കൊച്ചി: പള്ളുരുത്തിയിൽ യുവാവിനെ വാഹനത്തിൽ ദുരൂഹസാഹചര്യത്തിൽ മരിച്ച നിലയിൽ കണ്ടെത്തിയ സംഭവം കൊലപാതകമെന്ന് പൊലീസ് സ്ഥിരീകരിച്ചു. പെരുമ്പടപ്പ് സ്വദേശി ആഷിക് (30) ആണ് മരിച്ചത്. പെൺസുഹൃത്തിന്റെ ഭർത്താവ് പള്ളുരുത്തി സ്വദേശി ശിഹാബ് (39) നെ പൊലീസ് കസ്റ്റഡിയിലെടുത്തു. അന്വേഷണത്തിൽ ശിഹാബ് സംഭവസ്ഥലത്ത് ഉണ്ടായിരുന്നതായി പൊലീസ് വ്യക്തമാക്കിയിട്ടുണ്ട്. പെൺസുഹൃത്തിനെയും പള്ളുരുത്തി പൊലീസ് കസ്റ്റഡിയിലെടുത്തിട്ടുണ്ട്. കൊലപാതകത്തിൽ മറ്റാർക്കെങ്കിലും പങ്കുണ്ടോയെന്നും പൊലീസ് അന്വേഷിക്കുന്നു.

തിങ്കളാഴ്ച രാത്രിയാണ് ഇടക്കൊച്ചി കണ്ണങ്ങാട് പാലത്തിന് സമീപം ഇന്ദിരാഗാന്ധി റോഡിലെ ഒഴിഞ്ഞ സ്ഥലത്ത് നിർത്തിയിട്ട വാനിനുള്ളിൽ ആഷിക്കിനെ രക്തത്തിൽ കുളിച്ച നിലയിൽ കണ്ടെത്തിയത്. മ‍ൃതദേഹം കണ്ടെത്തിയ സമയത്ത് കാലുകളിൽ ആഴത്തിലുള്ള മുറിവുകളും ശരീരത്തിൽ ഉടനീളം പരുക്കുകളും ഉണ്ടായിരുന്നു. വാഹനത്തിൽ പെൺസുഹൃത്തും ഉണ്ടായിരുന്നു. ആഷിക് അപകടത്തിൽ പരുക്കേറ്റെന്നും ആശുപത്രിയിൽ കൊണ്ടുപോകാൻ സഹായിക്കണമെന്നും പറഞ്ഞ് വിളിച്ചത് പ്രകാരമാണ് വന്നത് എന്ന് പെൺസുഹൃത്ത് പൊലീസിനോട് പറഞ്ഞു. സ്ഥലത്തെത്തിയപ്പോൾ കാലിൽ നിന്ന് രക്തം വാർന്നതായി കാണുകയായിരുന്നു. യുവതി നിലവിളിച്ചതോടെ നാട്ടുകാർ ഓടിക്കൂടുകയും ആഷിക്കിനെ എറണാകുളം ജനറൽ ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു.

ആദ്യം ആത്മഹത്യയെന്നാണ് പൊലീസ് കരുതിയത്. മുറിവുകൾ സ്ക്രൂഡ്രൈവർ ഉപയോഗിച്ച് സ്വയം വരുത്തിയതാണെന്ന് തോന്നിച്ചു. എന്നാൽ, ആഷിക്കിന്റെ കുടുംബം ശരീരത്തിൽ കണ്ട മുറിവുകളുടെ അടിസ്ഥാനത്തിൽ ഇത് കൊലപാതകമാണെന്ന് ആരോപിച്ചു. തുടർന്ന് യുവതിയെയും ഭർത്താവിനെയും കസ്റ്റഡിയിലെടുത്ത് വിശദമായിചോദ്യം ചെയ്തപ്പോൾ കൊലപാതകം നടത്തിയതായി ശിഹാബ് സമ്മതിക്കുകയായിരുന്നു.

ആഷിക്കിനും പെൺസുഹൃത്തിനും ഇടയിലുള്ള അടുപ്പമാണ് കൊലപാതകത്തിന് കാരണമെന്നാണ് പൊലീസിന്റെ നിഗമനം. മീൻ വിതരണം ചെയ്യുന്ന ജോലിയിലായിരുന്നു ആഷിക്. സ്ക്രൂഡ്രൈവർ ഉപയോഗിച്ച് കാലുകളിലും തുടകളിലും ആഴത്തിൽ മുറിവേൽപ്പിച്ച് രക്തനഷ്ടം വഴിയാണ് മരണം സംഭവിച്ചതെന്ന് പ്രാഥമിക നിഗമനം. മട്ടാഞ്ചേരി എസിപി ഉമേഷ് ഗോയലിന്റെ നേതൃത്വത്തിൽ അന്വേഷണം തുടരുന്നു.

In Kochi, the death of 30-year-old Ashik, found with deep wounds in a vehicle at Palluruthy, was confirmed as murder. Police have detained the victim's female friend's husband, Shihab (39), and the woman herself. Initial suspicions of suicide were overturned after family allegations and police investigation revealed the crime was linked to a relationship dispute. Further probes are ongoing.