തിൽ നിന്ന് രക്ഷപ്പെടുത്തിയത്. തന്റെ പേരക്കുട്ടിയാണ് തന്നെ ഇവിടെ തള്ളിയതെന്ന് യശോദ പൊലീസിനോട് പറഞ്ഞു.

ശനിയാഴ്ച രാവിലെ 8:30-ന് പൊലീസിന് ലഭിച്ച രഹസ്യ വിവരത്തെ തുടർന്നാണ് യശോദയെ കണ്ടെത്തിയത്. കാൻസർ ബാധിച്ച വൃദ്ധയുടെ മുഖത്ത് ചികിത്സിക്കാത്ത ഗുരുതരമായ മുറിവുകളും അണുബാധയും ഉണ്ടായിരുന്നു. രാവിലെ കണ്ടെത്തിയെങ്കിലും, ആശുപത്രികളിൽ സൗകര്യമില്ലെന്ന കാരണത്താൽ വൈകുന്നേരം 5:30 വരെ യശോദയെ ആശുപത്രിയിൽ പ്രവേശിപ്പിക്കാൻ കഴിഞ്ഞില്ല. ഒടുവിൽ, കൂപ്പർ ആശുപത്രിയിൽ പ്രവേശിപ്പിച്ചെങ്കിലും, ലളിതമായ പരിശോധനയ്ക്ക് ശേഷം അവരെ തിരികെ അയച്ചു.

കൂപ്പർ ആശുപത്രിയിലെ ഡീൻ ഡോ. സുധീർ മേധേക്കർ പറഞ്ഞതനുസരിച്ച്, യശോദയുടെ മൂക്കിലും കവിളിലും അൾസർ ബാധയുടെ വളർച്ച ഉണ്ട്, ഇത് ബേസൽ സെൽ കാർസിനോമ ആകാമെന്നാണ് പ്രാഥമിക നിഗമനം. അവരുടെ ആരോഗ്യനില ഇപ്പോൾ സ്ഥിരതയുള്ളതാണെന്നും ഡോക്ടർ വ്യക്തമാക്കി. യശോദ തന്റെ പേരക്കുട്ടിയോടൊപ്പമാണ് താമസിച്ചിരുന്നതെന്നും, അവൻ തന്നെയാകാം ചവറ്റുകുട്ടയിൽ ഉപേക്ഷിച്ചുപോയതെന്നും പൊലീസ്  പറഞ്ഞു. മുംബൈയിലെ മലാദിലും കാണ്ടിവാലിയിലും ഉള്ള രണ്ട് കുടുംബ വിലാസങ്ങൾ യശോദ പോലീസിന് നൽകിയിട്ടുണ്ട്.

പൊലീസ് കേസ് അന്വേഷിക്കുകയാണ്. യശോദയുടെ ബന്ധുക്കളെ കണ്ടെത്താൻ അവരുടെ ഫോട്ടോ പൊലീസ് സ്റ്റേഷനുകളിൽ പങ്കുവെച്ചിട്ടുണ്ട്.   കൊച്ചു മകനെ കണ്ടെത്താൻ സമീപത്തെ റോഡുകളിലെ സിസിടിവി ദൃശ്യങ്ങളും പരിശോധിക്കുന്നുണ്ട്. എന്നാൽ, മാലിന്യം തള്ളിയ സ്ഥലത്ത് ക്യാമറകൾ ഇല്ലാത്തതിനാൽ അന്വേഷണം സങ്കീർണമാണ്. യശോദയെ തിരിച്ചറിയുന്നവർ മുംബൈയിലെ ആരേ പൊലീസ് സ്റ്റേഷനിൽ വിവരം അറിയിക്കണം,” സീനിയർ ഇൻസ്പെക്ടർ രവീന്ദ്ര പാട്ടീൽ പൊതുജനങ്ങളോട് അഭ്യർത്ഥിച്ചു.