ന്യൂഡല്‍ഹി: നിലമ്പൂരിന് പുറമേ രാജ്യത്ത് നാല്  നിയമസഭ മണ്ഡലങ്ങളില്‍ കൂടി ഇന്ന് വോട്ടെണ്ണുന്നു. പശ്ചിമ ബംഗാളിലെ കാളിഗഞ്ച്, പഞ്ചാബിലെ ലുധിയാന വെസ്റ്റ്, ഗുജറാത്തിലെ കാഡി, വിസവദര്‍ മണ്ഡലങ്ങളിലാണ് വോട്ടെണ്ണല്‍ നടക്കുന്നത്.

തൃണമൂല്‍ കോണ്‍ഗ്രസ് എം.എല്‍.എ നസിറുദ്ദീന്‍ അഹമ്മദിന്റെ മരണത്തെ തുടര്‍ന്ന് ഉപതെരഞ്ഞെടുപ്പ് നടക്കുന്ന പശ്ചിമ ബംഗാളിലെ കാളിഗഞ്ചില്‍ തൃണമൂല്‍ സ്ഥാനാര്‍ഥി അലിഫ അഹമ്മദാണ് നിലവില്‍ മുന്നേറുന്നത്. തൃണമൂല്‍ - ബി.ജെ.പി - കോണ്‍ഗ്രസ് ത്രികോണ മത്സരമാണ് ഇവിടെ നടക്കുന്നത്.  ഇടത് പിന്തുണ കോണ്‍ഗ്രസിനാണ്. ബി.ജെ.പിയുടെ ആശിഷ് ഘോഷ് ആണ് രണ്ടാമത്.

ALSO READ: ഇസ്‌റാഈലിന് നേരെ വീണ്ടും ഇറാന്‍ മിസൈല്‍; പ്രതിരോധിച്ചെന്ന് ഐ.ഡി.എഫ്

ആം ആദ്മി എം.എല്‍.എ ഗുര്‍പ്രീത് ബാസി ഗോഗി അന്തരിച്ചതിനെത്തുടര്‍ന്നാണ് പഞ്ചാബിലെ ലുധിയാന വെസ്റ്റില്‍ തെരഞ്ഞെടുപ്പ് നടക്കുന്നത്. ഇവിടെ ആം ആദ്മിയുടെ സഞ്ജീവ് അറോറയാണ് ലീഡ് ചെയ്യുന്നത്. ബി.ജെ.പിയുടെ ജീവന്‍ ഗുപ്തയാണ് രണ്ടാമത്.

ബി.ജെ.പി എം.എല്‍.എ കര്‍സന്‍ഭായ് സോളങ്കിയുടെ മരണത്തെത്തുടര്‍ന്ന് ഉപതെരഞ്ഞെടുപ്പ് നടക്കുന്ന ഗുജറാത്തിലെ കാഡിയില്‍ ബി.ജെ.പി സ്ഥാനാര്‍ഥി രാജേന്ദ്രകുമാര്‍ ധനേശ്വറാണ് മുന്നില്‍. കോണ്‍ഗ്രസാണ് രണ്ടാമത്.

വിസവദറില്‍ എ.എ.പി എം.എല്‍.എ ഭൂപേന്ദ്ര ഭയാനിയുടെ രാജിയെത്തുടര്‍ന്നാണ് ഉപതെരഞ്ഞെടുപ്പ്. ബി.ജെ.പിയുടെ കിരിത് പട്ടേലാണ് ഇവിടെ മുന്നില്‍. ആം ആദ്മിയുടെ ഇട്ടാലിയ ഗോപാലാണ് രണ്ടാമത്.