ന്യൂഡൽഹി: ഏറെ പ്രതീക്ഷയോടെ കാത്തിരുന്ന ടാറ്റ സിയേറ എസ്‌യുവി ടാറ്റ മോട്ടോഴ്‌സ് ഇന്ത്യയിൽ ലോഞ്ച് ചെ്യതു. 11.49 ലക്ഷം രൂപയാണ് പ്രാരംഭ വില. 2003-ൽ നിർത്തിയ ക്ലാസിക് എസ്‌യുവിയുടെ ആധുനിക രൂപത്തിലുള്ള ഈ അവതരണം, ഹ്യുണ്ടായ് ക്രെറ്റ, കിയ സെൽറ്റോസ് തുടങ്ങിയ എതിരാളികൾക്ക് കടുത്ത വെല്ലുവിളിയാകും.

താൽപര്യമുള്ള ഉപഭോക്താക്കൾക്ക് 2025 ഡിസംബർ 16 മുതൽ ഓൺലൈനായോ അടുത്തുള്ള ടാറ്റ ഡീലർഷിപ്പ് വഴിയോ എസ്‌യുവി ബുക്ക് ചെയ്യാം. ഡെലിവറികൾ 2026 ജനുവരി 15-ന് ആരംഭിക്കും.

സ്മാർട്ട് പ്ലസ്, പ്യുവർ, പ്യുവർ പ്ലസ്, അഡ്വഞ്ചർ, അഡ്വഞ്ചർ പ്ലസ്, അക്കംപ്ലിഷ് എന്നിങ്ങനെ ഏഴ് വേരിയന്റുകളിലാണ് പുതിയ സിയേറ ലഭ്യമാകുക. ബംഗാൾ റൂഷ് (ചുവപ്പ്), ആൻഡമാൻ അഡ്വഞ്ചർ (മഞ്ഞ), കൂർഗ് ക്ലൗഡ് (സിൽവർ), മൂന്നാർ മിസ്റ്റ് (പച്ച), മിന്റൽ ഗ്രേ, പ്രിസ്റ്റൈൻ വൈറ്റ് എന്നിങ്ങനെ ആറ് കളർ ഓപ്ഷനുകളുണ്ട്. സ്റ്റെൽത്തി ലുക്ക് നൽകുന്ന ഡാർക്ക് എഡിഷൻ വേരിയന്റിലും സിയേറ എത്താൻ സാധ്യതയുണ്ട്.

പുതിയ സിയേറയിൽ മൂന്ന് എഞ്ചിൻ ഓപ്ഷനുകളാണ് ടാറ്റ മോട്ടോഴ്‌സ് വാഗ്ദാനം ചെയ്യുന്നത്:

ഡീസൽ: 1.5 ലിറ്റർ ക്രയോടെക് ടർബോ ഡീസൽ എഞ്ചിൻ (118 bhp പവറും 280 nm ടോർക്കും).

പെട്രോൾ (NA): പുതുതായി വികസിപ്പിച്ച 1.5 ലിറ്റർ നാച്ചുറലി ആസ്പിരേറ്റഡ് (NA) പെട്രോൾ (106 bhp പവറും 145 nm ടോർക്കും).

പെട്രോൾ (ടർബോ): 1.5 ലിറ്റർ ഹെപ്പീരിയൻ ടർബോ പെട്രോൾ എഞ്ചിൻ (160 bhp പവറും 260 nm ടോർക്കും).

AWD (ഓൾ-വീൽ ഡ്രൈവ്) മോഡൽ ഉടൻ പുറത്തിറക്കുമെന്നും ടാറ്റ മോട്ടോഴ്‌സ് സ്ഥിരീകരിച്ചിട്ടുണ്ട്.

സിയറയുടെ രൂപകൽപ്പന ക്ലാസിക്കൽ ഭംഗിയും ആധുനികതയും സമന്വയിപ്പിക്കുന്നു.

മുൻവശം: മുന്നിലും പിന്നിലും ബോൾഡ് 'സിയേറ' ബാഡ്ജിംഗ്, കണക്റ്റുചെയ്‌ത എൽഇഡി ലൈറ്റ് ബാർ, ടെക്സ്‌ചർ ചെയ്ത ഗ്രിൽ ഡിസൈൻ, പ്രധാന എൽഇഡി ഹെഡ്‌ലാമ്പുകൾ താഴെയായി സ്ഥാപിച്ചിരിക്കുന്നു.

വശങ്ങൾ: യഥാർത്ഥ മോഡലിന് നൽകിയ ആദരവായി ആൽപൈൻ വിൻഡോ-പ്രചോദിത രൂപകൽപ്പന നിലനിർത്തും. എങ്കിലും, ഫുൾ ഗ്ലാസ് സെക്ഷനു പകരം കറുത്ത ബി-പില്ലറുകളും കോൺട്രാസ്റ്റിംഗ് ബ്ലാക്ക് റൂഫും ഉപയോഗിക്കും.

പിൻവശം: ബോക്‌സി ഡിസൈൻ ഭാഷ മുന്നോട്ട് കൊണ്ടുപോകുന്ന കണക്റ്റഡ് ടെയിൽലൈറ്റ്, കോംപാക്റ്റ് ഓവർഹാംഗ്, ഉയർന്ന ബമ്പർ എന്നിവയാണ് സിയേറയുടെ മറ്റ് സവിശേഷതകൾ.

മറ്റ് സവിശേഷതകൾ: 19 ഇഞ്ച് ഡ്യുവൽ-ടോൺ അലോയ് വീലുകൾ, ഫ്ലഷ് ഡോർ ഹാൻഡിലുകൾ, ഷാർക്ക് ഫിൻ ആന്റിന, സ്കിഡ് പ്ലേറ്റുകൾ എന്നിവയും ശ്രദ്ധേയമാണ്.

ഇന്റീരിയർ: ട്രിപ്പിൾ സ്‌ക്രീൻ ലേഔട്ടും ആഡംബര സൗകര്യങ്ങളും

ALSO READ: വെല്ലുവിളി ഞങ്ങൾക്ക് ഇഷ്ടമാണ്; ഡ്രാഗൺ ചലഞ്ചിനെ അനുകരിച്ച് പടികൾ കയറി പരാജയപെട്ട ചൈനീസ് ബ്രാന്റിന് മറുപടിയുമായി റേഞ്ച് റോവർ 

മറ്റ് ടാറ്റ മോഡലുകളിൽ നിന്ന് പ്രചോദനം ഉൾക്കൊണ്ടാണ് സിയേറയുടെ ക്യാബിൻ രൂപകൽപ്പന ചെയ്തിരിക്കുന്നതെങ്കിലും, ട്രിപ്പിൾ സ്ക്രീൻ ലേഔട്ട് ഇതിനെ വേറിട്ടു നിർത്തുന്നു.

ട്രിപ്പിൾ സ്‌ക്രീൻ: ഡ്രൈവർക്കായി ഒരു ഡിജിറ്റൽ ഇൻസ്ട്രമെന്റ് ക്ലസ്റ്ററും, ഫംഗ്ഷനുകളും മീഡിയയും പങ്കിടാൻ കഴിയുന്ന ഒരു ജോഡി ഇൻഫോടെയ്ൻമെന്റ് സ്ക്രീനുകളും ഇതിൽ ഉൾപ്പെടുന്നു.

ഫീച്ചറുകൾ: സ്‌നാപ്ഡ്രാഗൺ ചിപ്പും 5G കണക്റ്റിവിറ്റിയും ഉള്ള IRA കണക്റ്റഡ് കാർ സാങ്കേതികവിദ്യ, OTA അപ്ഡേറ്റുകൾ, 12.3 ഇഞ്ച് പാസഞ്ചർ ഡിസ്‌പ്ലേ, 10.5 ഇഞ്ച് സെന്റർ ഡിസ്‌പ്ലേ, സൗണ്ട് ബാറും ഡോൾബി അറ്റ്മോസും ഉള്ള 12 സ്പീക്കർ JBL സൗണ്ട് സിസ്റ്റം, പനോരമിക് സൺറൂഫ്, ഡ്യുവൽ സോൺ ഓട്ടോമാറ്റിക് ക്ലൈമറ്റ് കൺട്രോൾ എന്നിവയാണ് പ്രധാന ഹൈലൈറ്റുകൾ.

സുരക്ഷാ കാര്യത്തിൽ ടാറ്റ വിട്ടുവീഴ്ച ചെയ്യുന്നില്ല.

സുരക്ഷാ കിറ്റ്: ലെവൽ 2 ADAS (അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റംസ്), ആറ് എയർബാഗുകൾ, ഓട്ടോ ഹോൾഡുള്ള ഇലക്ട്രോണിക് പാർക്കിംഗ് ബ്രേക്ക് (EPB), 360-ഡിഗ്രി ക്യാമറ, ഫ്രണ്ട് പാർക്കിംഗ് സെൻസറുകൾ എന്നിവയുണ്ട്.

പ്രീമിയം ഫീച്ചറുകൾ: മെമ്മറി ഫംഗ്ഷനോടുകൂടിയ വെന്റിലേറ്റഡ്, പവർഡ് ഡ്രൈവർ സീറ്റുകൾ, ജെസ്റ്റർ ഫംഗ്ഷനോടുകൂടിയ പവർഡ് ടെയിൽഗേറ്റ്, ബോസ് മോഡ്, പിൻ വിൻഡോ സൺഷെയ്ഡുകൾ, രണ്ട് സ്റ്റെപ്പ് റീക്ലൈനിംഗ് പിൻ സീറ്റുകൾ എന്നിവ യാത്ര കൂടുതൽ സുഖകരമാക്കും.

പുതിയ സിയേറ ഇന്ത്യൻ എസ്‌യുവി വിപണിയിൽ വലിയ ചലനമുണ്ടാക്കുമെന്നാണ് പ്രതീക്ഷ.

tata motors has officially launched the new tata sierra in india with prices starting from rs 11.49 lakh. the premium suv features modern design, advanced technology, and enhanced comfort, targeting urban and family buyers.