യുനൈറ്റഡ് നാഷന്‍സ്: അമേരിക്കയുടെ  ഓപറേഷന്‍ മിഡ്‌നൈറ്റ് ഹാമറിന് യു.എന്നില്‍ കടുത്ത വിമര്‍ശനം. ഇസ്‌റാഈലിനൊപ്പം ചേര്‍ന്ന് ഇറാനില്‍ നടത്തിയ ആക്രമണമായ ഓപറേഷന്‍ മിഡ്‌നൈറ്റ് ഹാമറിനെ ന്യായീകരിച്ച് രംഗത്തെത്തിയ അമേരിക്കക്കെതിരെ റഷ്യയും ചൈനയുമുല്‍പെടെയുള്ള രാജ്യങ്ങളാണ് കടുത്ത വിമര്‍ശനമുന്നയിച്ചത്.   ഇറാന്റെ ആണവ കേന്ദ്രങ്ങളില്‍ യു.എസ് നടത്തിയ ആക്രമണത്തെക്കുറിച്ച് ചര്‍ച്ച ചെയ്യാന്‍ ചേര്‍ന്ന യോഗത്തിലാണ് വിമര്‍സനമുയര്‍ന്നത്. ഞായറാഴ്ചയാണ് ഇറാന്‍ ആണവ കേന്ദ്രങ്ങളായ ഫോര്‍ദോ, നതാന്‍സ്, ഇസ്ഫഹാന്‍ എന്നിവക്കെതിരെ യു.എസ് ആക്രമണം നടത്തിയത്.

മിഡില്‍ ഈസ്റ്റില്‍ ഉടനടി നിരുപാധികമായ വെടിനിര്‍ത്തല്‍ ആവശ്യപ്പെടുന്ന 15 അംഗ സമിതി പ്രമേയം പാസാക്കാന്‍ റഷ്യ, ചൈന, പാകിസ്താന്‍ എന്നീ രാജ്യങ്ങള്‍ നിര്‍ദേശിച്ചതിനെത്തുടര്‍ന്നാണ് ഇറാന്റെ ആണവ കേന്ദ്രങ്ങളില്‍ യു.എസ് നടത്തിയ ആക്രമണത്തെക്കുറിച്ച് ചര്‍ച്ച ചെയ്യാന്‍ യു.എന്‍ സുരക്ഷാ കൗണ്‍സില്‍ ഞായറാഴ്ച യോഗം ചേര്‍ന്നത്. യു.എസ് നടപടിക്കെതിരെ റഷ്യയും ചൈനയും പാകിസ്താനുമടക്കമുള്ള രാജ്യങ്ങള്‍ രംഗത്തുവന്നു. രാജ്യാന്തര നിയമങ്ങള്‍ ലംഘിക്കുന്നതാണ് യു.എസിന്റെ നടപടിയെന്നാണ് ചൈന വിശേഷിപ്പിച്ചത്. 

'ബലപ്രയോഗത്തിലൂടെ മധ്യപൂര്‍വദേശത്ത് സമാധാനം കൈവരിക്കാനാവില്ല', ചൈനയുടെ യു.എന്‍ അംബാസഡര്‍ ഫു കോങ് ചൂണ്ടിക്കാട്ടി. 'ഇറാന്‍ ആണവ പ്രശ്‌നം പരിഹരിക്കുന്നതിനുള്ള നയതന്ത്ര മാര്‍ഗങ്ങള്‍ അവസാനിച്ചിട്ടില്ല, സമാധാനപരമായ ഒരു പരിഹാരത്തിനായി ഇപ്പോഴും പ്രതീക്ഷയുണ്ട്' - അദ്ദേഹം കൂട്ടിച്ചേര്‍ത്തു. അമേരിക്ക യുദ്ധത്തില്‍ നേരിട്ട് ഇടപെട്ടതിനെ റഷ്യയും രൂക്ഷമായി വിമര്‍ശിച്ചു. മേഖലയില്‍ അടിയന്തര വെടിനിര്‍ത്തല്‍ വേണമെന്നും റഷ്യയും ചൈനയും പാകിസ്താനും ആവശ്യപ്പെട്ടു.

'ഇറാന്റെ ആണവ കേന്ദ്രങ്ങളില്‍ അമേരിക്ക നടത്തിയ ബോംബാക്രമണം അപകടകരമായ ഒരു വഴിത്തിരിവിനെയാണ് അടയാളപ്പെടുത്തുന്നതെന്ന് യു.എന്‍ സെക്രട്ടറി ജനറല്‍ അന്റോണിയോ ഗുട്ടെറസ് ചൂണ്ടിക്കാട്ടി. 

അമേരിക്കന്‍ ആക്രമണത്തില്‍ ഇറാനിലെ ഇസ്ഫഹാന്‍ ആണവ നിലയത്തില്‍ കനത്ത നാശനഷ്ടം ഉണ്ടായെന്നാണ് അന്താരാഷ്ട്ര ആണവോര്‍ജ സമിതി പറയുന്നത്. ആണവ കേന്ദ്രത്തിലെ ടണലിലേക്കുള്ള കവാടങ്ങള്‍ തകര്‍ന്നെന്നും അന്താരാഷ്ട്ര ആണവോര്‍ജ്ജസമിതി അറിയിക്കുന്നു.

അതേസമയം,  ഇറാന്‍ യുറേനിയത്തിന്റെ ഭൂരിഭാഗവും ഇസ്ഫഹാനില്‍ ഭൂമിക്കടിയില്‍ സൂക്ഷിച്ചിട്ടുണ്ടെന്ന് നേരത്തെ ഉദ്യോഗസ്ഥര്‍ പറഞ്ഞിരുന്നു. തകര്‍ന്ന തുരങ്കങ്ങള്‍ സ്റ്റോക്ക്‌പൈലിന്റെ ഭാഗമാണെന്ന് യു.എന്‍ സുരക്ഷാ കൗണ്‍സിലിന് നല്‍കിയ പ്രസ്താവനയില്‍ ഐ.എ.ഇ.എ മേധാവി റാഫേല്‍ ഗ്രോസി സ്ഥിരീകരിക്കുന്നു.